ஜூலை 19, 2023
பொதுக்காலம் பதினைந்தாம் வாரம் புதன்கிழமை
இன்றைய வாசகங்கள்
அவ்வேளையில் இயேசு உரக்கக் கூறினார்: “விண்ணுக்கும் மண்ணுக்கும் ஆண்டவராகிய தந்தையே, இவற்றை ஞானிகளுக்கும் கற்றறிந்தவர்களுக்கும் மறைத்திருந்தாலும், குழந்தை மனம் கொண்டவர்களுக்கு வெளிப்படுத்தியதற்காக உம்மைப் போற்றுகிறேன்.” மத்தேயு 11:25
இதற்கு முந்தைய பகுதியில், கொராசின், பெத்சாய்தா, கப்பர்நாகூம் ஆகிய நகரத்தினர் மனம் மாறி தம்மை நம்பாததற்காக இயேசு அவர்களைக் கடிந்துகொண்டார். அந்தப் பகுதிக்கும் இந்தப் பகுதிக்கும் இடையே தெளிவான வேறுபாடு உள்ளது. அவ்வாறு கடிந்துகொண்ட உடனேயே, இயேசு விண்ணகத்தை நோக்கித் தம் கண்களை உயர்த்தி, விண்ணரசின் மறைந்திருக்கும் மறைபொருள்களைக் “குழந்தை உள்ளம் கொண்டவர்களுக்கு” வெளிப்படுத்தியதற்காகத் தந்தையைப் புகழ்ந்தார்.
தூய்மையான, குழந்தை உள்ளத்தோடு கூடிய விசுவாசத்திற்கு நேரிடும் மிகப்பெரிய அச்சுறுத்தல்களில் ஒன்று அறிவுச் செருக்கு. தங்களை “ஞானிகளும் அறிஞர்களும்” எனக் கருதுவோர், வாழ்க்கையில் முடிவுகளை எடுப்பதற்கும் நம்பிக்கைகளை உருவாக்கிக்கொள்வதற்கும் தங்களுடைய பகுத்தறிவுத் திறன்களை மட்டுமே சார்ந்திருக்க அடிக்கடி தூண்டப்படுகின்றனர். இதில் உள்ள சிக்கல் என்னவென்றால், நம் விசுவாசம் சார்ந்த உண்மைகள் முழுமையாகப் பகுத்தறிவுக்கு ஏற்றவையாக இருந்தாலும், மனிதப் பகுத்தறிவு மட்டுமே எட்டக்கூடிய முடிவுகளை அவை கடந்திருக்கின்றன. நம்மால் தன்னந்தனியாகக் கடவுளை அறிந்துகொள்ள முடியாது. அதற்கு விசுவாசக் கொடை நமக்குத் தேவை. கடவுள் தாம் யார் என்பதையும் எது உண்மை என்பதையும் நமக்கு வெளிப்படுத்தும் ஆன்மிகத் தொடர்பிலிருந்தே விசுவாசக் கொடை தொடங்குகிறது. குழந்தை உள்ளம் கொண்டவர்களால், அதாவது தாழ்ச்சியுள்ளவர்களால் மட்டுமே, கடவுளிடமிருந்து வரும் இத்தகைய தொடர்புக்குச் செவிமடுத்துப் பதிலளிக்க முடியும்.
இத்தகைய தாழ்மையான விசுவாசத்தில் இயேசு ஆழ்ந்த மகிழ்ச்சி அடைகிறார் என்பதையும் இப்பகுதி நமக்கு வெளிப்படுத்துகிறது. இத்தகைய விசுவாசத்தைக் காண்பதற்காக அவர் விண்ணகத் தந்தையைப் “புகழ்கிறார்”; ஏனெனில் இத்தகைய விசுவாசம் தந்தையிடமிருந்தே தோன்றுகிறது என்பதை இயேசு அறிவார்.
உங்கள் வாழ்க்கையில், நீங்கள் ஞானிகளையும் அறிஞர்களையும் அதிகம் ஒத்திருக்கிறீர்களா, அல்லது குழந்தை உள்ளம் கொண்டவர்களை ஒத்திருக்கிறீர்களா என்பதைத் தொடர்ந்து சிந்தித்துப் பார்ப்பது முக்கியம். கடவுள் எல்லையற்றவரும் நம் புரிதலுக்கு எட்டாத மறைபொருளுமானவர் என்றாலும், நாம் அவரை அறிந்துகொள்ள வேண்டும். அவர் தம்மை நமக்கு வெளிப்படுத்தினால் மட்டுமே நாம் அவரை அறிந்துகொள்ள முடியும். நாம் தாழ்ச்சியோடும் குழந்தை உள்ளத்தோடும் இருந்தால் மட்டுமே கடவுள் தம்மை நமக்கு வெளிப்படுத்துவார்.
நாம் குழந்தை உள்ளத்தோடு கூடிய விசுவாசத்தை அடையும்போது, தம்மைப் பின்பற்றியவர்களின் வாழ்வில் கண்ட விசுவாசத்திற்காக இயேசு தந்தையைப் புகழ்ந்ததை நாமும் பின்பற்ற வேண்டும். விசுவாசக் கொடையால் கடவுளைப் பற்றிய இந்தத் தூய அறிவைத் தெளிவாக வெளிப்படுத்துவோர்மீது நாமும் நம் பார்வையைச் செலுத்த வேண்டும். இந்த விசுவாசம் வாழ்வில் வெளிப்படுவதைக் காணும்போது, நாம் மகிழ்ந்து தந்தையைப் புகழ வேண்டும். பிறரிடம் விசுவாசம் உயிர்ப்புடன் இருப்பதைக் காணும்போது மட்டுமல்ல, நம் சொந்த ஆன்மாவிலும் விசுவாசக் கொடை வளர்வதைக் காணும்போதும் நாம் இவ்வாறு புகழ வேண்டும். நமக்குள் கடவுள் ஆற்றும் செயல்களைக் குறித்து ஒரு புனித வியப்புணர்வை நாம் வளர்த்துக்கொள்ள வேண்டும்; அந்த அனுபவத்தில் நாம் மகிழ வேண்டும்.
தம்மைப் பின்பற்றுவோரின் இதயங்களில் விசுவாசம் பிறப்பதைக் கண்டு இயேசு தந்தையைப் புகழ்வதை இன்று சிந்தித்துப் பாருங்கள். இயேசு உங்களைப் பார்க்கும்போது என்ன செய்கிறார்? உங்களைக் கடிந்துகொள்கிறாரா? அல்லது, தாம் காண்பதைக் குறித்து அவருடைய திரு இதயம் மகிழ்ந்து புகழ்கிறதா? கடவுளை உண்மையாக அறிந்து அன்புசெய்யும் குழந்தை உள்ளம் கொண்டவர்களுள் நீங்களும் ஒருவராக எண்ணப்படுமளவுக்கு உங்களைத் தாழ்த்திக்கொள்வதன் மூலம் கிறிஸ்துவின் இதயத்திற்கு மகிழ்ச்சி அளியுங்கள்.
மகிழ்ச்சியில் திளைக்கும் என் ஆண்டவரே, ஒவ்வொரு மனித இதயத்திலும் அருள் செயலாற்றுவதை நீர் கவனித்துக்கொண்டிருக்கிறீர். உம் பிள்ளைகளிடம் தந்தையின் குரல் பேசுவதை நீர் காணும்போது, அதைக் கண்டு மகிழ்கிறீர். அன்பு ஆண்டவரே, என் இதயமும் உமது மகிழ்ச்சிக்கும், நீர் விண்ணகத் தந்தையைப் புகழ்வதற்கும் காரணமாக அமைய வேண்டுமென்று மன்றாடுகிறேன். என்னோடு பேசி, என் முழு இதயத்தோடும் நம்புவதற்கு எனக்கு உதவியருளும். இயேசுவே, நான் உம்மில் நம்பிக்கை வைக்கிறேன்.
பொதுக்காலத்திற்கான இறைவார்த்தைத் தியானங்கள்
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
_-_James_Tissot_-_overall.jpg){kind=link}