मराठी

नवा दिवस उगवला — पुनरुत्थान रविवार

4 एप्रिल 2021

पुनरुत्थान रविवार—महापर्व (वर्ष ब)

आजची वाचने

व्हिडिओ

हा दिवस प्रभूने घडविला आहे; चला, आपण हर्ष करू या आणि आनंद मानू या. (पाहा  स्तोत्र 118)

आपला पुनरुत्थानाचा उत्सव सुरू झाला आहे!  पुनरुत्थानाच्या हार्दिक शुभेच्छा!

जगाच्या अनेक भागांत पुनरुत्थानाचा सण वसंत ऋतूत येतो.  वर्षाच्या या काळात निसर्गातच नवजीवनाची चाहूल लागते.  थंड, निश्चल मातीतून ट्युलिपची रोपे वर येऊ लागतात, झाडांना पालवी फुटू लागते आणि सारे रान हिरवाईचा सागर बनते. सूर्य नव्या तेजाने चमकू लागतो आणि रोज सकाळी उगवताना उब देतो.  सृष्टी स्वतःच अनेक प्रकारे ख्रिस्ताच्या पुनरुत्थानाचा गौरव आणि वैभव प्रतिबिंबित करते.

हिवाळ्यात निसर्गावर पसरलेली मृतवत शांतता ख्रिस्ताच्या मृत्यूची आणि पवित्र शनिवारी आपण अनुभवतो त्या थडग्यातील शांततेची आठवण करून देते.  सर्वत्र सुप्तावस्था पसरते.  वनस्पती जणू मरून गेल्यासारख्या दिसतात. प्राणी आणि कीटकही आपापल्या रीतीने शीतनिद्रेत जातात किंवा निश्चल होतात.  पण ठरलेल्या वेळी सूर्याची उब पुन्हा वाढू लागते, तेव्हा निसर्गालाच हिवाळ्याच्या मृतावस्थेतून वसंताच्या नवजीवनात येण्याची हाक मिळते.

कडाक्याचा हिवाळा कायमचाच राहिला, तर ते किती निराशाजनक ठरेल!  कल्पना करा, शास्त्रज्ञांनी आपल्याला सांगितले की यंदाचा हिवाळा इतर हिवाळ्यांपेक्षा वेगळा असेल: एकदा सुरू झाला की तो कधीच संपणार नाही.  वसंताची किंवा उन्हाळ्याची उब आपल्याला पुन्हा कधीच अनुभवायला मिळणार नाही.  कीटक, वनस्पती आणि झाडांवरची पाने आपल्याला पुन्हा कधीच दिसणार नाहीत.  किती निराशाजनक परिस्थिती असेल ती!

पण देव आपल्याशी अनेक वेगवेगळ्या मार्गांनी बोलतो. निसर्गाचे ऋतुचक्र हा त्यांपैकी एक मार्ग आहे.  नवजीवन येणार, हे निश्चित आहे!  हिवाळ्याच्या गोठवणाऱ्या थंडीनंतर उब परत येईल, निसर्ग पुन्हा जागा होईल आणि पृथ्वी पुन्हा गाऊ लागेल.

स्वर्गातील पिता आपल्या सृष्टीची इतक्या आस्थेने काळजी घेतो, तर मानवजातीच्या नवसृष्टीची त्याला किती अधिक काळजी असेल!  आपल्या स्वतःच्या दैवी पुत्राच्या पुनरुत्थानाविषयी त्याला किती अधिक आस्था वाटली असेल!  येशू ख्रिस्ताने मृतांतून उठून आपल्यापैकी प्रत्येकासाठी जे नवजीवन मिळवून दिले, त्यात आपण प्रवेश करावा याची त्याला किती अधिक काळजी आहे!

सृष्टीचे सौंदर्य तुम्हाला त्याहून अनंतपटीने महान असलेल्या सत्याकडे नेणारे चिन्ह ठरू द्या.  ख्रिस्ताच्या पुनरुत्थानात सहभागी झाल्यामुळे तुम्हाला जे नवे जीवन लाभते, त्याकडे स्वतःला ओढले जाऊ द्या.  त्याच्याबरोबर उठणे म्हणजे तुम्ही स्वतः नवी सृष्टी होणे.

आजच्या मिस्साबलिदानातील प्रतिसादात्मक स्तोत्राच्या वर दिलेल्या ओळीवर आज चिंतन करा.  “हा दिवस प्रभूने घडविला आहे; चला, आपण हर्ष करू या आणि आनंद मानू या.”  ज्या “दिवसाचा” आपण आनंद साजरा करतो, तो म्हणजे इथे आणि आत्ताच देव तुमच्या आत्म्याला देऊ इच्छित असलेले नवजीवन.  हा नवा दिवस आहे, गौरवाचा दिवस आहे, रूपांतर झालेला, पुनरुत्थित दिवस आहे.  नवजीवनाची सुरुवात आत्ताच झाली पाहिजे. पुनरुत्थानाच्या गौरवात आपण जसजसे अधिक खोलवर जाऊ, तसतसे ते जीवन सतत नवे आणि अधिक गौरवशाली होत गेले पाहिजे.  या “नव्या दिवसाचे” मनन करा आणि मृतांतून झालेल्या आपल्या गौरवशाली पुनरुत्थानाच्या सामर्थ्याने प्रभूला तो दिवस तुम्हाला बहाल करू द्या.

हे माझ्या पुनरुत्थित प्रभू, माझी आशा तुझ्यात आहे!  आलेलुया, तू जिवंत आहेस! तू सर्व पापांवर, मृत्यूवर आणि सर्व दुष्टतेवर विजय मिळवला आहेस.  आपल्या गरजेच्या वेळी तुझ्याकडे वळणाऱ्या सर्वांना तू नवजीवन देतोस.  हे माझ्या येशू, मी तुझ्याकडे वळतो आणि तुझ्या मृत्यूत स्वतःला पूर्णपणे तुझ्या स्वाधीन करतो, जेणेकरून तुझ्या पुनरुत्थानात मी तुझ्याबरोबर उठून नवजीवनात प्रवेश करावा.  तुझ्या श्वासाने हे नवजीवन माझ्यात संचारू दे आणि मला नव्याने सुरुवात करू दे.  हे येशू, माझा तुझ्यावर विश्वास आहे.

ईस्टरसाठी आणखी साहित्य

तिसरा दिवस: दैवी दयेच्या रविवारच्या तयारीची नोव्हेना

ईस्टरसाठी प्रार्थनामय चिंतन

जपमाळ – गौरवाची रहस्ये (पवित्र शास्त्रातील उताऱ्यांसह)

शुभवर्तमानावरील आणखी चिंतने

दैवी दयेवरील दैनंदिन चिंतन

संत फॉस्टिनाची दैवी दयेची विनवणीमाला

दैवी दयेवर भरवसा

दयेच्या वर्षासाठी प्रार्थना

दैवी दयेची जपमाळ

मिस्साच्या वाचनांचे पर्याय

सर्व संत / सण

आजचे संत – संत इसिदोर, बिशप आणि ख्रिस्तसभेचे धर्माचार्य
(यंदा हा दिवस पुनरुत्थान रविवारी येत असल्याने त्यांचे उपासनाविधीतील स्मरण साजरे केले जात नाही)

वर दिलेले चित्र: कार्ल हाइनरिख ब्लोख यांचे ‘पुनरुत्थान’


पुनरुत्थानाच्या सणासाठी पुस्तके!

दैनंदिन कॅथलिक चिंतन:
पास्काकाल 2021

दैवी दयेवरील दैनंदिन चिंतन:
संत फॉस्टिना यांच्यासोबत 365 दिवस