மார்ச் 18, 2020
தவக்காலத்தின் மூன்றாம் வாரம் புதன்கிழமை
இன்றைய வாசகங்கள்
எருசலேம் நகர் புனித சிரில், ஆயரும் மறைவல்லுநரும்—விருப்ப நினைவு
இயேசு தம் சீடர்களிடம் கூறினார்: “திருச்சட்டத்தையோ இறைவாக்கினர்களையோ அழிக்க வந்தேன் என நீங்கள் எண்ண வேண்டாம். அவற்றை அழிக்க அல்ல, நிறைவேற்றவே வந்தேன்.” மத்தேயு 5:17
சில வேளைகளில் கடவுள் மெதுவாகச் செயலாற்றுவதுபோல் தோன்றுகிறது…மிக மெதுவாக. நம் வாழ்வில் கடவுள் செயலாற்றும் நேரத்திற்காகப் பொறுமையுடன் காத்திருப்பது நம் அனைவருக்குமே கடினமாக இருந்திருக்கலாம். எது சிறந்தது என்று நமக்கே தெரியும் என்றும், இன்னும் தீவிரமாகச் செபித்தால் கடவுளைச் செயல்பட வைக்க முடியும் என்றும், இறுதியில் அவர் நாம் செபித்துக் கேட்பதைச் செய்துவிடுவார் என்றும் நினைப்பது எளிது. ஆனால் கடவுள் செயலாற்றும் விதம் இதுவல்ல.
மேலே உள்ள மறைநூல் பகுதி கடவுளின் வழிகளைப் பற்றிய ஓரளவு புரிதலை நமக்குத் தர வேண்டும். அவை மெதுவானவை, உறுதியானவை, நிறைவானவை. இயேசு “திருச்சட்டத்தையும் இறைவாக்கினர்களையும்” குறிப்பிட்டு, அவற்றை அழிக்க அல்ல, நிறைவேற்றவே தாம் வந்ததாகக் கூறுகிறார். இது உண்மையே. ஆனால் இது எவ்வாறு நிகழ்ந்தது என்பதைக் கவனமாகப் பார்ப்பது பயனுள்ளது.
இது பல்லாயிரம் ஆண்டுகளாக நிகழ்ந்து வந்தது. கடவுளின் நிறைவான திட்டம் படிப்படியாக வெளிப்படுவதற்குக் காலம் தேவைப்பட்டது. ஆயினும், அவர் குறித்த நேரத்தில், அவரது வழியில் அது வெளிப்பட்டது. பழைய ஏற்பாட்டுக் காலத்தில் வாழ்ந்த அனைவரும் மெசியா வந்து அனைத்தையும் நிறைவேற்ற வேண்டும் என்று ஆவலுடன் காத்திருந்திருக்கலாம். ஆனால் இறைவாக்கினர்கள் ஒருவர் பின் ஒருவராக வந்து சென்றனர்; மெசியா எதிர்காலத்தில் வரவிருப்பதைத் தொடர்ந்து சுட்டிக்காட்டினர். பழைய ஏற்பாட்டுத் திருச்சட்டம்கூட மெசியாவின் வருகைக்காக இறைமக்களைத் தயாரிக்கும் ஒரு வழியாக இருந்தது. எனினும், திருச்சட்டத்தை உருவாக்குவதும், இஸ்ரயேல் மக்களுக்காக அதை நடைமுறைப்படுத்துவதும், அவர்கள் அதைப் புரிந்துகொள்ள உதவுவதும், பின்னர் அவர்கள் அதன்படி வாழத் தொடங்குவதும் மெதுவாக நடந்த ஒரு செயல்முறையாகவே இருந்தது.
இறுதியாக மெசியா வந்தபோதுகூட, பலர் தங்கள் உற்சாகத்திலும் ஆர்வத்திலும், அவர் அப்போதே அனைத்தையும் நிறைவேற்ற வேண்டுமென விரும்பினர். தங்களது இவ்வுலக அரசு நிறுவப்பட வேண்டுமென்றும், தாங்கள் புதிதாகக் கண்டுகொண்ட மெசியா தமது அரசின் ஆட்சிப் பொறுப்பை ஏற்க வேண்டுமென்றும் அவர்கள் விரும்பினர்!
ஆனால் கடவுளின் திட்டம் மனித ஞானத்திலிருந்து முற்றிலும் வேறுபட்டிருந்தது. அவரது வழிகள் நமது வழிகளைவிட மிகவும் மேலானவையாக இருந்தன. அவரது வழிகள் இன்றும் நமது வழிகளைவிட மிகவும் மேலானவையாகவே இருக்கின்றன! பழைய ஏற்பாட்டுத் திருச்சட்டத்திலும் இறைவாக்கினர்களின் உரைகளிலும் உள்ள ஒவ்வொன்றையும் இயேசு நிறைவேற்றினார்; ஆனால் பலர் எதிர்பார்த்த விதத்தில் அல்ல.
இது நமக்கு என்ன கற்றுத்தருகிறது? மிகுந்த பொறுமையைக் கற்றுத்தருகிறது. மேலும், நம்மை ஒப்படைத்தல், நம்பிக்கை, எதிர்நோக்கு ஆகியவற்றையும் கற்றுத்தருகிறது. நாம் தீவிரமாகவும் நன்றாகவும் செபிக்க விரும்பினால், சரியான முறையில் செபிக்க வேண்டும். சரியான முறையில் செபிப்பது என்பது, உமது திருவுளம் நிறைவேறுக! என்று இடைவிடாமல் செபிப்பதே. இதுவும் தொடக்கத்தில் கடினமாக இருக்கும். ஆனால், நம் வாழ்விற்கும், நாம் எதிர்கொள்ளும் ஒவ்வொரு போராட்டத்திற்கும் சூழ்நிலைக்கும் கடவுள் எப்போதும் நிறைவான ஒரு திட்டத்தை வைத்திருக்கிறார் என்பதை நாம் புரிந்துகொண்டு நம்பும்போது, இது எளிதாகிறது.
ஆண்டவரின் வழிகளில் நீங்கள் கொண்டுள்ள பொறுமையையும் நம்பிக்கையையும் பற்றி இன்று சிந்தியுங்கள். உங்கள் வாழ்விற்காக அவர் நிறைவான ஒரு திட்டத்தை வைத்திருக்கிறார்; அந்தத் திட்டம் பெரும்பாலும் உங்கள் திட்டத்திலிருந்து வேறுபட்டதாகவே இருக்கும். உங்களை அவரிடம் ஒப்படையுங்கள்; அனைத்திலும் அவரது திருவுளம் உங்களை வழிநடத்த இடமளியுங்கள்.
ஆண்டவரே, என் வாழ்வை உம்மிடம் ஒப்படைக்கிறேன். எனக்காகவும் உமது அன்பிற்குரிய பிள்ளைகள் அனைவருக்காகவும் நீர் நிறைவான திட்டத்தை வைத்திருக்கிறீர் என்று நம்புகிறேன். உமக்காகக் காத்திருக்கவும், என் வாழ்வில் உமது தெய்வீகத் திருவுளத்தை நீர் நிறைவேற்ற இடமளிக்கவும் எனக்குப் பொறுமையைத் தாரும். இயேசுவே, உம்மில் நம்பிக்கை வைக்கிறேன்!
சிலுவையடியில் 40 நாள்கள் – இருபத்தொன்றாம் சிந்தனை – சாட்டையடியும் ஏளனமும்
கொரோனா வைரஸ் பெருந்தொற்றை எதிர்கொள்ள ஓர் இறைவேண்டல்
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
