Jumatano, Agosti 24, 2022
Sikukuu ya Mtakatifu Bartolomayo, Mtume
Sikiliza kwa Kiingereza
Yesu alimwona Nathanaeli akija Kwake, akasema juu yake, “Huyu ni mwana wa kweli wa Israeli. Hana unafiki ndani yake.” Nathanaeli akamwambia, “Unanijuaje?” Yesu akamjibu, “Kabla Filipo hajakuita, nilikuona chini ya mtini.” Nathanaeli akamjibu, “Rabi, Wewe ndiwe Mwana wa Mungu; Wewe ndiwe Mfalme wa Israeli.” Yohane 1:47-49
Unaposoma kifungu hiki kwa mara ya kwanza, huenda ukahisi unahitaji kurudi nyuma na kukisoma tena. Ni rahisi kukisoma na kufikiri kwamba kuna jambo limekupita. Ilikuwaje kwamba Yesu alimwambia tu Nathanaeli (anayeitwa pia Bartolomayo) kwamba alikuwa amemwona ameketi chini ya mtini, na hilo likatosha kumfanya Nathanaeli ajibu, “Rabi, Wewe ndiwe Mwana wa Mungu; Wewe ndiwe Mfalme wa Israeli.” Ni rahisi kutatizika kuelewa jinsi Nathanaeli alivyoweza kufikia hitimisho hilo kutokana na maneno ambayo Yesu alisema juu yake.
Lakini angalia jinsi Yesu alivyomwelezea Nathanaeli. Alikuwa mtu “asiye na unafiki.” Tafsiri nyingine zinasema alikuwa “asiye na hila.” Basi, hilo linamaanisha nini?
Mtu akiwa na unafiki au hila, maana yake ni kwamba ana nyuso mbili na ni mjanja wa kudanganya. Ana ustadi wa kuwadanganya wengine. Hii ni tabia hatari na yenye kuleta mauti. Lakini kusema kinyume chake, kwamba mtu “hana unafiki” au “hana hila,” ni njia ya kusema kwamba yeye ni mwaminifu, mnyoofu, mkweli, muwazi na asiyejifanya.
Kwa upande wa Nathanaeli, alikuwa mtu aliyesema kwa uhuru yale aliyoyafikiri. Katika tukio hili, haikuwa kwamba Yesu alitoa hoja fulani ya kiakili yenye kusadikisha kuhusu umungu Wake; hakusema chochote kuuhusu. Badala yake, kilichotokea ni kwamba fadhila hii njema ya Nathanaeli, ya kutokuwa na unafiki, ilimwezesha kumtazama Yesu na kutambua kwamba Yeye ni “wa kweli, si wa kujifanya.” Mazoea mema ya Nathanaeli ya kuwa mwaminifu, mkweli na muwazi hayakumwezesha tu kutambua Yesu ni nani, bali pia yalimwezesha kuwaona wengine kwa uwazi zaidi na kwa uaminifu. Na tabia hii ilimsaidia sana alipomwona Yesu kwa mara ya kwanza, naye akaweza kufahamu mara moja ukuu wa nafsi Yake.
Tafakari leo jinsi ulivyo huru kutokana na hila na unafiki. Je, wewe pia ni mtu mwenye uaminifu mkubwa, ukweli na uwazi? Je, wewe ni mtu wa kweli, asiyejifanya? Kuishi hivi ndiyo njia pekee njema ya kuishi. Ni maisha yanayoishiwa katika ukweli. Sali ili Mungu akusaidie kukua katika fadhila hii leo kwa maombezi ya Mtakatifu Bartolomayo.
Bwana, nisaidie nisiwe na unafiki wala hila. Nisaidie niwe mtu mwaminifu, mwadilifu na mnyofu. Nakushukuru kwa mfano aliotuwekea Mtakatifu Bartolomayo. Unijalie neema ninayohitaji ili kuiga fadhila zake. Yesu, nakutumainia.
Novena kwa Mtakatifu Monika
Agosti 18–26
Tafakari juu ya Huruma ya Mungu
Mtakatifu wa Siku – Mtakatifu Bartolomayo Mtume
Machaguo ya Masomo ya Misa Takatifu
