Agosto 5, 2024
Lunes sa Ikalabingwalong Linggo sa Karaniwang Panahon (Mga Taong B&C)
Mga Pagbasa para sa Araw na Ito
Pagtatalaga sa Basilika ng Santa Maria Mayor—Paggunita na Maaaring Ipagdiwang
Kinuha Niya ang limang tinapay at ang dalawang isda, tumingala sa langit, at binigkas ang pagpapala. Pinagpira-piraso Niya ang mga tinapay at ibinigay sa mga alagad, na siya namang nagbigay sa mga tao. Kumain silang lahat at nabusog, at tinipon nila ang natirang mga piraso—labindalawang bakol na puno. Matthew 14:19–20
Isang mahalagang aspeto ng himalang ito na madaling hindi mapansin ay ang pagpaparami ni Hesus sa mga tinapay at isda sa pamamagitan ng Kanyang mga alagad bilang mga kasangkapan. Ginawa Niya ito sa pag-anyaya sa kanila na tumulong sa pamamahagi ng mga tinapay at sa pagtitipon ng mga natirang piraso. Ipinakikita nito na madalas tayong gamitin ng Diyos bilang mga tagapamagitan ng Kanyang lubos na masaganang mga biyayang ipinagkakaloob sa iba. Bagama’t maaaring tuwirang ibuhos ng Diyos ang Kanyang awa, kadalasan ay ginagawa Niya ito sa pamamagitan ng ibang tao.
Habang pinagninilayan mo ang himalang ito, sikapin mong ilagay ang iyong sarili sa kalagayan ng isa sa mga alagad na inanyayahang mamahagi ng tinapay sa mga tao. Kung naroon ka at nagugutom, at pagkatapos ay binigyan ka ng tinapay, matutukso kang kainin muna iyon bago magbigay sa iba. Ngunit ibinigay ni Hesus ang tinapay sa Kanyang nagugutom na mga alagad na may tagubiling ibigay muna iyon sa iba.
Kung minsan, kapag tinatawag tayo ng Diyos na ipagkaloob sa iba ang Kanyang awa, nagiging makasarili tayo. Madaling isipin na dapat muna nating asikasuhin ang ating sarili at ang ating mga pangangailangan. Mali ang ating paniniwalang makapagkakaloob lamang tayo ng awa sa iba kapag natugunan na ang ating mga pangangailangan. Halimbawa, isipin kung pagk atanggap ng mga alagad ng tinapay mula kay Hesus ay nagpasiya silang kumain muna nito. Pagkatapos, kung may sobra pa, saka nila ito maibibigay sa iba. Kung ginawa nila ito, hindi sana nagkaroon ng gayong labis na kasaganaan sa pagpaparami ng mga tinapay. Sa huli, ang mga alagad mismo ay tumanggap ng labis-labis na pagkain—dahil mismo sa una nilang ipinamahagi ang kanilang tinanggap.
Sa espirituwal na buhay, gayundin ang nangyayari sa atin. Kapag tumatanggap tayo ng espirituwal na pagkain mula sa ating Panginoon, ang una nating dapat isipin ay ibahagi ito sa iba. Dapat muna nating tingnan ang lahat ng tinatanggap natin mula sa Diyos bilang pagkakataong ipagkaloob sa iba ang mga pagpapalang iyon. Ito ang likas na katangian ng biyaya. Halimbawa, kung pinagkalooban tayo ng kapayapaan o kagalakan sa ating puso, dapat nating maunawaan na ang kapayapaan o kagalakang ito na ating tinatanggap ay isang kaloob na dapat agad ibahagi sa iba. Kung pinagkalooban tayo ng espirituwal na pagkaunawa sa Banal na Kasulatan, ibinibigay ito sa atin una sa lahat upang ibahagi sa iba. Ang bawat kaloob na tinatanggap natin mula sa Diyos ay dapat unawain bilang kaloob na ibinigay sa atin upang maibahagi natin agad sa iba. Ang mabuting balita ay kapag sinisikap nating ibahagi ang ating tinanggap, lalo pa tayong pinagkakalooban at, sa huli, higit tayong magiging mayaman.
Pagnilayan mo ngayon ang ginawa ng mga alagad: tinanggap nila ang pagkaing ito mula sa ating Panginoon at agad itong ipinamahagi. Ilagay mo ang iyong sarili sa himalang ito, at tingnan ang tinapay bilang sagisag ng bawat biyayang tinatanggap mo mula sa Diyos. Ano ang iyong tinanggap na nais ng Diyos na ipamahagi mo sa iba? May mga biyaya ka bang tinanggap na makasarili mong pinipilit angkinin para lamang sa iyong sarili? Ang likas na katangian ng biyaya ay ipinagkakaloob ito upang maibahagi sa iba. Sikapin mong gawin ito sa bawat espirituwal na kaloob na tinatanggap mo, at makikita mong dumarami ang mga biyaya hanggang sa tumanggap ka ng higit pa sa kaya mong isipin.
Panginoong lubos na mapagbigay, ibinubuhos Mo ang Iyong biyaya at awa nang nag-uumapaw. Habang tinatanggap ko ang lahat ng Iyong ipinagkakaloob, punuin Mo po ng pagkabukas-palad ang aking puso upang hindi ako kailanman mag-atubiling mag-alay ng Iyong awa sa kapwa. Gamitin Mo po ako bilang Iyong kasangkapan, mahal na Panginoon, upang sa pamamagitan ko ay mapakain Mo nang sagana ang iba. Hesus, nagtitiwala ako sa Iyo.
Higit pang mga Pagninilay sa Ebanghelyo
Mga Pagninilay sa Inaawit na Awa ng Diyos
Mga Meditasyon sa Banal na Kasulatan para sa Karaniwang Panahon
Karagdagang Babasahin – Pagtatalaga sa Basilika ng Santa Maria Mayor
Mga Pagpipilian sa mga Pagbasa sa Misa
