Pebrero 8, 2023
Miyerkules ng Ikalimang Linggo sa Karaniwang Panahon
Mga Pagbasa para sa Araw na Ito
San Jeronimo Emiliani, Tagapagtatag—Opsiyonal na Paggunita
Santa Josefina Bakhita, Birhen—Opsiyonal na Paggunita
Muling tinawag ni Jesus ang mga tao at sinabi sa kanila, “Makinig kayong lahat sa akin at unawain ninyo. Walang anumang pumapasok sa tao mula sa labas ang makapagpaparumi sa kanya; ang mga lumalabas mula sa kanyang kalooban ang siyang nagpaparumi sa kanya.” Marcos 7:14–15
Ano ang nasa iyong kalooban? Ano ang nasa iyong puso? Nagtatapos ang Ebanghelyo ngayon sa isang talaan ng mga bisyo na nakalulungkot na nagmumula sa kalooban: “masasamang pag-iisip, karumihan sa asal, pagnanakaw, pagpatay, pangangalunya, kasakiman, masamang hangarin, panlilinlang, kahalayan, inggit, kalapastanganan sa Diyos, kapalaluan, kahangalan.” Siyempre, wala sa mga bisyong ito ang kanais-nais kapag tiningnan nang walang pagkiling. Lahat ng ito ay lubhang kasuklam-suklam. Gayunman, napakadalas na ang mga ito ay mga kasalanang palaging kinakaharap ng mga tao, sa mas maliit o mas malaking antas.
Isaalang-alang, halimbawa, ang kasakiman. Kapag malinaw itong nauunawaan, walang sinumang nagnanais na makilala bilang isang taong sakim. Isang kahiya-hiyang katangian ito. Ngunit kapag hindi kinikilala ang kasakiman bilang kasakiman, madaling mahulog sa bitag ng pamumuhay ayon dito. Ang taong sakim ay naghahangad ng labis-labis na dami ng kung anu-anong bagay. Mas maraming pera, mas magandang bahay, mas magandang kotse, mas marangyang mga bakasyon, at iba pa. Kaya, kapag kumikilos nang sakim ang isang tao, hindi niya nakikitang masama ang kasakiman. Kapag tiningnan lamang ang kasakiman nang walang pagkiling, saka ito nauunawaan kung ano talaga ito.
Sa Ebanghelyong ito, sa pagbanggit ni Jesus sa mahabang talaang ito ng masasamang ugali, pinagkakalooban Niya tayo ng isang kahanga-hangang gawa ng awa. Niyayanig Niya tayo at tinatawag na huminto muna at tingnan ang kasalanan ayon sa tunay nitong kalikasan. Nililinaw rin ni Jesus na kapag isinasabuhay mo ang isa o higit pa sa masasamang ugaling ito, narurumihan ka. Nagiging sakim ka, sinungaling, malupit, mapagtsismis, mapagtanim ng poot, palalo, at iba pa. Kung titingnan nang walang pagkiling, walang sinumang nagnanais nito.
Alin sa talaang iyon ng masasamang ugali ang pinakamahirap mong mapaglabanan? Ano ang nakikita mo sa sarili mong puso? Maging tapat ka sa iyong sarili sa harap ng Diyos. Nais ni Jesus na maging dalisay at banal ang iyong puso, malaya sa mga ito at sa lahat ng karumihan. Ngunit hangga’t hindi mo kayang suriin nang tapat ang sarili mong puso, magiging mahirap talikuran ang kasalanang pinagsisikapan mong mapaglabanan.
Pagnilayan mo ngayon ang talaang ito ng mga kasalanang tinukoy ng ating Panginoon. Isaalang-alang ang bawat isa at hayaan ang iyong sarili na makita ang bawat kasalanan ayon sa tunay nitong kalikasan. Hayaan ang iyong sarili na kamuhian ang mga kasalanang ito nang may banal na galit, at pagkatapos ay ituon ang iyong pansin sa kasalanang pinakamahirap mong mapaglabanan. Alamin na habang mulat mong kinikilala at tinatalikuran ang kasalanang iyon, sisimulan ng ating Panginoon na palakasin ka at dalisayin ang iyong puso upang makalaya ka sa karumihang iyon at, sa halip, maging anak ng Diyos na may kagandahang nilayon Niya para sa iyo nang likhain ka.
Maawain kong Panginoon, tulungan Mo akong makita ang kasalanan ayon sa tunay nitong kalikasan. Tulungan Mo ako, lalo na, na makita ang sarili kong kasalanan—ang kasalanang iyon sa puso ko na nagpaparumi sa akin bilang Iyong minamahal na anak. Habang nakikita ko ang aking kasalanan, ipagkaloob Mo sa akin ang biyayang kailangan ko upang talikuran ito at bumaling sa Iyo nang buong puso, nang sa gayon ay maging bagong nilalang ako sa Iyong biyaya at awa. Jesus, nagtitiwala ako sa Iyo!
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Mga Santo sa Araw na Ito –
Santa Josefina Bakhita, Birhen
Mga Pagpipilian sa mga Pagbasa sa Misa
Tampok na larawan sa itaas: Si Kristong Nangangaral ni Rembrandt, mula sa Wikimedia Commons
