Nobyembre 26, 2022
Sabado ng Ikatatlumpu’t Apat na Linggo sa Karaniwang Panahon
Mga Pagbasa Ngayong Araw
“Mag-ingat kayo na huwag maging antukin ang inyong mga puso dahil sa labis na pagsasaya at paglalasing at sa mga alalahanin sa pang-araw-araw na buhay, at bigla na lamang kayong abutan ng araw na iyon na parang isang bitag.” Luke 21:34-35a
Ito ang huling araw ng ating taong liturhiko! At sa araw na ito, ipinapaalala sa atin ng Ebanghelyo kung gaano kadaling maging tamad sa ating buhay-pananampalataya. Ipinapaalala nito na maaaring maging antukin ang ating mga puso dahil sa “labis na pagsasaya at paglalasing at sa mga alalahanin sa pang-araw-araw na buhay.” Tingnan natin ang mga tuksong ito.
Una, binabalaan tayo laban sa labis na pagsasaya at paglalasing. Tiyak na naaangkop ito sa literal na kahulugan: malinaw na dapat nating iwasan ang pag-abuso sa droga at alak. Ngunit naaangkop din ito sa marami pang ibang paraan kung paano tayo nagiging “antukin” dahil sa kawalan ng pagtitimpi. Ang pag-abuso sa alak ay isa lamang paraan ng pagtakas sa mga pasanin ng buhay, ngunit marami pang paraan para gawin ito. Tuwing nagpapadala tayo sa anumang uri ng kalabisan, sinisimulan nating hayaang maging antukin ang ating mga puso sa espirituwal na buhay. Tuwing naghahanap tayo ng pansamantalang pagtakas sa buhay nang hindi bumabaling sa Diyos, hinahayaan nating maging antukin tayo sa espirituwal na buhay.
Ikalawa, tinutukoy ng talatang ito ang “mga alalahanin sa pang-araw-araw na buhay” bilang isang sanhi ng pagiging antukin. Napakadalas nga nating makaranas ng pagkabalisa sa buhay. Maaari tayong makaramdam na hindi na natin kaya at labis tayong nabibigatan sa kung anumang bagay. Kapag nabibigatan tayo sa buhay, madalas tayong humanap ng paraan upang makatakas. At napakadalas, ang “paraan ng pagtakas” ay isang bagay na nagpapaging antukin sa atin sa espirituwal na buhay.
Sinasabi ni Hesus ang mga salitang ito sa Ebanghelyo upang hamunin tayong manatiling gising at mapagbantay sa ating buhay-pananampalataya. Nagagawa natin ito kapag pinananatili natin ang katotohanan sa ating isip at puso at itinutuon ang ating mga mata sa kalooban ng Diyos. Sa sandaling ibaling natin ang ating mga mata sa mga pasanin ng buhay at hindi natin makita ang Diyos sa gitna ng lahat ng bagay, nagiging antukin tayo sa espirituwal na buhay at, sa isang diwa, nagsisimulang makatulog.
Ngayong nagtatapos ang taong liturhiko, pagnilayan na tinatawag ka ng Diyos na maging ganap na gising. Nais Niyang ibigay mo sa Kanya ang iyong buong pansin at maging lubos kang mahinahon at malinaw ang pag-iisip sa iyong buhay-pananampalataya. Ituon mo ang iyong mga mata sa Kanya at hayaan Siyang panatilihin kang laging handa sa Kanyang nalalapit na pagbabalik.
Panginoon, tunay Kitang minamahal at nais kong mahalin Ka nang higit pa. Tulungan Mo akong manatiling ganap na gising sa aking buhay-pananampalataya. Tulungan Mo akong panatilihing nakatuon sa Iyo ang aking mga mata sa lahat ng bagay upang lagi akong handa sa Iyong pagdating sa akin. Hesus, nagtitiwala ako sa Iyo.
Tingnan ang aming mga sanggunian para sa Adbiyento!
Mga Pagninilay sa Banal na Kasulatan
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Mga Pagpipilian sa mga Pagbasa sa Misa
