Juni 23, 2020
Jumanne ya Wiki ya Kumi na Mbili ya Kipindi cha Kawaida
Masomo ya Leo
Sikiliza kwa Kiingereza
“Watendeeni wengine yote mnayotaka wao wawatendee ninyi. Hii ndiyo Sheria na Manabii.” Mathayo 7:12
Maneno haya tunayoyafahamu sana yalikuwa amri kutoka kwa Mungu iliyowekwa katika Agano la Kale. Ni kanuni nzuri ya kuongoza maisha.
Ungependa wengine “wakutendee” nini? Tafakari jambo hilo na ujaribu kuwa mkweli. Tukiwa wakweli, lazima tukiri kwamba tunataka wengine watufanyie mengi. Tunataka kuheshimiwa, kutendewa kwa hadhi, kutendewa kwa haki, na kadhalika. Lakini katika undani zaidi wa mioyo yetu, tunataka kupendwa, kueleweka, kujulikana na kutunzwa.
Ndani ya mioyo yetu, sote tunapaswa kujitahidi kutambua shauku ya kiasili ambayo Mungu ametupa ya kuwa na uhusiano wa upendo na wengine, na ya kupendwa na Mungu. Shauku hii inagusa kiini cha maana ya kuwa binadamu. Sisi binadamu tumeumbwa kwa ajili ya upendo huo. Kifungu hiki cha Maandiko Matakatifu kilicho hapo juu kinafunua kwamba tunapaswa kuwa tayari na kuwa na nia ya kuwapa wengine kile tunachotamani kupokea. Ikiwa tunaweza kutambua ndani yetu shauku ya kiasili ya kupendwa, tunapaswa pia kujitahidi kukuza shauku ya kupenda. Tunapaswa kukuza shauku ya kupenda kwa kiwango kilekile tunachotamani sisi wenyewe kupendwa.
Hili ni gumu zaidi kuliko linavyoonekana. Mwelekeo wetu wa ubinafsi ni kudai na kutarajia upendo na huruma kutoka kwa wengine, huku sisi wenyewe tukijiridhisha na kutoa kidogo zaidi. Jambo la msingi ni kuelekeza fikira zetu kwanza kwenye wajibu wetu. Tunapaswa kujitahidi kutambua kile tunachoitwa kufanya na namna tunavyoitwa kupenda. Tunapoliona hili kuwa wajibu wetu wa kwanza na kujitahidi kuliishi, tutagundua kwamba tunapata uradhi mkubwa zaidi katika kutoa kuliko katika kutafuta kupokea. Tutatambua kwamba “kuwatendea wengine,” bila kujali yale “wanayotutendea,” ndiko kunakotupa utimilifu wa kweli.
Tafakari leo juu ya shauku ya kiasili iliyo moyoni mwako ya kupendwa na kuheshimiwa na wengine. Kisha, ifanye shauku hii kuwa mwongozo wa namna unavyowatendea walio karibu nawe.
Bwana, nisaidie kuwatendea wengine yale ninayotamani wanitendee. Nisaidie kuifanya shauku ya kupendwa iliyo moyoni mwangu kuwa kichocheo cha upendo wangu kwa wengine. Ninapojitoa, nisaidie kupata utimilifu na uradhi katika kujitoa huko. Yesu, nakutumainia.
Tafakari juu ya Huruma ya Mungu
Machaguo ya Masomo ya Misa Takatifu
Picha: Kugeuka Sura, Duccio di Buoninsegna
Mfululizo wa My Catholic Life!
Muhtasari kamili wa imani Katoliki!
