செப்டம்பர் 25, 2023
பொதுக்காலத்தின் இருபத்தைந்தாம் வாரம் திங்கள்
இன்றைய வாசகங்கள்
“ஆகவே, நீங்கள் எவ்வாறு கேட்கிறீர்கள் என்பதில் கவனமாயிருங்கள். உள்ளவர் எவருக்கும் இன்னும் அதிகமாகக் கொடுக்கப்படும்; இல்லாதவரிடமிருந்தோ, தமக்கு இருப்பதாக அவர் நினைப்பதும் எடுத்துக்கொள்ளப்படும்.” லூக்கா 8:18
உங்களிடம் அதிகமாக இருக்கிறதா? அல்லது சிறிதளவே இருக்கிறதா? இயேசுவின் வார்த்தைகளின்படி, உங்களிடம் அதிகமாக இருந்தால், இன்னும் மிகுதியாகப் பெறுவீர்கள்; ஆனால் சிறிதளவே இருந்தால், உங்களிடம் இருப்பதையும் இழந்துவிடுவீர்கள். இது நியாயமாகத் தோன்றுகிறதா?
நிச்சயமாக, நம் ஆண்டவர் உலகப் பொருள்களைப் பற்றிப் பேசவில்லை. உங்களிடம் அதிகப் பணம் இருந்தால் இன்னும் அதிகமாகச் சேரும் என்றோ, நீங்கள் ஏழையாக இருந்தால் இன்னும் ஏழையாவீர்கள் என்றோ அவர் கூறவில்லை. மாறாக, தமது திருவார்த்தையைப் புரிந்துகொள்வதால் கிடைக்கும் அருளைப் பற்றியே இயேசு பேசுகிறார். மேலுள்ள பகுதி, “ஆகவே, நீங்கள் எவ்வாறு கேட்கிறீர்கள் என்பதில் கவனமாயிருங்கள்” என்று தொடங்குவதைக் கவனியுங்கள்.
இறைவார்த்தையைக் “கேட்பது” என்பது இயேசு கற்பிப்பதை நீங்கள் உண்மையாகவே ஏற்றுக்கொள்வதைக் குறிக்கிறது. கேட்பது என்பது சொல்லப்படும் வார்த்தைகளைக் காதுகளால் கேட்பது மட்டுமல்ல. தொடக்கத் திருச்சபைத் தந்தையருள் ஒருவரான புனித பீட் விளக்குவதுபோல், இறைவார்த்தையை நம் மனத்தால் உண்மையாகக் கேட்பது, அந்த வார்த்தையை நேசிக்க நம்மை வழிநடத்துகிறது; அந்த வார்த்தையை நேசிப்பது அதைப் புரிந்துகொள்ள வழிவகுக்கிறது. இயேசு கற்பிக்கும் அனைத்தையும் புரிந்துகொள்வதற்கு நமது இயல்பான திறன்களே முதன்மையான வழி என்பதுபோல், அறிவுப் பயிற்சியால் மட்டுமே இது நிகழ்வதில்லை. மாறாக, அனைத்தையும் நமக்குக் கற்பிக்கும் தூய ஆவியாரின் இயற்கைக்கு மேற்பட்ட கொடையால் கிடைக்கும் ஆன்மிக உள்ளுணர்வின் வழியாகவே இது நிகழ்கிறது.
இறைவனின் மறைபொருள்களை “இன்னும் அதிகமாகப்” புரிந்துகொள்ள நீங்கள் விரும்பினால், திருவிவிலியத்தை மனம் ஊன்றிப் படிப்பதில் உங்களை ஈடுபடுத்திக்கொள்ளுங்கள். திருவிவிலியத்தை வாசியுங்கள், அதைச் சிந்தித்துப் பாருங்கள், அதை மையமாகக் கொண்டு செபியுங்கள். இறைவார்த்தை உயிருள்ள வார்த்தை என்பதை நாம் எளிதில் மறந்துவிடலாம். இதன் பொருள் என்னவென்றால், செப உணர்வுடன் திருவிவிலியத்தில் நாம் ஆழ்ந்திருக்கும்போது, இறைவனையே செபத்தில் சந்திக்கிறோம் என்பதாகும். இறைவன் தமது திருவார்த்தையில் உயிருடன் இருக்கிறார். நாம் அவரைத் தனிப்பட்ட முறையில் சந்திக்கிறோம்; ஒரு சிறப்பு அருளால் மட்டுமே இது நிகழ்கிறது. அந்த அருளைப் பெற நாம் திறந்த மனத்துடன் இருக்க வேண்டும்.
இயேசுவின் இந்தப் போதனையில் உள்ள அழகான அம்சம் இதுவே: இந்த அருளால் அவரது வார்த்தையை நாம் எந்த அளவுக்கு அதிகமாகப் புரிந்துகொள்கிறோமோ, அந்த அளவுக்கு அதில் இன்னும் ஆழ்ந்து ஈடுபடுவோம்; அதுவும் நமக்குள் தொடர்ந்து வளரும். ஆனால், செபத்தில் இறைவார்த்தையுடன் உறவாட நாம் மிகக் குறைந்த நேரமே ஒதுக்கினால், இறைஞானத்தின் ஆன்மிக ஆழங்களை நாம் ஒருவிதத்தில் “மறக்கத்” தொடங்குவோம். நம்மிடம் இருக்கும் சிறிதளவு புரிதலையும் இழந்துவிடுவோம். இவ்வாறு நிகழும்போது, நம் உலகில் நிலவும் பல குழப்பங்களிலும் வஞ்சனைகளிலும் ஈடுபடவும் அவற்றை ஏற்றுக்கொள்ளவும் நாம் எளிதில் சாய்ந்துவிடுவோம்.
திருவிவிலியத்தைச் செப உணர்வுடன் தியானிக்கும் உங்கள் வழக்கத்தைப் பற்றி இன்று சிந்தியுங்கள். தற்போது இது உங்கள் வழக்கமாக இல்லாவிட்டால், இதை வழக்கமாக்கிக்கொள்ளத் தீர்மானியுங்கள். நற்செய்தி நூல்களில் ஒன்றிலிருந்து தொடங்கி, ஒவ்வொரு நாளும் சிறிது சிறிதாகச் செப உணர்வுடன் அதை வாசிக்க உறுதிகொள்ளலாம். திருவிவிலிய நூல்களை வாசித்து முடிப்பது நோக்கமல்ல. ஒவ்வொரு நூலுக்குள்ளும் ஆழ்ந்து செல்வதே நோக்கம். ஒவ்வோர் அதிகாரமும் ஒவ்வொரு வரியும் ஆன்மிக உள்ளுணர்வையும் புரிதலையும் ஆழமாக நமக்கு அளிக்கின்றன; அவை நமக்குக் கொடுக்கப்படவும் நம்மால் பெற்றுக்கொள்ளப்படவும் காத்திருக்கின்றன. இந்தப் புனிதமான பழக்கத்தில் உங்களை ஈடுபடுத்திக்கொள்ளுங்கள்; நம் ஆண்டவர் உங்களுக்கு வழங்கும் ஆன்மிகச் செல்வங்களைக் கண்டு நீங்கள் வியப்படைவீர்கள்.
இறைவனின் உயிருள்ள வார்த்தையே, என் ஆண்டவரே, என் அரசரே, எழுதப்பட்ட உமது வார்த்தையின் வழியாக என்னிடமும் உமது பிள்ளைகள் அனைவரிடமும் நீர் வருவதற்காக உமக்கு நன்றி கூறுகிறேன். அந்த வார்த்தையில் வெளிப்படுத்தப்பட்டுள்ள ஆழமான உண்மைகளில் நாள்தோறும் என் மனத்தை ஈடுபடுத்தும்படி, அதன் மீதான அன்பால் என்னை நிரப்பியருளும். அன்பு ஆண்டவரே, நான் உம்மைச் சந்தித்து, நீர் யார் என்பதையும் எனக்கு எதை வெளிப்படுத்த விரும்புகிறீர் என்பதையும் மேலும் மேலும் புரிந்துகொள்வேனாக. இயேசுவே, நான் உம்மில் நம்பிக்கை வைக்கிறேன்.
லிசியே நகர் புனித தெரேசாவுக்கு நவநாள் செபம்: செப்டம்பர் 22-30
நான்காம் நாள்- செப்டம்பர் 25
பொதுக்காலத்திற்கான இறைவார்த்தைத் தியானங்கள்
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
மேலே இடம்பெற்றுள்ள சிறப்புப் படம்: Pixabay தளத்திலிருந்து Thomas B. வழங்கியது
