புதன்கிழமை, மார்ச் 2, 2022
திருநீற்றுப் புதன்
ஆண்டவரே, நாங்கள் பாவம் செய்தோம்; எங்களுக்கு இரங்கும். (காண்க திருப்பாடல் 51)
இரக்கம். எல்லாவற்றின் மையமும் இதுவே. தவக்காலத்தைத் தொடங்கும் நாம், இரக்கத்தை இன்னும் நன்றாகப் புரிந்துகொள்வதிலிருந்து தொடங்குவது மிகவும் நல்லது.
தவக்காலத்தைப் பற்றி நினைக்கும்போது, பல நேரங்களில் ஒருவித அச்சத்துடனேயே அதை நினைக்கிறோம். “நான் எதையாவது விட்டுக்கொடுக்க வேண்டுமே” என்று அடிக்கடி எண்ணுகிறோம். ஆனால், நம் எண்ணம் இதுவாக இருந்தால், அதன் உண்மையான நோக்கத்தை நாம் தவறவிடுகிறோம். நான் எதையாவது விட்டுக்கொடுத்தே “ஆக வேண்டுமா”? இதற்கு ஆம் என்றும் இல்லை என்றும் சொல்லலாம். கடவுள் இதை விரும்புகிறார் என்பதும், தன்னொறுப்பு மற்றும் சுயக்கட்டுப்பாடு என்னும் இந்தப் பயிற்சியைப் பற்றித் தமது திருஅவை வழியாக நம்மிடம் பேசியுள்ளார் என்பதும் உண்மையே. அது உண்மைதான். ஆனால், இது ஒரு சுமையைத் திணிப்பதைவிட, அருளைப் பெறுவதற்கான அழைப்பாகவே இருக்கிறது.
எதையாவது விட்டுக்கொடுப்பதன் உண்மையான நோக்கம், கடவுளின் அளவற்ற இரக்கத்தில் இன்னும் ஆழமாக நுழைவதே. நம்மைப் பிணைத்திருக்கும் அனைத்திலிருந்தும் விடுதலை பெறுவதே இதன் நோக்கம். நாம் ஆழ்ந்து தேடும் புதிய வாழ்வை அனுபவிக்கவும் இது உதவுகிறது. எதையாவது விட்டுக்கொடுப்பது என்பது, ஓர் உணவையோ பானத்தையோ தவிர்ப்பது போன்ற எளிய செயலாக இருக்கலாம். அல்லது, ஓரளவு தன்னொறுப்பை வேண்டிநிற்கும், மனமுவந்து செய்யும் எந்தச் செயலாகவும் இருக்கலாம். ஆனால், இது நல்லதே! ஏன்? ஏனெனில், இது நம் ஆன்மாவையும் மன உறுதியையும் வலுப்படுத்துகிறது. கடவுளுக்கு முழுமையாக “ஆம்” என்று சொல்வதில் இன்னும் உறுதியாக இருக்க இது நம்மை வலுப்படுத்துகிறது.
வாழ்வில் பல நேரங்களில் நம் உணர்ச்சிகளும் ஆசைகளும் நம்மைக் கட்டுப்படுத்துகின்றன. இதுவோ அதுவோ வேண்டும், இதையோ அதையோ செய்ய வேண்டும் என்ற உந்துதல் நமக்கு ஏற்படுகிறது. பல நேரங்களில் அந்த உந்துதல்களோ ஆசைகளோ நம்மைக் கட்டுப்படுத்த நாம் அனுமதிக்கிறோம். தன்னொறுப்பைப் பழகத் தொடங்குவது, நமது சீரற்ற நாட்டங்களால் கட்டுப்படுத்தப்படுவதற்குப் பதிலாக, அவற்றை நாம் கட்டுப்படுத்தும் வலிமையைப் பெற உதவுகிறது. இது உணவுக்கும் பானத்துக்கும் மட்டுமல்ல, இன்னும் பலவற்றுக்கும் பொருந்தும். நமது நற்பண்பு வாழ்வு, குறிப்பாக நமது பிறரன்பு உட்பட, வாழ்வின் பல அம்சங்களுக்கும் இது பொருந்தும்.
இரக்கத்தின் மையம் அன்பே. நாம் எவ்வாறு அன்பு செய்ய வேண்டுமெனக் கடவுள் விரும்புகிறாரோ, அவ்வாறு அன்பு செய்வதே இரக்கம். அன்பு நம்மை முழுவதும் ஆட்கொண்டு வழிநடத்தத் தடையின்றி இடமளிப்பதே அது. இறுதியில், அன்பு செய்வது ஒன்றே நம் விருப்பமாக இருக்கும். இத்தகைய பழக்கத்தை நம் வாழ்வில் வளர்த்துக்கொள்வது கடினமாக இருக்கலாம். ஆனால், அதுவே நம் மகிழ்ச்சிக்கும் நிறைவுக்கும் ஊற்றாக இருக்கிறது.
குறிப்பாக, இரக்கம் என்பது ஒரு வகையில் அதைப் பெறத் தகுதியில்லாத ஒருவருக்குச் செய்யப்படும் அன்புச் செயலாகும். அன்பை மட்டுமே உந்துதலாகக் கொண்டு தாராளமாக வழங்கப்படும் கொடை அது. கடவுள் நமக்கு அளிக்கும் அன்பும் இதுவே. கடவுளின் அன்பு முழுவதும் இரக்கமே. அந்த இரக்கத்தை நாம் பெற விரும்பினால், நாமும் அதைப் பிறருக்கு வழங்க வேண்டும். அதை வழங்க விரும்பினால், இரக்கம் காட்டுவதற்கு ஏற்றவாறு நம்மைத் தயார்படுத்திக்கொள்ள வேண்டும். நமது சிறிய தன்னொறுப்புச் செயல்களும் இதற்கு ஓரளவு உதவுகின்றன.
எனவே, இந்தத் தவக்காலத்தைச் சிறப்பானதாக்குங்கள். ஆனால், தவக்காலத் தியாகங்கள் சுமையானவை என்ற எண்ணத்திலேயே நின்றுவிடாதீர்கள். கடவுள் நமக்கு வழங்க விரும்பும் வாழ்வை நோக்கிச் செல்லும் பாதையில் அவை இன்றியமையாத ஓர் அங்கமாக இருக்கின்றன.
தம்மையே பலியாக அளிக்கும் என் ஆண்டவரே, இந்தத் தவக்காலம் என் வாழ்வில் உண்மையிலேயே கனிதருவதாக. நீர் எனக்கு வழங்க விரும்பும் அனைத்தையும் ஏற்றுக்கொள்வது எனக்கு அருளும் மகிழ்ச்சியும் ஆக இருப்பதாக. இயேசுவே, நான் உம்மீது நம்பிக்கை வைக்கிறேன்.
(முதல் சிந்தனை சனிக்கிழமை தொடங்குகிறது)
இன்றைய புனிதர்கள்/திருவிழாக்கள்
தவக்காலத்திற்கான திருவிவிலியத் தியானங்கள்
திருப்பலி வாசிப்புகளுக்கான தெரிவுகள்
தவக்காலத்திற்கான இரு சிறந்த நூல்கள்:
தவக்கால மற்றும் உயிர்ப்புக்காலச் சிந்தனைகள்
கூடுதல் சிந்தனைகளுடனும் மேலும் விரிவான பொருளடக்கத்துடனும் 2022 தவக்காலம் & உயிர்ப்புக்காலத்திற்காகப் புதுப்பிக்கப்பட்டது
தவக்கால மற்றும் உயிர்ப்புக்காலச் சிந்தனைகள் என்பது கத்தோலிக்க அன்றாடச் சிந்தனைகள் நூல்வரிசையில். உள்ள நான்கு நூல்களில் ஒன்றாகும். அன்றைய நற்செய்தியைப் பற்றிய சிந்தனைகளை நடைமுறைக்கு ஏற்ற வகையிலும், விசுவாசத்திற்கு உண்மையாயும், எளிய வாழ்க்கையோடு தொடர்புடைய முறையிலும் வழங்கும் இந்த இறைபக்தி நூல், அன்றாடத் தியானத்திற்கும் இறைவேண்டலுக்கும் ஒரு சிறந்த துணையாகும். ஞாயிறு ஆண்டுகளான A, B & C, அன்றாடத் திருப்பலிகளுக்கான அனைத்து நற்செய்தித் தேர்வுகள், எல்லா விழாக்கள் மற்றும் பெருவிழாக்கள் உட்பட, தேர்ந்தெடுக்கக்கூடிய ஒவ்வொரு நற்செய்திப் பகுதிக்கும் சிந்தனைகளை வழங்குவதால், எந்தத் திருவழிபாட்டு ஆண்டிலும் பயன்படுத்தக்கூடிய வகையில் இது அமைக்கப்பட்டுள்ளது. இந்தத் தவக்காலத்திலும் உயிர்ப்புக்காலத்திலும் கிறிஸ்துவின் இறப்பும் உயிர்ப்பும் உங்கள் இதயத்தை இன்னும் முழுமையாக மாற்றியமைக்க இடமளியுங்கள்! இது மென் அட்டை நூல் & மின்னூல் வடிவங்களிலும் கிடைக்கிறது!
சிலுவையடியில் 40 நாட்கள்:
நம் புனித அன்னையின் இதயத்திலிருந்து ஓர் அன்புப் பார்வை
நம் புனித அன்னை தம் அன்பு மகனுக்கு இழைக்கப்பட்ட பெரும் துன்பத்தைத் தாங்கியபோது, அவரது உள்ளத்திலும் இதயத்திலும் நிலவியவற்றை இறைவேண்டலுடன் தியானிக்க இந்த அன்றாட ஆன்மிக வழிகாட்டி உங்களை அழைக்கிறது. அன்னை மரியா முழுமையான நம்பிக்கையோடும் அன்போடும் பக்தியோடும் தம் மகனின் சிலுவையை எதிர்கொண்டார். தம் மகனின் வாழ்நாள் முழுவதும் அவர் காட்டிய உண்மைப்பற்று அசைக்க முடியாததாக இருந்தது. நீண்ட அந்த மூன்று மணி நேரமும் சிலுவையின் முன் அவர் நின்றபோது, அந்த உண்மைப்பற்று ஒருபோதும் தளரவில்லை.
