Februari 23, 2024
Ijumaa ya Juma la Kwanza la Kwaresima
Masomo ya Leo
Mtakatifu Polikarpo, Askofu na Shahidi – Kumbukumbu ya Hiari
Sikiliza kwa Kiingereza
“Patana upesi na mshtaki wako mkiwa njiani kwenda mahakamani. La sivyo, mshtaki wako atakukabidhi kwa hakimu, naye hakimu atakukabidhi kwa askari, nawe utatupwa gerezani. Amina, nakuambia, hutatoka humo mpaka utakapolipa senti ya mwisho.” Mathayo 5:26
Je, hapa Bwana wetu alikuwa akitoa ushauri wa kisheria kuhusu kesi ya jinai au ya madai na jinsi ya kuepuka kufikishwa mahakamani? Hakika sivyo. Alikuwa akitupatia taswira Yake mwenyewe kama Hakimu mwenye haki. Naye alikuwa akituhimiza kumwonyesha huruma kila mtu anayeweza kuonekana kuwa “mpinzani” wetu.
Kumsamehe mwingine ni jambo la lazima. Hatuwezi kamwe kumnyima mwingine msamaha. Lakini kwa kweli, hata msamaha peke yake hautoshi. Lengo la mwisho lazima liwe upatanisho, ambao unakwenda mbali zaidi. Katika Injili hii iliyo hapo juu, Yesu anatuhimiza “kupatana” na wapinzani wetu, akidokeza upatanisho kwa maneno hayo. Toleo la Biblia la RSV linasema hivi: “Fanya urafiki upesi na mshtaki wako…” Kujitahidi kukuza “urafiki” na mtu aliyekushtaki, hasa ikiwa shtaka hilo ni la uongo, ni jambo linalokwenda mbali zaidi kuliko kumsamehe tu.
Kupatana na mwingine na kuanzisha tena urafiki wa kweli kunamaanisha kwamba husamehi tu, bali pia unafanya yote uwezayo kuhakikisha kwamba unajenga upya uhusiano wa upendo na mtu huyo. Kunamaanisha kwamba nyote wawili mnaacha malalamiko yenu nyuma na kuanza upya. Bila shaka, hilo linahitaji watu wote wawili washirikiane kwa upendo; lakini, kwa upande wako, linamaanisha kwamba unajitahidi sana kufanikisha upatanisho huo.
Fikiria mtu aliyekuumiza, na ambaye uhusiano wako naye umeharibika kwa sababu hiyo. Je, umemsamehe mtu huyo mbele za Mungu katika sala? Je, umemwombea mtu huyo na kumwomba Mungu amsamehe? Ikiwa umefanya hivyo, basi sasa uko tayari kwa hatua inayofuata ya kumfikia kwa upendo ili kurekebisha uhusiano wenu. Hili linahitaji unyenyekevu mkubwa, hasa ikiwa huyo mwingine ndiye aliyesababisha maumivu hayo, na hasa ikiwa hajakuambia maneno ya majuto na kukuomba msamaha. Usisubiri afanye hivyo. Tafuta njia za kumwonyesha mtu huyo kwamba unampenda na unataka kuponya maumivu hayo. Usiendelee kumkumbusha dhambi yake wala kumwekea kinyongo. Tafuta upendo na huruma tu.
Yesu anamalizia himizo hili kwa maneno mazito. Kimsingi, ukishindwa kufanya yote uwezayo ili kupatana na kujenga upya uhusiano wenu, utawajibishwa kwa hilo. Ingawa mwanzoni jambo hili linaweza kuonekana kuwa lisilo la haki, ni wazi kwamba sivyo, kwa sababu huu ndio undani wa huruma ambayo Bwana wetu anatupatia kila siku. Hatutawahi kuwa na majuto ya kutosha kwa dhambi yetu, lakini Mungu hutusamehe na kupatana nasi hata hivyo. Ni neema iliyoje! Lakini tukishindwa kuwaonyesha wengine huruma hii hii, kimsingi tunauwekea mipaka uwezo wa Mungu wa kutuonyesha huruma hii, nasi tutatakiwa kulipa “senti ya mwisho” ya deni letu wenyewe kwa Mungu.
Tafakari leo kuhusu mtu anayekujia akilini ambaye unahitaji kupatana naye kikamilifu na kufufua uhusiano wa upendo. Omba neema hii, jitoe kuufanikisha upatanisho huo na utafute nafasi za kufanya hivyo. Fanya hivyo bila kusita, nawe hutajutia kamwe uamuzi wako.
Bwana wangu mwenye huruma kuu, nakushukuru kwa kunisamehe na kwa kunipenda kwa ukamilifu na kwa moyo Wako wote. Asante kwa kupatana nami licha ya majuto yangu yasiyo kamilifu. Ee Bwana mpendwa, nipe moyo unaotafuta daima kumpenda mwenye dhambi aliye katika maisha yangu. Nisaidie kuonyesha huruma kwa ukamilifu kadiri niwezavyo, nikiiga huruma Yako ya kimungu. Yesu, nakutumainia.
Tafakari za Siku ya Tisa:
Siku 40 Jangwani & Siku 40 Msalabani
Tafakari juu ya Huruma ya Mungu
Tafakari za Maandiko Matakatifu kwa Kipindi cha Kwaresima
Mtakatifu wa Siku – Mtakatifu Polikarpo, Askofu na Shahidi
Machaguo ya Masomo ya Misa Takatifu
_-_The_Return_of_the_Prodigal_Son_-_Google_Art_Project.jpg){kind=link}