“നീ എന്റെ പ്രിയപുത്രനാണ്”

2024 ജനുവരി 8, തിങ്കളാഴ്ച

കർത്താവിന്റെ മാമ്മോദീസ—തിരുനാൾ
ജനുവരി 6-നു ശേഷമുള്ള ഞായറാഴ്ച (അല്ലെങ്കിൽ കർത്താവിന്റെ പ്രത്യക്ഷീകരണത്തിരുനാൾ ജനുവരി 7-നോ 8-നോ വരുന്ന ഞായറാഴ്ച ആഘോഷിക്കുന്നുവെങ്കിൽ തിങ്കളാഴ്ച)

ഇന്നത്തെ വായനകൾ

വീഡിയോ

ആ ദിവസങ്ങളിൽ യേശു ഗലീലിയിലെ നസറത്തിൽനിന്ന് വന്ന് യോർദാനിൽ യോഹന്നാനിൽനിന്ന് മാമ്മോദീസ സ്വീകരിച്ചു. വെള്ളത്തിൽനിന്ന് കയറിവരുമ്പോൾ ആകാശം പിളരുന്നതും ആത്മാവ് പ്രാവിനെപ്പോലെ തന്റെമേൽ ഇറങ്ങിവരുന്നതും അവൻ കണ്ടു. സ്വർഗത്തിൽനിന്ന് ഒരു സ്വരം ഉണ്ടായി: “നീ എന്റെ പ്രിയപുത്രനാണ്; നിന്നിൽ ഞാൻ ഏറെ പ്രസാദിച്ചിരിക്കുന്നു.” മർക്കോസ് 1:9–11

കർത്താവിന്റെ ജ്ഞാനസ്നാനത്തിരുനാളോടെ നമ്മുടെ ക്രിസ്മസ് കാലം സമാപിക്കുകയും ആണ്ടുവട്ടക്കാലം ആരംഭിക്കുകയും ചെയ്യുന്നു. വിശുദ്ധഗ്രന്ഥത്തിന്റെ വീക്ഷണത്തിൽ, യേശുവിന്റെ ജീവിതത്തിലെ ഈ സംഭവം നസറത്തിലെ അവിടുത്തെ മറഞ്ഞുള്ള ജീവിതത്തിൽനിന്ന് പരസ്യശുശ്രൂഷയുടെ ആരംഭത്തിലേക്കുള്ള ഒരു വഴിത്തിരിവുകൂടിയാണ്. മഹത്വപൂർണമായ ഈ സംഭവം നാം അനുസ്മരിക്കുമ്പോൾ, ലളിതമായ ഒരു ചോദ്യം ധ്യാനിക്കുന്നത് പ്രധാനമാണ്: യേശു എന്തിനാണ് ജ്ഞാനസ്നാനം സ്വീകരിച്ചത്? യോഹന്നാന്റെ സ്നാനം മാനസാന്തരത്തിന്റെ സ്നാനമായിരുന്നുവെന്ന് ഓർക്കുക. അതിലൂടെ, പാപത്തിൽനിന്നു പിന്തിരിഞ്ഞ് ദൈവത്തിലേക്കു തിരിയാൻ അദ്ദേഹം തന്റെ അനുയായികളെ ക്ഷണിച്ചു. എന്നാൽ യേശു പാപരഹിതനായിരുന്നു. അപ്പോൾ അവിടുത്തെ ജ്ഞാനസ്നാനത്തിന്റെ കാരണം എന്തായിരുന്നു?

ഒന്നാമതായി, മുകളിൽ ഉദ്ധരിച്ച വചനഭാഗത്തിൽ, ജ്ഞാനസ്നാനം സ്വീകരിച്ച വിനീതമായ പ്രവൃത്തിയിലൂടെ യേശുവിന്റെ യഥാർഥ സ്വത്വം വെളിപ്പെട്ടതായി നാം കാണുന്നു. “നീ എന്റെ പ്രിയപുത്രനാണ്; നിന്നിൽ ഞാൻ പ്രസാദിച്ചിരിക്കുന്നു” എന്ന് സ്വർഗസ്ഥനായ പിതാവിന്റെ സ്വരം അരുളിച്ചെയ്തു. കൂടാതെ, ആത്മാവ് പ്രാവിന്റെ രൂപത്തിൽ അവിടുത്തെമേൽ ഇറങ്ങിവന്നതായും നാം വായിക്കുന്നു. അങ്ങനെ, യേശു ആരാണെന്നതിന്റെ പരസ്യമായ ഒരു പ്രഖ്യാപനംകൂടിയാണ് അവിടുത്തെ ജ്ഞാനസ്നാനം. അവിടുന്ന് ദൈവപുത്രനാണ്; പിതാവിനോടും പരിശുദ്ധാത്മാവിനോടും ഒന്നായിരിക്കുന്ന ദൈവിക വ്യക്തിയാണ്. പരസ്യശുശ്രൂഷ ആരംഭിക്കാൻ അവിടുന്ന് ഒരുങ്ങുമ്പോൾ നൽകപ്പെടുന്ന ഈ പരസ്യസാക്ഷ്യം ഒരു “പ്രത്യക്ഷീകരണമാണ്”—എല്ലാവർക്കും കാണാനായി അവിടുത്തെ യഥാർഥ സ്വത്വം വെളിപ്പെടുത്തുന്ന സംഭവം.

രണ്ടാമതായി, ജ്ഞാനസ്നാനത്തിലൂടെ യേശുവിന്റെ അതുല്യമായ എളിമ വെളിപ്പെടുന്നു. അവിടുന്ന് പരിശുദ്ധ ത്രിത്വത്തിലെ രണ്ടാമത്തെ വ്യക്തിയാണ്; എങ്കിലും പാപികളോടൊപ്പം എണ്ണപ്പെടാൻ അവിടുന്ന് സ്വയം അനുവദിക്കുന്നു. മാനസാന്തരത്തെ കേന്ദ്രീകരിച്ചുള്ള ഒരു പ്രവൃത്തിയിൽ പങ്കുചേർന്നുകൊണ്ട്, ജ്ഞാനസ്നാനം സ്വീകരിക്കുന്ന തന്റെ പ്രവൃത്തിയിലൂടെ യേശു ഏറെ കാര്യങ്ങൾ വ്യക്തമാക്കുന്നു. പാപികളായ നമ്മോടു സ്വയം ഐക്യപ്പെടാനും നമ്മുടെ പാപത്തിലേക്കും മരണത്തിലേക്കും പ്രവേശിക്കാനുമാണ് അവിടുന്ന് വന്നത്. ജലത്തിൽ പ്രവേശിക്കുന്നതിലൂടെ, നമ്മുടെ പാപത്തിന്റെ ഫലമായ മരണത്തിലേക്കുതന്നെ അവിടുന്ന് പ്രതീകാത്മകമായി പ്രവേശിക്കുന്നു; തുടർന്ന് വിജയശ്രീലാളിതനായി ഉയർന്നുവരുന്നു. അങ്ങനെ അവിടുത്തോടൊപ്പം പുതിയ ജീവിതത്തിലേക്ക് ഉയിർത്തെഴുന്നേൽക്കാൻ നമുക്കും വഴിയൊരുക്കുന്നു. ഇക്കാരണത്താൽ, യേശുവിന്റെ ജ്ഞാനസ്നാനം, ഒരർഥത്തിൽ പറഞ്ഞാൽ, അവിടുന്ന് ജലത്തെ “ജ്ഞാനസ്നാനപ്പെടുത്തുന്ന” ഒരു മാർഗമായിരുന്നു. ആ നിമിഷംമുതൽ ജലംതന്നെ അവിടുത്തെ ദൈവിക സാന്നിധ്യത്താൽ നിറയാനും അവിടുത്തെ പിന്നാലെ ജ്ഞാനസ്നാനം സ്വീകരിക്കുന്ന എല്ലാവർക്കും പകർന്നുനൽകപ്പെടാനും വേണ്ടിയായിരുന്നു അത്. അതിനാൽ, പാപികളായ മനുഷ്യർക്ക് ഇപ്പോൾ ജ്ഞാനസ്നാനത്തിലൂടെ ദൈവികതയെ കണ്ടുമുട്ടാൻ കഴിയും.

അവസാനമായി, നമ്മുടെ ദൈവമായ കർത്താവിനാൽ ഇപ്പോൾ വിശുദ്ധീകരിക്കപ്പെട്ട ജലത്തിലൂടെ ഈ പുതിയ ജ്ഞാനസ്നാനത്തിൽ നാം പങ്കുചേരുമ്പോൾ, അവിടുന്നിൽ നാം ആരായിത്തീരുന്നു എന്നതിന്റെ വെളിപ്പെടുത്തൽ യേശുവിന്റെ ജ്ഞാനസ്നാനത്തിൽ നാം കാണുന്നു. പിതാവ് സംസാരിച്ച് അവിടുത്തെ തന്റെ പുത്രനായി പ്രഖ്യാപിച്ചതുപോലെയും പരിശുദ്ധാത്മാവ് അവിടുത്തെമേൽ ഇറങ്ങിവന്നതുപോലെയും, നമ്മുടെ ജ്ഞാനസ്നാനത്തിൽ നാമും പിതാവിന്റെ ദത്തുമക്കളായിത്തീരുകയും പരിശുദ്ധാത്മാവിനാൽ നിറയുകയും ചെയ്യുന്നു. അങ്ങനെ, ക്രൈസ്തവ ജ്ഞാനസ്നാനത്തിൽ നാം ആരായിത്തീരുന്നു എന്ന് യേശുവിന്റെ ജ്ഞാനസ്നാനം വ്യക്തമാക്കുന്നു.

കർത്താവേ, മാമ്മോദീസ സ്വീകരിച്ച അങ്ങയുടെ വിനീതമായ പ്രവൃത്തിയിലൂടെ പാപികളായ എല്ലാവർക്കും അങ്ങ് സ്വർഗം തുറന്നുതന്നതിനായി ഞാൻ അങ്ങേക്കു നന്ദി പറയുന്നു. ഓരോ ദിവസവും എന്റെ മാമ്മോദീസയുടെ അഗാധമായ കൃപയ്ക്കായി ഞാൻ ഹൃദയം തുറക്കുകയും, പരിശുദ്ധാത്മാവിനാൽ നിറഞ്ഞ് പിതാവിന്റെ മകനായി അങ്ങയോടൊത്ത് കൂടുതൽ പൂർണമായി ജീവിക്കുകയും ചെയ്യുമാറാകട്ടെ. യേശുവേ, ഞാൻ അങ്ങയിൽ ശരണപ്പെടുന്നു.

കൂടുതൽ വായനയ്ക്ക്:
കർത്താവിന്റെ മാമ്മോദീസ

പരിചയപ്പെടുത്തുന്ന പുസ്തകം: