Sabado, Enero 7, 2017
Gitawag sa pangulong sulugoon sa kombira ang pamanhonon ug giingnan siya, “Ang tanan mag-una sa pag-alagad sa maayong bino, ug kon nakainom na ug daghan ang mga tawo, ang bino nga dili kaayo maayo na usab ang ilang ihalad; apan gitagana nimo ang maayong bino hangtod karon.” Gibuhat kini ni Jesus sa Cana sa Galilea isip sinugdanan sa iyang mga timaan. Sa ingon gipadayag niya ang iyang himaya, ug ang iyang mga tinun-an misugod sa pagtuo kaniya. Juan 2:9c-11
Sa Ebanghelyo ni San Juan, adunay pito ka “timaan” nga gibuhat ni Jesus aron ipadayag ang iyang gahom ug himaya. Daghan ang gipadayag kanato niining unang timaan. Sumala sa sugilanon, nahutdan og bino sa kasal sa Cana. Ang inahan ni Jesus nangamuyo kaniya alang sa mga nagkombira. Gisugo ni Jesus ang mga sulugoon nga pun-on og tubig ang unom ka tadyaw nga bato, ug ang tubig diha-diha nahimong bino. Ug dili lang kini ordinaryong bino! Kini ang labing maayong bino.
Ang bino simbolo sa nag-awas nga kadagaya sa Diyos. Nagpaila kini sa tinuod nga pagsaulog ug kalipay. Sa paghatag kanila sa labing maayong bino sa madagayaong sukod, gipadayag ni Jesus nga mianhi siya aron pun-on kita sa hingpit nga kalipay nga nag-awas.
Sa ulahi, gigamit usab ang bino aron madawat nato ang Mahal nga Dugo nga iula ni Jesus alang sa kapasayloan sa mga sala. Madawat nato kining madagayaong gasa sa matag higayon nga modawat kita sa Balaang Komunyon.
Samtang nagkaduol ang kataposan sa Panahon sa Pasko ug ang pagsugod sa Ordinaryong Panahon, tugoti kining unang milagrosong timaan ni Jesus nga mosulti kanimo. Paminawa siya nga nag-ingon kanimo nga mianhi siya aron pun-on ang imong kalag sa nag-awas nga kalipay. Ug hinumdomi nga ang tanan niyang gidala kanimo gihatag kanimo pinaagi sa mahimayaong pagpangamuyo sa halangdong Inahan sa Diyos.
Ginoo, nagpasalamat ako kanimo sa madagayaong kinabuhi sa grasya nga imong gitanyag kanako. Nagpasalamat ako kanimo niining una sa imong mga milagro ug sa mensahe nga imong gipadala kanako ug sa tanan nimong sumusunod. Tabangi ako nga ipunting ang akong panan-aw sa Langit ug sa kinabuhi nga puno sa nag-awas nga kalipay nga nagpaabot kanako didto. Jesus, misalig ako kanimo.
Tan-awa usab: Adlaw-adlaw nga Pamalandong sa Balaang Kalooy
40 ka Adlaw sa Tiilan sa Krus:
Usa ka Pagtan-aw nga Puno sa Gugma gikan sa Kasingkasing sa Atong Mahal nga Inahan





