Mayo 17, 2020
Ikaunom nga Domingo sa Pasko sa Pagkabanhaw (Tuig A)
Mga Pagbasa Karong Adlawa

Paminaw sa Iningles
“Kon nahigugma kamo kanako, tumanon ninyo ang akong mga sugo. Ug mohangyo ako sa Amahan, ug hatagan kamo niya ug laing Manlalaban nga mag-uban kaninyo sa kanunay, ang Espiritu sa kamatuoran, nga dili madawat sa kalibotan…” Juan 14:15–17
Karong Ikaunom nga Domingo sa Pasko sa Pagkabanhaw, magsugod na kitag pagtutok sa pag-abot sa Espiritu Santo. Sa pagbasa sa ibabaw, si Hesus naghisgot nga hangyoon niya ang Amahan sa pagpadala ug laing Manlalaban nga mag-uban kanato sa kanunay. Kining Manlalaban mao ang Espiritu Santo.
Angayng matikdan nga gigamit ni Hesus ang tawag nga “Espiritu sa Kamatuoran” alang sa Espiritu Santo. Gipatin-aw usab niya nga dili madawat sa kalibotan ang Espiritu Santo.
Nagkinabuhi kita karon sa matawag natong “Panahon sa Espiritu Santo.” Kini mao ang panahon nga gihisgotan ni Hesus sa iyang mga Apostoles. Busa maayo nga pamalandongon nato ang pag-abot sa Espiritu Santo sumala sa gipadayag ni Hesus.
Una, bahin sa tawag nga “Espiritu sa Kamatuoran,” angay natong pamalandongon kon aduna ba kitay katakos ug kaandam sa pagdawat sa tibuok Kamatuoran nga atong madawat uban sa Espiritu Santo. Kon iya kita sa kalibotan ug gidawat nato ang kalibotanong mga panghunahuna ug mga prinsipyo, dili nato madawat ang Espiritu Santo. Apan kon makita nato ang mga sayop sa atong kalibotan ug ang daghang bakak nga mga prinsipyo niini, mas sayon alang kanato ang pagsalikway sa maong mga prinsipyo ug ang pagdawat sa Espiritu Santo ug sa daghang kamatuoran nga iyang gipadayag.
Dugang pa, kon andam kitang modawat sa pag-abot sa Espiritu Santo, madawat nato ang labing gamhanang Manlalaban nga atong maangkon sa kinabuhi. Ang Espiritu Santo mao gayod ang atong Manlalaban: siya lamang ang magtatabang nga atong gikinahanglan. Kon magpasakop kita sa hingpit sa Espiritu Santo, madawat nato ang tanang grasya nga gikinahanglan sa kinabuhi.
Pamalandonga karong adlawa nga natuman na ang saad ni Hesus sa iyang mga Apostoles ug nga madawat mo ang iyang gisaad dinhi ug karon sa imong kinabuhi. Pag-ampo sa Espiritu Santo ug paabota uban sa kalipay ang pagsaulog sa Domingo sa Pentekostes duha ka semana gikan karon.
Umari ka, Espiritu Santo, pun-a ang mga kasingkasing sa imong mga matinud-anon ug pasigaa diha kanila ang kalayo sa imong gugma. Ipadala ang imong Espiritu ug lalangon sila. Ug bag-ohon mo ang nawong sa yuta.
O Diyos, nga pinaagi sa kahayag sa Espiritu Santo nagtudlo sa mga kasingkasing sa mga matinud-anon, itugot nga pinaagi sa mao gihapong Espiritu Santo makabaton kami sa tinuod nga kaalam ug kanunayng malipay sa iyang paghupay. Pinaagi ni Kristo nga among Ginoo. Amen. Hesus, misalig ako kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
Hulagway: Ang Pagbubo sa Espiritu Santo, obra ni Anthony van Dyck




