Isang Tanda Mula sa Diyos

Oktubre 16, 2023
Lunes ng Ika-Dalawampu’t Walong Linggo sa Karaniwang Panahon
Mga Pagbasa Ngayon

“Ang salinlahing ito ay isang masamang salinlahi; naghahanap ito ng tanda, ngunit walang tandang ibibigay rito maliban sa tanda ni Jonas. Kung paanong si Jonas ay naging tanda sa mga taga-Nineve, gayundin ang Anak ng Tao sa salinlahing ito.” Lucas 11:29–30

Naranasan mo na bang maghanap ng mga tanda mula sa Diyos? Kadalasan, habang tinatahak natin ang buhay at hinaharap ang mga ginhawa at hirap na nararanasan nating lahat, madali tayong mauwi sa paghahanap ng mga tanda mula sa Diyos kung ano ang dapat nating gawin sa ganito o ganoong bagay. At bagama’t tiyak na nangungusap sa atin ang Diyos kung minsan sa pamamagitan ng mga natatanging biyaya na mga tanda mula sa Langit, nililinaw ng sipi sa itaas kung aling tanda ang dapat nating higit na pagtuunan ng pansin.

Ang payak na mensahe ng ating Panginoon sa siping ito ng Ebanghelyo ay dapat nating tuklasin ang kahulugan ng pinakamalalim na tandang ibinigay kailanman at gawin itong saligan ng lahat ng ating pasiya sa buhay. Ang buhay, kamatayan, at muling pagkabuhay ni Hesus ay hindi lamang ang bukal ng buhay na walang hanggan; ang mga ito rin ang pinakamalinaw na tandang kailangan natin sa paggawa ng lahat ng ating pasiya sa buhay.

Ang tanda ay isang kilos na naghahayag ng isang malalim at nakatagong misteryo. Isang misteryong inihahayag ng buhay, kamatayan, at muling pagkabuhay ni Hesus ay ito: kung nais nating makibahagi sa bagong buhay na nakamit para sa atin sa pamamagitan ng Kanyang Krus, dapat nating sundin ang halimbawang ipinakita Niya sa pamumuhay na may sakripisyong di-makasarili, na iniaalay ang ating buhay para sa kapwa, upang matuklasan at yakapin nila ang bagong buhay ng Muling Pagkabuhay ni Kristo. Sa praktikal na pagsasabuhay nito, kung naghahanap ka ng mga sagot sa buhay at ng mga tanda mula sa Diyos kung ano ang dapat mong gawin sa ilang pagkakataon, ituon mo ang iyong paningin sa buhay ni Kristo at pagnilayan kung paano mo higit na matutularan ang Kanyang buhay sa bawat praktikal na pasiyang ginagawa mo sa araw-araw. Totoo ito maging sa pagkilatis mo sa isang mahalagang pasiya sa buhay o sa isang maliit at praktikal na pasiya.

Karaniwan sa ganitong pagkilatis ang pagtuon natin sa ating sarili sa paraang higit na makasarili. Mahirap lumayo sa ganitong pag-iisip, ngunit kung gagawin nating gabay ang “tanda” ng Anak ng Tao, magiging lubhang iba ang paraan ng ating pagkilatis sa mga pasiya sa buhay. Kapag ginawa nating bukal ng ating pagkilatis at pagpapasiya sa buhay ang buhay, kamatayan, at muling pagkabuhay ng ating Panginoon, hahantong tayo sa mga pasiyang tumutulad sa Kanyang di-makasariling sakripisyo ng pag-ibig. Kaya kung may pasiya kang kailangang gawin, hindi mo pag-iisipan kung ano ang mas madali o kung ano ang mas gusto mo; sa halip, pag-iisipan mo kung ano ang higit na di-makasarili at pinakamabuti para sa kapwa. Ano ang pinakamainam na paraan upang matularan ang mapagsakripisyong pag-ibig ni Hesus?

Pagnilayan mo ngayon ang anumang pasiyang sinisikap mong gawin. Pagkatapos, pagnilayan kung paano mo hinaharap ang pagpapasiyang ito. Ginagawa mo bang saligan ng iyong pagkilatis ang patotoong ibinigay sa atin ni Hesus? Pinagninilayan mo ba kung paano mo maiaalay ang iyong buhay bilang isang mapagsakripisyong handog para sa kapwa? Tinitingnan mo ba ang pag-ibig mula sa pananaw ng Krus ng ating Panginoon at sinisikap mong tularan ang Kanyang maluwalhati at di-makasariling pagtatalaga ng sarili para sa kaligtasan ng mga minamahal Niya? Sikapin mong tularan ang ating Panginoon, na ginagawang saligan ng lahat ng iyong pagkilatis at pasiya sa buhay ang patotoo ng Kanyang mga gawa, at matutuklasan mo ang tanging tunay na tandang kailangan mo upang maharap ang mga hamon ng buhay.

Aking ganap na Panginoon, bawat pasiyang ginawa Mo sa Iyong buhay ay bunga ng pag-ibig at naaayon sa ganap na kalooban ng Ama. Ipagkaloob Mo sa akin ang biyayang kailangan ko upang ang bawat pasiya ko sa buhay ay tumulad sa Iyong ganap na halimbawa. Nawa’y matularan Kita sa aking buhay, gaya ng pag-aalay Mo ng Iyong buhay para sa iba. Pinipili Kita at ang Iyong maluwalhating buhay ng pag-aalay ng sarili bilang tandang gumagabay sa aking buhay. Hesus, nagtitiwala ako sa Iyo.

Mahalaga: Araw ng Pag-aayuno, Pangingilin, at Panalangin para sa Kapayapaan sa Banal na Lupain