Disyembre 5, 2021
Ikalawang Linggo ng Adbiyento (Taon C)
Mga Pagbasa para sa Araw na Ito
“Isang tinig ng sumisigaw sa ilang. ‘Ihanda ninyo ang daan ng Panginoon, tuwirin ninyo ang Kanyang mga landas.’” Luke 3:4
Ngayong Ikalawang Linggo ng Adbiyento, inihaharap sa atin si San Juan Bautista upang pagnilayan. Kaylaking kaloob niya sa atin! Si Hesus mismo ang nagsabi na “sa mga isinilang ng mga babae ay walang lumitaw na higit na dakila kaysa kay Juan Bautista” (Matthew 11:11). Kaytaas na papuri!
Ano ang dahilan ng gayong kadakilaan ni Juan? Dalawang bagay ang maaari nating tukuyin. Ang una ay may kinalaman sa kanyang pagkatawag at ang ikalawa ay sa kanyang birtud.
Una sa lahat, dakila si Juan sapagkat siya ang naging tagapag-ugnay ng mga Propeta ng Lumang Tipan at ng Bagong Tipan. Siya ang tulay na naghanda para sa bagong buhay na darating. Ang kanyang natatanging misyon ang dahilan ng kanyang tunay na kadakilaan.
Ngunit dakila si Juan hindi lamang dahil sa kanyang natatanging pagkatawag, kundi dahil din sa birtud na taglay niya sa kanyang buhay. At ang kaloob na ito, higit sa alinman, ang nararapat nating pagnilayan upang magsilbing inspirasyon sa atin.
Ang natatanging birtud na taglay ni Juan ay ang kapakumbabaan. Wala siyang ibang pagkakilala sa kanyang sarili kundi bilang isang “tinig ng sumisigaw sa ilang.” At ang Salitang kanyang ipinahayag ay si Hesus.
Kinilala ni Juan na hindi man lamang siya karapat-dapat na yumuko at magkalag ng mga tali ng sandalyas ni Hesus (Mark 1:7). Marami ang pumupuri at sumusunod sa kanya, ngunit patuloy niyang sinasabi tungkol kay Hesus na “Dapat Siyang maging higit na dakila at ako naman ay maging mas mababa” (John 3:30). Hindi papuri at karangalan ang hangad ni Juan; sa halip, ang kanyang misyon ay ituro sa lahat ang Tagapagligtas ng Sanlibutan. Maaari sana niyang hinangad ang parangal at papuri ng marami, at tiyak na matatanggap niya ang mga ito. Maaaring ginawa pa nga nila siyang hari. Ngunit buong-pusong handa si Juan na tuparin ang kanyang misyon at pagkatapos ay isuko ang kanyang sarili sa malupit na tabak ng berdugong papatay sa kanya. Gayon na lamang ang kanyang kapakumbabaan na tanging kay Hesus siya nakatuon at tanging Siya lamang ang nais niyang ituro sa iba.
Pagnilayan mo ngayon ang kapakumbabaang ito sa iyong sariling buhay. Mas madalas mo bang ituon ang pansin ng iba sa iyong sarili o kay Kristo? Hinahangad mo ba ang papuri ng iba, o mapagpakumbaba mong iniuukol sa Diyos ang lahat ng papuri at kaluwalhatian? Kapakumbabaan ang landas na tinahak ni San Juan Bautista, at ito rin ang landas na dapat nating pagsikapang tahakin sa bawat araw.
Panginoon, salamat po sa pagkakaloob Ninyo sa amin kay San Juan Bautista. Nawa’y magsilbing inspirasyon sa aking paglalakbay bilang Kristiyano ang kanyang patotoo ng kapakumbabaan. Tulungan Ninyo ako, Panginoon, na laging akayin ang iba na tumingin sa Inyo sa halip na sa aking sarili. Hesus, nagtitiwala ako sa Iyo.
Tingnan ang lahat ng aming Materyal para sa Adbiyento
Nobena sa Kalinis-linisang Paglilihi
Nobyembre 29-Disyembre 7
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Mga Pagninilay sa Banal na Kasulatan para sa Adbiyento
Mga Pagpipilian sa mga Pagbasa sa Misa
