Pagpapanumbalik

Pebrero 11, 2024
Ikaanim na Linggo sa Karaniwang Panahon (Taon B)
Mga Pagbasa Ngayon

Isang ketongin ang lumapit kay Jesus, lumuhod at nagmakaawa sa Kanya, “Kung loloobin Mo, maaari Mo akong linisin.” Nahabag Siya, iniunat ang Kanyang kamay, hinipo ang lalaki, at sinabi sa kanya, “Niloob Ko. Maging malinis ka.” Mark 1:40–41

Sa Lumang Tipan, sa Leviticus 14, binigyan ng Diyos si Moises ng isang ritwal ng paglilinis para sa mga gumaling sa ketong. Ang masusing ritwal na ito, na tumatagal nang ilang araw, ay ginagamit upang muling maibalik sa lipunan ang isang ketonging gumaling na. Matapos pagalingin ni Jesus ang ketongin sa sipi ng Ebanghelyo ngayon, inutusan Niya ito na “humayo ka, magpakita sa pari at ihandog para sa iyong paglilinis ang iniutos ni Moises; iyon ang magiging katibayan para sa kanila.” Kaya hindi lamang pinagaling ni Jesus ang lalaki, kundi ipinaalam din Niya rito na maaari na itong maibalik sa pamayanan.

Noong panahong iyon, ang ketong ay isang kakila-kilabot na sakit, hindi lamang dahil sa mga epekto nito sa katawan, kundi dahil hindi rin pinahihintulutang makibahagi sa lipunan ang isang ketongin. Ito ay dahil lubhang nakahahawa ang ketong. Sa pagbubukod sa mga nahawahan, hindi gaanong madaling kumalat ang sakit sa iba.

Habang pinagninilayan natin ang pagpapagaling na ito, sikaping isipin hindi lamang ang sakit na dulot ng karamdaman ng ketongin, kundi lalo na ang sakit na dulot ng kanyang pagkakahiwalay. Siyempre, wala pang mga telepono noon, walang pakikipag-usap sa pamamagitan ng video, at walang paraan ng pakikipag-ugnayan mula sa malayo. Kaya ang pagkakabukod ay mangangahulugan ng ganap na pagkawala ng ugnayan ng tao sa kanyang pamilya at mga kaibigan, pati na ng dati niyang kabuhayan, tahanan, at lahat ng naging bahagi ng kanyang buhay.

Sa espirituwal na antas, ang iba’t ibang sakit na pinagaling ni Jesus ay dapat ding makita bilang mga sagisag ng kasalanan. Sa kaso ng ketong, dapat nating makita ang sakit na ito bilang sagisag ng mga epekto ng kasalanang mortal. At ang kasalanang mortal, maliban kung mapagaling ito ng kapatawaran ng Diyos, ay nagdudulot ng ganap na pagkakahiwalay ng isang tao sa buhay ng biyaya. Napuputol ang kanyang ugnayan sa Diyos, gayundin ang lahat ng iba pang ugnayang nakasentro kay Cristo. Kapag ang isang tao ay gumawa ng kasalanang mortal at nanatili sa kasalanang iyon, wala siyang kakayahang magmahal nang tunay, sapagkat nawala na ang lahat ng biyaya sa kanyang buhay. Kaya ang kanyang mga ugnayan ay nagiging makasarili, mapaghanap, at hindi banal.

Para sa mga nahulog sa kasalanang mortal, ang ketonging ito ay isang sagisag ng daan palabas dito. Una, lumapit siya kay Jesus at lumuhod sa Kanyang harapan. Nagpakumbaba siya sa harap ng ating Panginoon, na kinikilalang si Jesus ang kasagutan sa kanyang karamdaman. Pagkatapos ay nagsumamo siya kay Jesus na tulungan siya. Ngunit may ipinahahayag din ang paraan ng kanyang pagsusumamo kay Jesus: hindi niya iginiit na pagalingin siya, kundi ipinahayag lamang niya ang kanyang pananampalatayang kaya siyang pagalingin ni Jesus. At nanatili siyang nakaluhod doon nang may pagtitiwala at pag-asa. Itinuturo sa atin ng ketonging ito ang ganap na paraan ng paglapit sa ating Panginoon kapag nakikipagbuno tayo sa mabigat na kasalanan.

Pagnilayan ngayon ang ketonging ito. Sikaping unawain ang kanyang pagkakahiwalay at ang lahat ng nawala sa kanya. Sikaping unawain ang kanyang kababaang-loob at pananampalataya. At sikaping tularan ang paraan ng kanyang paglapit sa ating Panginoon. Huwag kang matakot na magpakumbaba sa harap ng Diyos habang kinikilala mo ang iyong mga kasalanan at iba pang pangangailangan. Ipahayag ang iyong pananampalataya sa Kanyang walang-hanggang kapangyarihan at pag-ibig, at ipaubaya ang iyong sarili sa Kanyang mga kamay na puspos ng mahabaging pag-ibig. Hindi ka Niya bibiguin.

Panginoong puspos ng awa, ninanais Mong mapagaling ang lahat ng Iyong mga anak mula sa maraming kasalanang humahadlang sa kanilang pakikipag-isa sa Iyo at sa Iyong bayan. Ipagkaloob Mo po sa akin ang pananampalataya at pagtitiwalang kailangan ko upang lagi akong makapagpakumbaba sa Iyong harapan at sa gayon ay matanggap ang pagpapanumbalik sa Iyong biyaya na lubos kong hinahangad. Jesus, nagtitiwala ako sa Iyo.

Mga Pang-araw-araw na Debosyon para sa Kuwaresma: