Juni 13, 2022
Jumatatu ya Juma la Kumi na Moja la Kipindi cha Mwaka
Masomo ya Leo
Mtakatifu Antoni wa Padua, Padri na Mwalimu wa Kanisa—Kumbukumbu
Sikiliza kwa Kiingereza
“Lakini mimi nawaambia, msimpinge mtu mwovu. Mtu akikupiga kwenye shavu lako la kulia, mgeuzie na lile la pili pia.” Mathayo 5:39
Hili ni fundisho ambalo ni vigumu kulipokea!
Je, kweli Yesu alimaanisha hivyo? Mara nyingi, tunapokuwa katika hali ambapo mtu ametukosea au ametuumiza, tunaweza kuwa na mwelekeo wa kutafuta mara moja visingizio vya kuupuuza ujumbe huu wa Injili na kudhani kwamba hautuhusu. Ndiyo, hili ni fundisho gumu kuliamini na gumu hata zaidi kuliishi.
Ina maana gani “kugeuza shavu la pili?” Kwanza, tunapaswa kulitazama hili kwa maana yake halisi. Yesu alimaanisha alichosema. Yeye ndiye mfano kamili wa hili. Hakupigwa kofi shavuni tu, bali pia alipigwa kikatili na kutundikwa msalabani. Naye alijibu hivi: “Baba, uwasamehe, hawajui wanachofanya.” Kwa hiyo, Yesu hatuiti kufanya jambo lolote ambalo Yeye mwenyewe hakuwa tayari kulifanya.
Kugeuza shavu la pili hakumaanishi kwamba tunapaswa kuficha matendo au maneno ya ukatili ya mtu mwingine. Hatupaswi kujifanya kwamba hajafanya kosa lolote. Yesu mwenyewe, kwa kusamehe na kumwomba Baba awasamehe, alikiri dhuluma kubwa aliyotendewa na wenye dhambi. Lakini jambo la msingi ni kwamba hakujiruhusu kuvutwa katika uovu wao.
Mara nyingi, tunapohisi kana kwamba mtu mwingine ametutupia matope, kwa lugha ya mfano, tunajaribiwa kumrudishia matope hayo mara moja. Tunajaribiwa kupigana na kumrudishia jeuri yake yule anayetunyanyasa. Lakini njia ya kuushinda uovu na ukatili wa mtu mwingine ni kukataa kuvutwa na kutumbukia katika matope hayo. Kugeuza shavu la pili ni njia ya kusema kwamba tunakataa kujishusha hadhi kwa kuingia katika mabishano au magomvi ya kipumbavu. Tunakataa kushiriki katika mambo yasiyo na mantiki tunapokutana nayo. Badala yake, tunachagua kumwacha mwingine audhihirishe uovu wake kwake mwenyewe na kwa wengine, kwa kustahimili uovu huo kwa amani na kusamehe.
Hii haimaanishi kwamba Yesu anataka tuendelee daima kuishi katika mahusiano yenye ukatili unaozidi uwezo wetu wa kustahimili. Lakini inamaanisha kwamba sisi sote tutakumbana na dhuluma mara kwa mara, na tunahitaji kuikabili kwa huruma na kusamehe mara moja, bila kuvutwa katika kulipa uovu kwa uovu.
Tafakari leo kuhusu mahusiano yoyote yaliyo magumu kwako. Hasa, tafakari jinsi ulivyo tayari kusamehe na kugeuza shavu la pili. Kufanya hivyo huenda kukakuletea amani na uhuru unaoutafuta katika uhusiano huo.
Bwana wangu mwenye kusamehe, nisaidie kuiga huruma Yako kuu na msamaha Wako. Nisaidie kuwasamehe walioniumiza na nisaidie kutoyumbishwa na dhuluma yoyote ninayokumbana nayo. Yesu, nakutumainia.
Novena kwa Moyo Mtakatifu wa Yesu
Tarehe za Novena:Juni 15-23, 2022
Juni 24, 2022: Sherehe ya Moyo Mtakatifu wa Yesu
Tafakari juu ya Huruma ya Mungu
Mtakatifu wa Siku – Mtakatifu Antoni wa Padua, Padri na Mwalimu wa Kanisa
Machaguo ya Masomo ya Misa Takatifu
Picha kuu hapo juu: Kuvikwa Taji la Miiba, kazi ya Caravaggio, kupitia Wikipedia
