Huwebes, Disyembre 15, 2016
Mga Pagbasa alang sa Huwebes sa Ikatulong Semana sa Adbiyento
(Ang tanang katawhan nga naminaw, apil ang mga maniningil og buhis, nga nakadawat sa bunyag ni Juan, miila nga matarong ang Diyos; apan ang mga Pariseo ug ang mga batid sa Balaod, nga wala magpabunyag kaniya, misalikway sa plano sa Diyos alang kanila.) Lucas 7:29-30
Kinahanglan kang molihok uban sa pagtuo aron molalom ang imong pagtuo. Mahimong mao kini ang leksiyon sa Ebanghelyo karon. Ang mga milihok uban sa pagtuo ug nagpabunyag kang Juan “miila usab nga matarong ang Diyos.” Ang mga midumili sa pagdawat sa bunyag ni Juan “misalikway usab sa plano sa Diyos alang kanila.”
Kon atong iaplikar kining kamatuoran sa atong kinabuhi, makita nato nga daghan kitag paagi sa pagbuhat niini. Una sa tanan, nabunyagan na kita diha kang Kristo, busa wala kita tawga nga modawat sa bunyag ni Juan sa literal nga kahulogan. Apan ang “bunyag ni Juan” mahimo usab natong sabton ingong unang pagdapit sa Espiritu Santo sa atong kinabuhi.
Pananglitan, kon mabati nato nga ang Diyos nag-ingon, “Basaha kining libroha,” ug dili nato tagdon ang Iyang pag-aghat, basin mas dako na diay nga bahin sa plano sa Diyos alang sa atong kinabuhi ang atong gisalikway kay sa atong nahunahunaan. O kon mabati nato nga gitawag kita sa Diyos sa pagpasaylo nianang tawhana, sa paggahin og dugang panahon sa pag-ampo o sa pag-uban sa atong pamilya, ug uban pa, ug buhaton nato kini, basin makita nato nga maablihan ang pultahan sa daghan pang kahibulongang grasya sa atong kinabuhi.
Pamalandonga karon kon unsay gipabuhat sa Diyos kanimo o unsay gusto Niya nga dawaton nimo ingong gikan Kaniya. Bisan og morag gamay ra kini, ayaw isalikway ang Iyang unang pagdapit; dawata hinuon kini sa tibuok nimong kasingkasing. Sa imong pagdawat niini, basin makita nimo nga ang Diyos nagapanalangin kanimo sa madagayaon nga paagi nga wala gayod nimo mahunahunai.
Ginoo, tabangi ako sa pagtubag sa Imong mga pagdapit kanako matag adlaw. Hinaot nga kanunay nakong masabtan ang Imong balaang kabubut-on ug tumanon kini sa hingpit. Hesus, nagsalig ako Kanimo.
Tan-awa usab: Adlaw-adlaw nga Pamalandong sa Balaang Kalooy




