பிப்ரவரி 1, 2024
பொதுக்காலத்தின் நான்காம் வார வியாழன்
இன்றைய வாசகங்கள்
இயேசு பன்னிருவரையும் அழைத்து, அவர்களை இருவர் இருவராக அனுப்பத் தொடங்கினார்; தீய ஆவிகள்மீது அவர்களுக்கு அதிகாரம் அளித்தார். பயணத்திற்குக் கைத்தடி ஒன்றைத் தவிர எதையும் எடுத்துச் செல்ல வேண்டாம் என்றும், உணவோ பையோ இடைக்கச்சையில் பணமோ எடுத்துச் செல்ல வேண்டாம் என்றும் அவர்களுக்கு அறிவுறுத்தினார். மாற்கு 6:7–8
அதிகாரத்துடன் சென்று போதிக்குமாறும், ஆனால் பயணத்தில் தங்களுடன் எதையும் எடுத்துச் செல்ல வேண்டாம் என்றும் இயேசு பன்னிருவருக்கு அறிவுறுத்தியது ஏன்? பயணம் புறப்படுவோரில் பெரும்பாலானோர் முன்கூட்டியே ஆயத்தம் செய்து, தங்களுக்குத் தேவையானவற்றை எடுத்துக்கொள்வதை உறுதிசெய்கிறார்கள். இயேசுவின் அறிவுரை, அடிப்படைத் தேவைகளுக்காகப் பிறரைச் சார்ந்திருப்பதைக் கற்பிப்பதைவிட, தங்கள் பணியில் இறைப் பராமரிப்பைச் சார்ந்திருப்பதைக் கற்பிப்பதாகவே இருந்தது.
பொருள்சார்ந்த உலகம் தன்னிலேயே நல்லது. படைப்புகள் அனைத்தும் நல்லவையே. எனவே, உடைமைகளை வைத்திருப்பதிலும், அவற்றை நமது நன்மைக்காகவும் நமது பராமரிப்பில் ஒப்படைக்கப்பட்டவர்களின் நன்மைக்காகவும் பயன்படுத்துவதிலும் தவறேதும் இல்லை. ஆனால், நம்மையே சார்ந்திருப்பதைவிட அதிகமாக அவரைச் சார்ந்திருக்க வேண்டும் என்று கடவுள் விரும்பும் நேரங்கள் உண்டு. மேலே கூறப்பட்ட நிகழ்வு அத்தகைய சூழல்களில் ஒன்றாகும்.
வாழ்வின் அடிப்படைத் தேவைக்குரியவற்றை எடுத்துச் செல்லாமல் தங்கள் பணிக்குப் புறப்படுமாறு பன்னிருவருக்கு அறிவுறுத்தியதன் வழியாக, அந்த அடிப்படைத் தேவைகளுக்கான தமது பராமரிப்பை நம்புவதற்கு மட்டுமல்லாமல், போதித்தல், கற்பித்தல், குணப்படுத்துதல் ஆகிய பணிகளில் அவர்களுக்குத் தேவையானவற்றை ஆன்மிக நிலையிலும் தாம் வழங்குவார் என்று நம்புவதற்கும் இயேசு அவர்களுக்கு உதவினார். அவர்களுக்கு மிகுந்த ஆன்மிக அதிகாரமும் பொறுப்பும் அளிக்கப்பட்டிருந்தன. அதனால், மற்றவர்களைவிட அவர்கள் இன்னும் மிக அதிகமாக இறைப் பராமரிப்பைச் சார்ந்திருக்க வேண்டியிருந்தது. ஆகவே, இந்தப் புதிய ஆன்மிகப் பணியிலும் தம்மை நம்புவதற்கு அவர்கள் மனம் கொண்டிருக்கும்படி, தங்கள் அடிப்படைத் தேவைகள் குறித்து தம்மை நம்புமாறு இயேசு அவர்களை வலியுறுத்துகிறார்.
நமது வாழ்விலும் இதுவே உண்மை. மற்றொருவருடன் நற்செய்தியைப் பகிர்ந்துகொள்ளும் பணியைக் கடவுள் நம்மிடம் ஒப்படைக்கும்போது, பெரும்பாலும் நம்மிடமிருந்து மிகுந்த நம்பிக்கையை வேண்டுகின்ற விதத்திலேயே அதைச் செய்வார். அவரது கனிவான வழிநடத்துதலைச் சார்ந்திருக்க நாம் கற்றுக்கொள்ளும்படி, ஒருவகையில் நம்மை “வெறுங்கையுடன்” அனுப்புவார். மற்றொருவருடன் நற்செய்தியைப் பகிர்ந்துகொள்வது வியப்புக்குரிய பெரும் பேறாகும். இறைப் பராமரிப்பை முழு உள்ளத்தோடு சார்ந்திருந்தால் மட்டுமே நாம் வெற்றி பெறுவோம் என்பதை உணர வேண்டும்.
நற்செய்தியுடன் நீங்கள் அணுக வேண்டும் என்று கடவுள் விரும்புவதாக நீங்கள் உணரும் மனிதர்களைப் பற்றி இன்று சிந்தியுங்கள். இதை நீங்கள் எப்படிச் செய்வது? பதில் மிகவும் எளிது. இறைப் பராமரிப்பைச் சார்ந்திருப்பதன் வழியாக மட்டுமே இதைச் செய்ய முடியும். நம்பிக்கையுடன் முன்செல்லுங்கள்; ஒவ்வோர் அடியிலும் உங்களை வழிநடத்தும் அவரது குரலுக்குச் செவிகொடுங்கள். நற்செய்தியின் செய்தியைப் பயனுள்ள முறையில் பகிர்ந்துகொள்வதற்கு அவரது பராமரிப்பே ஒரே வழி என்பதை அறிந்துகொள்ளுங்கள்.
நம்பிக்கைக்குரிய என் ஆண்டவரே, புறப்பட்டுச் சென்று உமது அன்பையும் இரக்கத்தையும் பிறருடன் பகிர்ந்துகொள்ள நீர் விடுக்கும் அழைப்பை ஏற்றுக்கொள்கிறேன். என் வாழ்வின் பணியை நிறைவேற்ற எப்போதும் உம்மையும் உமது பராமரிப்பையும் சார்ந்திருக்க எனக்கு உதவும். உமது விருப்பப்படி என்னைப் பயன்படுத்தும்; மண்ணில் உமது மாட்சிமிகு அரசைக் கட்டியெழுப்ப, என்னை வழிநடத்தும் உமது கரத்தை நம்பியிருக்க எனக்கு உதவும். இயேசுவே, உம்மில் நம்பிக்கை வைக்கிறேன்.
தவக்காலத்திற்கான நூல்கள்:
இன்றைய புனிதர்கள்/திருவிழாக்கள்
திருப்பலி வாசிப்புகளுக்கான தெரிவுகள்
