அக்டோபர் 23, 2020
பொதுக்காலம் இருபத்தொன்பதாம் வாரத்தின் வெள்ளிக்கிழமை
இன்றைய வாசகங்கள்
கப்பிஸ்திரானோ நகர் புனித யோவான், அருள்பணியாளர்—விருப்ப நினைவு
இயேசு மக்கள் கூட்டத்தினரிடம் கூறியது: “மேற்கில் மேகம் எழுவதைக் காணும்போது, மழை வரப்போகிறது என்று உடனே சொல்கிறீர்கள்; அவ்வாறே நடக்கிறது. தெற்கிலிருந்து காற்று வீசுவதை உணரும்போது, வெப்பம் உண்டாகும் என்று சொல்கிறீர்கள்; அவ்வாறே ஆகிறது. வெளிவேடக்காரரே! மண்ணின் தோற்றத்தையும் விண்ணின் தோற்றத்தையும் புரிந்துகொள்ள உங்களுக்குத் தெரிகிறது; இக்காலத்தைப் புரிந்துகொள்ள உங்களுக்கு ஏன் தெரியவில்லை?” லூக்கா 12:54-56
இக்காலத்தைப் புரிந்துகொள்ள உங்களுக்குத் தெரியுமா? கிறிஸ்துவைப் பின்பற்றுகிறவர்களாகிய நாம், நமது பண்பாடுகளையும் சமூகங்களையும் உலகம் முழுவதையும் நேர்மையுடன் நோக்கி, அவற்றை உண்மையாகவும் துல்லியமாகவும் புரிந்துகொள்வது முக்கியம். நமது உலகில் நிலவும் நன்மையையும் கடவுளின் உடனிருப்பையும் நாம் பகுத்தறிய வேண்டும். அதேவேளையில், இக்காலத்தில் தீயவன் எவ்வாறு செயல்படுகிறான் என்பதையும் கண்டறிந்து புரிந்துகொள்ள வேண்டும். இதை நீங்கள் எந்த அளவுக்குச் செய்கிறீர்கள்?
வஞ்சகமாகக் கையாள்வதும் பொய்களைப் பயன்படுத்துவதும் தீயவனின் சூழ்ச்சிகளில் ஒன்று. எண்ணற்ற வழிகளில் நம்மைக் குழப்புவதற்குத் தீயவன் முயல்கிறான். இந்தப் பொய்கள் ஊடகங்கள் வழியாகவும், நமது அரசியல் தலைவர்கள் வழியாகவும், சில வேளைகளில் சில சமயத் தலைவர்கள் வழியாகவும்கூட வரலாம். பிரிவினையும் எல்லா வகையான சீர்கேடுகளும் நிலவும்போது தீயவன் மகிழ்ச்சியடைகிறான்.
அப்படியானால், “இக்காலத்தைப் புரிந்துகொள்ள” நாம் என்ன செய்ய வேண்டும்? உண்மைக்கு நம்மை முழு மனத்துடன் அர்ப்பணிக்க வேண்டும். செபத்தின் வழியாக எல்லாவற்றிற்கும் மேலாக இயேசுவைத் தேட வேண்டும். நம் வாழ்வில் அவரது உடனிருப்பு, அவரிடமிருந்து வருவது எது, அவரிடமிருந்து வராதது எது என்று பிரித்தறிய நமக்கு உதவ அனுமதிக்க வேண்டும்.
நன்மை தீமை சார்ந்த எண்ணற்ற தெரிவுகளை நமது சமூகங்கள் நம்முன் வைக்கின்றன. அதனால், நாம் அங்குமிங்கும் இழுக்கப்படுவதை உணரலாம். நமது சிந்தனைகள் சவாலுக்கு உள்ளாவதையும், சில வேளைகளில் மனித வாழ்வின் மிக அடிப்படையான உண்மைகள்கூடத் தாக்கப்பட்டுத் திரித்துக் கூறப்படுவதையும் காணலாம். எடுத்துக்காட்டாக, கருக்கலைப்பு, கருணைக்கொலை, பாரம்பரியத் திருமணம் ஆகியவற்றைக் கருதுங்கள். இவை குறித்த நமது நம்பிக்கையின் அறநெறிப் போதனைகள், உலகின் பல்வேறு பண்பாடுகளில் தொடர்ந்து தாக்குதலுக்கு உள்ளாகின்றன. மனிதரின் மாண்பும், கடவுள் வகுத்தபடியான குடும்பத்தின் மாண்பும் கேள்விக்கு உள்ளாக்கப்பட்டு நேரடியாகச் சவால் செய்யப்படுகின்றன. இன்று நமது உலகில் நிலவும் குழப்பத்திற்கு மற்றோர் எடுத்துக்காட்டு பணத்தாசை. பலர் பொருட்செல்வத்தின் மீதான ஆசையில் சிக்கி, அதுவே மகிழ்ச்சிக்கான வழி என்ற பொய்யால் ஈர்க்கப்பட்டுள்ளனர். இக்காலத்தைப் புரிந்துகொள்வது என்பது, நம் காலத்தின் ஒவ்வொரு குழப்பத்தின் பின்னாலும் உள்ள உண்மையைத் தெளிவாகக் காண்பதாகும். பண்பாடு மற்றும் அறநெறி சார்ந்த தவறுகளை, அவை என்னவாக இருக்கின்றனவோ அவ்வாறே காண்பதாகும்.
நம்மைச் சுற்றிலும் மிக வெளிப்படையாக நிலவும் குழப்பத்தைத் தூய ஆவியார் அகற்றுவதற்கு அனுமதிக்க நீங்கள் விருப்பமும் திறனும் கொண்டிருக்கிறீர்களா என்பதை இன்று சிந்தித்துப் பாருங்கள். உண்மையின் ஆவியாராகிய தூய ஆவியார் உங்கள் உள்ளத்தில் ஊடுருவி, முழு உண்மையை நோக்கி உங்களை வழிநடத்த அனுமதிக்கத் தயாராக இருக்கிறீர்களா? ஒவ்வொரு நாளும் நம்மீது வீசப்படும் பல தவறுகளையும் குழப்பங்களையும் எதிர்கொண்டு நிலைத்திருக்க, இக்காலத்தில் உண்மையைத் தேடுவதே ஒரே வழி.
ஆண்டவரே, இக்காலத்தைப் புரிந்துகொள்ளவும், நம்மைச் சுற்றிலும் வளர்க்கப்படும் தவறுகளையும், பல வழிகளில் வெளிப்படும் உமது நன்மைத்தனத்தையும் காணவும் எனக்கு உதவியருளும். தீமையானதை நான் புறக்கணித்து, உம்மிடமிருந்து வருவதைத் தேடுவதற்குத் துணிவும் ஞானமும் எனக்குத் தந்தருளும். இயேசுவே, உம்மீது நம்பிக்கை வைக்கிறேன்.
அமெரிக்கத் தேர்தல்களுக்கான செபங்கள் & துணை வளங்கள்
அனைத்துப் புனிதர்கள்/திருவிழாக்கள்
இன்றைய புனிதர் – கப்பிஸ்திரானோ நகர் புனித யோவான், அருள்பணியாளர்
திருப்பலி வாசிப்புகளுக்கான தெரிவுகள்
படம்: மலையில் போதிக்கும் இயேசு, குஸ்தாவ் டோரே வரைந்தது
