கடவுளின் இரக்கத்தைத் தடையின்றி வெளிப்படச் செய்தல்

செப்டம்பர் 12, 2022
பொதுக்காலத்தின் இருபத்து நான்காம் வாரம் திங்கள்
இன்றைய வாசகங்கள்

பேறுபெற்ற கன்னி மரியாவின் திருப்பெயர்—விருப்ப நினைவு

காணொளி

“ஆண்டவரே, நீர் சிரமப்பட வேண்டாம்; ஏனெனில் நீர் என் இல்லத்திற்குள் வர நான் தகுதியற்றவன்.”  லூக்கா 7:6b

இந்த வார்த்தைகளைச் சொல்பவர் செல்வந்தரான ஓர் உரோமை நூற்றுவர் தலைவர். அவரது பணியாளர் நோயுற்றிருந்தார்; இயேசு வந்து அந்தப் பணியாளரைக் குணமாக்குமாறு கேட்கத் தூதர்கள் அனுப்பப்பட்டனர்.  எனினும், இயேசுவின் முன் தனது தகுதியின்மையை இந்த நூற்றுவர் தலைவர் ஆழமாக உணர்ந்தார்.  இயேசு வந்துகொண்டிருந்தபோது, அவரைத் தாழ்ச்சியுடன் வரவேற்று, தனது தகுதியின்மையை அறிக்கையிடவும், இயேசு தொலைவிலிருந்தே தனது பணியாளரைக் குணமாக்க முடியும் என்ற தனது நம்பிக்கையை வெளிப்படுத்தவும் நூற்றுவர் தலைவர் தம் நண்பர்களை அனுப்பினார்.  “நான் உங்களுக்குச் சொல்கிறேன், இஸ்ரயேலில்கூட இத்தகைய நம்பிக்கையை நான் கண்டதில்லை” (லூக்கா 7:9) என்று எல்லார் முன்னிலையிலும் கூறிய பின், இயேசு அவ்வாறே செய்கிறார்.

தாழ்ச்சி, நம்பிக்கை, இரக்கம் ஆகியவை ஒன்றோடொன்று பின்னிப்பிணைந்துள்ளன என்பது இப்பகுதி வெளிப்படுத்தும் ஓர் ஆழமான உண்மை.  இயேசுவின் மேன்மையையும் தனது தகுதியின்மையையும் பற்றிய உண்மையை நூற்றுவர் தலைவர் தாழ்ச்சியுடன் அறிந்திருந்தார்.  அந்த உண்மையை அவர் தாழ்ச்சியுடன் அறிக்கையிட்டது, அவரது ஆழ்ந்த நம்பிக்கையின் செயலாக இருந்தது.  அதன் விளைவாக, நூற்றுவர் தலைவர் மீதும் அவரது பணியாளர் மீதும் இரக்கம் பொழியப்பட்டது.

இந்த நூற்றுவர் தலைவர் நமக்குத் தந்த முன்மாதிரி வலிமை வாய்ந்தது.  நமது இறைவேண்டல் வாழ்வில், கடவுளின் அருளைப் பெற நமக்கு உரிமை இருப்பதுபோல அடிக்கடி வேண்டுகிறோம்.  இது மிகப் பெரிய தவறு.  நம் ஆண்டவரிடமிருந்து எதையும் பெற நமக்கு உரிமை இல்லை என்பதைப் புரிந்துகொண்டு, இந்த நூற்றுவர் தலைவரின் முன்மாதிரியைப் பின்பற்ற முயல வேண்டும்.  தாழ்ச்சியுடன் இதை ஏற்றுக்கொள்வதே கடவுளின் நிறைவான இரக்கத்தைப் பெறுவதற்குத் தேவையான அடித்தளம்.  இரக்கம் என்பது ஒரு கொடை; உரிமை அல்ல.  ஆனால் நற்செய்தி என்னவெனில், அந்தக் கொடையைப் பொழிய வேண்டும் என்ற ஆவலால் கடவுளின் இதயம் பற்றி எரிகிறது.  இரக்கம் என்பது நமக்கு எந்த உரிமையும் இல்லாத, முற்றிலும் இலவசமான ஒரு கொடை என்பதை ஏற்றுக்கொள்வது, அதன் ஆற்றல் நம் வாழ்வில் தடையின்றிச் செயல்பட வழிவகுக்கிறது.  தாழ்ச்சிக்குரிய இந்த உண்மையைப் புரிந்துகொள்வது, கடவுளின் இரக்கத்தில் நமக்குள்ள நம்பிக்கையை அறிக்கையிடுவதாகும்; அது அவரது இதயத்தை மிகுந்த மகிழ்ச்சியால் நிரப்புகிறது.

நூற்றுவர் தலைவரின் ஊக்கமளிக்கும் அந்த வார்த்தைகளை இன்று சிந்தித்துப் பாருங்கள்.  “ஆண்டவரே, நான் தகுதியற்றவன்…”  அவற்றை மீண்டும் மீண்டும் சொல்லி, நம் ஆண்டவரோடு உங்களுக்குள்ள உறவின் அடித்தளமாக அவை அமைய இடமளியுங்கள்.  இந்தத் தாழ்ச்சியில் நீங்கள் நிறைவாக ஆசீர்வதிக்கப்படுவீர்கள்.

மிகுந்த இரக்கமுள்ள ஆண்டவரே, நீர் என்னிடம் வருவதற்கு நான் தகுதியற்றவன்.  நற்கருணை உட்கொள்ளும் விலைமதிப்பற்ற கொடையைப் பெறவோ, என் வாழ்வில் உமது இரக்கத்தைப் பெறவோ நான் தகுதியற்றவன்.  ஆண்டவரே, நீர் தரும் அனைத்தும் உமது எல்லையற்ற இரக்கத்தின் கொடை என்பதை நான் தொடர்ந்து உணர்ந்துகொள்ள எனக்கு உதவியருளும்.  அன்புள்ள ஆண்டவரே, உமக்கு நன்றி கூறுகிறேன்.  இயேசுவே, உம்மில் நம்பிக்கை வைக்கிறேன்.

வியாகுல அன்னைக்கு நவநாள் செபம்
மரபுப்படி செபிக்கப்படும் நாட்கள்: செப்டம்பர் 7–15
ஆறாம் நாள்—செப்டம்பர் 12

மேலும் நற்செய்திச் சிந்தனைகள்

இறை இரக்கச் சிந்தனைகள்

அனைத்துப் புனிதர்கள்/திருவிழாக்கள்

இன்றைய புனிதர் – தூய கன்னி மரியாவின் திருப்பெயர்

திருப்பலி வாசிப்புகளுக்கான தெரிவுகள்

சிறப்புப் படம்: இயேசுவும் நூற்றுவர் தலைவரும் வரைந்தவர்: பாவ்லோ வெரோனேசே, விக்கிமீடியா காமன்ஸ் வழியாக