2024 ഫെബ്രുവരി 24
തപസ്സുകാലത്തിലെ ഒന്നാം ആഴ്ചയിലെ ശനിയാഴ്ച
ഇന്നത്തെ വായനകൾ
“എന്നാൽ ഞാൻ നിങ്ങളോടു പറയുന്നു: നിങ്ങളുടെ ശത്രുക്കളെ സ്നേഹിക്കുവിൻ; നിങ്ങളെ പീഡിപ്പിക്കുന്നവർക്കുവേണ്ടി പ്രാർത്ഥിക്കുവിൻ. അങ്ങനെ നിങ്ങൾ നിങ്ങളുടെ സ്വർഗ്ഗസ്ഥനായ പിതാവിന്റെ മക്കളായിത്തീരും. അവിടുന്ന് ദുഷ്ടരുടെയും നല്ലവരുടെയും മേൽ തന്റെ സൂര്യനെ ഉദിപ്പിക്കുകയും നീതിമാന്മാരുടെയും നീതിരഹിതരുടെയും മേൽ മഴ പെയ്യിക്കുകയും ചെയ്യുന്നു.” മത്തായി 5:44–45
“അതിനാൽ, നിങ്ങളുടെ സ്വർഗ്ഗസ്ഥനായ പിതാവ് പരിപൂർണ്ണനായിരിക്കുന്നതുപോലെ നിങ്ങളും പരിപൂർണ്ണരായിരിക്കുവിൻ” എന്ന യേശുവിന്റെ വചനങ്ങളോടെയാണ് ഇന്നത്തെ സുവിശേഷം അവസാനിക്കുന്നത്. എത്ര ഉന്നതമായ വിളിയാണിത്! നിങ്ങളുടെ “ശത്രുക്കൾ” എന്നു നിങ്ങൾ കരുതുന്നവരെയും നിങ്ങളെ “പീഡിപ്പിക്കുന്നവരെയും” പോലും ഉദാരമായും പൂർണ്ണമായും സ്നേഹിക്കണമെന്നത്, നിങ്ങൾ വിളിക്കപ്പെട്ടിരിക്കുന്ന പൂർണ്ണതയുടെ ഭാഗമാണെന്നു വ്യക്തമാണ്.
ഈ ഉന്നതമായ വിളിയെ അഭിമുഖീകരിക്കുമ്പോൾ ഉടനുണ്ടാകുന്ന ഒരു പ്രതികരണം നിരുത്സാഹമായിരിക്കാം. ഇത്രയും വെല്ലുവിളി നിറഞ്ഞ ഒരു കല്പനയ്ക്കു മുന്നിൽ, ഇത്തരത്തിൽ സ്നേഹിക്കാൻ നിങ്ങൾക്കു കഴിയില്ലെന്നു തോന്നുന്നത് മനസ്സിലാക്കാവുന്നതാണ്; പ്രത്യേകിച്ച് മറ്റൊരാൾ നിങ്ങളെ തുടർച്ചയായി വേദനിപ്പിച്ചുകൊണ്ടിരിക്കുമ്പോൾ. എന്നാൽ തികച്ചും സാധ്യമായ മറ്റൊരു പ്രതികരണമുണ്ട്; അതിനായിരിക്കണം നാം ശ്രമിക്കേണ്ടത്. ആ പ്രതികരണം ആഴമായ കൃതജ്ഞതയാണ്.
നമ്മുടെ കർത്താവ് തന്റെ പൂർണ്ണതയാർന്ന ജീവിതത്തിൽ നാം പങ്കുചേരണമെന്ന് ആഗ്രഹിക്കുന്നു എന്നതിനാലാണ് നാം കൃതജ്ഞത അനുഭവിക്കാൻ മനസ്സു തുറക്കേണ്ടത്. ഈ ജീവിതം നയിക്കാൻ അവിടുന്ന് നമ്മോടു കല്പിക്കുന്നു എന്ന വസ്തുത, അത് തികച്ചും സാധ്യമാണെന്നും നമ്മോടു പറയുന്നു. എത്ര വലിയ ദാനം! തന്റെ ഹൃദയത്താൽത്തന്നെ സ്നേഹിക്കാനും, അവിടുന്ന് എല്ലാ മനുഷ്യരെയും സ്നേഹിക്കുന്ന അതേ അളവിൽ സ്നേഹിക്കാനും നമ്മുടെ കർത്താവ് നമ്മെ ക്ഷണിക്കുന്നത് എത്ര വലിയ ബഹുമതിയാണ്! സ്നേഹത്തിന്റെ ഈ തലത്തിലേക്ക് നാമെല്ലാവരും വിളിക്കപ്പെട്ടിരിക്കുന്നു എന്ന സത്യം നമ്മുടെ ഹൃദയങ്ങളെ കർത്താവിനോടുള്ള ആഴമായ കൃതജ്ഞതയിലേക്കു നയിക്കണം.
എന്നാൽ, യേശുവിൽനിന്നുള്ള ഈ വിളിയോടുള്ള നിങ്ങളുടെ ഉടനെയുള്ള പ്രതികരണം നിരുത്സാഹമാണെങ്കിൽ, മറ്റുള്ളവരെ ഒരു പുതിയ കാഴ്ചപ്പാടിൽ കാണാൻ ശ്രമിക്കുക. അവരെക്കുറിച്ചു വിധി പറയുന്നത് മാറ്റിവയ്ക്കാൻ ശ്രമിക്കുക; പ്രത്യേകിച്ച് നിങ്ങളെ ഏറ്റവും അധികം വേദനിപ്പിച്ചിട്ടുള്ളവരും ഇപ്പോഴും വേദനിപ്പിച്ചുകൊണ്ടിരിക്കുന്നവരുമായ ആളുകളെക്കുറിച്ച്. വിധിക്കുക എന്നത് നിങ്ങളുടെ ചുമതലയല്ല; സ്നേഹിക്കുകയും മറ്റുള്ളവരെ അവർ യഥാർത്ഥത്തിൽ ആയിരിക്കുന്നതുപോലെ ദൈവമക്കളായി കാണുകയും ചെയ്യുക മാത്രമാണ് നിങ്ങളുടെ ചുമതല. മറ്റൊരാളുടെ വേദനിപ്പിക്കുന്ന പ്രവൃത്തികളെക്കുറിച്ചു നിങ്ങൾ ചിന്തിച്ചുകൊണ്ടിരുന്നാൽ, കോപവികാരങ്ങൾ അനിവാര്യമായും ഉയർന്നുവരും. എന്നാൽ, ഒരു മടിയും കൂടാതെ സ്നേഹിക്കാൻ നിങ്ങൾ വിളിക്കപ്പെട്ടിരിക്കുന്ന ദൈവമക്കളായി മാത്രം അവരെ കാണാൻ ശ്രമിച്ചാൽ, സ്നേഹവികാരങ്ങൾപോലും നിങ്ങളുടെ ഉള്ളിൽ കൂടുതൽ എളുപ്പത്തിൽ ഉയർന്നുവരും. അങ്ങനെ ഈ മഹനീയമായ കല്പന നിറവേറ്റാൻ നിങ്ങൾക്കു സഹായം ലഭിക്കും.
സ്നേഹത്തിലേക്കുള്ള ഈ ഉന്നതമായ വിളിയെക്കുറിച്ച് ഇന്ന് ധ്യാനിക്കുകയും നിങ്ങളുടെ ഹൃദയത്തിൽ കൃതജ്ഞത വളർത്താൻ പരിശ്രമിക്കുകയും ചെയ്യുക. നിങ്ങളെ കോപിക്കാൻ പ്രലോഭിപ്പിക്കുന്നവരുൾപ്പെടെ എല്ലാ മനുഷ്യരെയും അവിടുത്തെ ഹൃദയത്താൽ സ്നേഹിക്കുന്നതിലൂടെ, അത്ഭുതകരമായ ഒരു ദാനം നിങ്ങൾക്കു നൽകാൻ കർത്താവ് ആഗ്രഹിക്കുന്നു. അവരെ സ്നേഹിക്കുക, അവരെ ദൈവമക്കളായി കാണുക; നിങ്ങൾ വിളിക്കപ്പെട്ടിരിക്കുന്ന പൂർണ്ണതയുടെ ഉന്നതികളിലേക്ക് നിങ്ങളെ ആകർഷിക്കാൻ ദൈവത്തെ അനുവദിക്കുക.
എന്റെ പരിപൂർണ്ണനായ കർത്താവേ, എന്റെ അനേകം പാപങ്ങൾക്കിടയിലും എന്നെ സ്നേഹിക്കുന്നതിനായി ഞാൻ അങ്ങേക്കു നന്ദി പറയുന്നു. മറ്റുള്ളവരോടുള്ള അങ്ങയുടെ സ്നേഹത്തിന്റെ ആഴങ്ങളിൽ പങ്കുചേരാൻ എന്നെയും വിളിക്കുന്നതിനായി ഞാൻ അങ്ങേക്കു നന്ദി പറയുന്നു. അങ്ങ് എല്ലാ മനുഷ്യരെയും കാണുന്നതുപോലെ അവരെ കാണാനും, അങ്ങ് അവരെ സ്നേഹിക്കുന്നതുപോലെ അവരെ സ്നേഹിക്കാനും എനിക്കു കണ്ണുകൾ നൽകണമേ. കർത്താവേ, ഞാൻ അങ്ങയെ സ്നേഹിക്കുന്നു. അങ്ങയെയും മറ്റുള്ളവരെയും കൂടുതൽ സ്നേഹിക്കാൻ എന്നെ സഹായിക്കണമേ. ഈശോയെ, ഞാൻ അങ്ങയിൽ ശരണപ്പെടുന്നു.
പത്താം ദിവസത്തെ ധ്യാനങ്ങൾ:
മരുഭൂമിയിൽ 40 ദിനങ്ങൾ & കുരിശിൻ ചുവട്ടിൽ 40 ദിനങ്ങൾ
ദൈവകരുണയെക്കുറിച്ചുള്ള വിചിന്തനങ്ങൾ
നോമ്പുകാലത്തേക്കുള്ള തിരുവചന ധ്യാനങ്ങൾ
വിശുദ്ധ കുർബാനയിലെ വായനകൾക്കുള്ള തിരഞ്ഞെടുപ്പുകൾ
