Cebuano

Ang Hilabihang Kasakit Nahimong Kalipay

Mayo 22, 2020
Biyernes sa Ikaunom nga Semana sa Pasko sa Pagkabanhaw
Mga Basahon Karong Adlawa

Santa Rita sa Cascia—Opsyonal nga Handumanan

Paminaw sa Iningles

“Kon ang usa ka babaye manganak, mag-antos siya kay miabot na ang iyang takna; apan human niya ipanganak ang bata, dili na niya mahinumdoman ang kasakit tungod sa iyang kalipay nga adunay bata nga natawo sa kalibotan. Busa kamo usab nag-antos karon. Apan makita ko kamo pag-usab, ug magmalipayon ang inyong mga kasingkasing, ug walay bisan kinsa nga makaagaw sa inyong kalipay.” John 16:21–22

Kasagaran na sa kinabuhi ang hilabihang kasakit. Sa gagmayng paagi, makasinati kita og kasakit matag adlaw. Ug, matag karon ug unya, makasinati kita og bug-at kaayong pag-antos tungod sa usa ka piho nga kasakit sa atong kinabuhi.

Ang pagsinati ba og hilabihang kasakit nagpasabot nga wala ka sa grasya sa Dios? Nagpasabot ba kini nga gibiyaan ka sa Dios? O nagpasabot ba kini nga aduna kay gibuhat nga sayop? Dili gayod. Sa pagkatinuod, kinahanglan lamang natong tan-awon ang kinabuhi ni Jesus aron makita nga dili kini mao ang kahimtang. Kanunay Siyang nag-antos sa tibuok Niyang kinabuhi dinhi sa yuta samtang padayon Siyang misulod sa mas lawom nga pagtuman sa misyon sa Iyang Amahan. Sa wala pa magsugod ang Iyang publikong ministeryo, nag-antos Siya sulod sa kap-atan ka adlaw didto sa kamingawan. Sa tibuok Niyang publikong ministeryo, nasinati Niya ang hilabihang kasakit ug kakapoy sa Iyang kinabuhi dinhi sa yuta. Nasinati Niya ang pagsaway sa uban, ang dili pagsabot Kaniya, pagbiaybiay, pagsalikway, mapintas nga pagtratar, ug daghan pa. Sa kataposan, nahibalo kita sa Iyang gidangatan sa Krus.

Ang atong Mahal nga Inahan gitusok sa “espada sa kasubo” sa iyang kasingkasing. Sukad pa sa sinugdanan, wala siya sabta ug gibiaybiay tungod sa iyang misteryosong pagmabdos bisan wala pa siya maminyo. Hingpit ang iyang gugma alang sa iyang Anak, ug samtang nagdako Siya, nag-antos siya sa kabalaka alang sa Iyang umaabot. Nakita niya ang daghang nahigugma Kaniya ug ang uban nga nanghasi Kaniya. Nasaksihan niya ang Iyang paghusay nga nahimong usa lamang ka pagbiaybiay sa hustisya ug ang Iyang Paglansang sa Krus.

Apan hunahunaa ang ilang kinabuhi karon. Naghari na sila karon gikan sa Langit isip mahimayaong Rayna sa Tanang Santos ug Hari sa Uniberso. Nagpuyo na sila karon sa himaya hangtod sa kahangtoran. Ang ilang hilabihang kasakit nahimong hingpit nga kalipay.

Pamalandongi karon ang imong kaugalingong mga pagsulay sa kinabuhi. Ang teksto sa Kasulatan sa ibabaw nagpadayag sa saad sa Dios ngadto sa mga molahutay niini uban sa pagtuo. Kon gibati nimo nga daw dili makiangayon ang imong gidangatan o nga dili makiangayon ang pagtratar kanimo, dili ka nag-inusara—anaa ka sa maayong pakig-uban. Ang hinungdanon mao ang paglakaw niining kinabuhia uban sa grasya ug dignidad. Ayaw tugoti nga mapaluya ka sa mga pagsulay o sa mga kasakit niining kinabuhia. Hibaloi nga samtang magpabilin kang matinud-anon sa paglakaw sa dalan nga gitagana sa Dios alang kanimo, kalipay ang imong madangatan sa kataposan! Kini usa gayod ka kamatuoran. Kupti kanang paglaoma ug ipunting ang imong panan-aw sa kataposang tumong. Takos kini sa tanang pag-antos sa kataposan.

Ginoo, gitugyan ko Kanimo ang akong kasakit ug mga palas-anon. Giusa ko kini sa Imong Krus ug nagsalig ako nga sa tanang kahimtang maglakaw Ka uban kanako sa tibuok kong kinabuhi. Hinaot nga dili mawala sa akong panan-aw ang akong tumong ug magmalipayon ako sa Imong gugmang dili mausab. Hesus, nagsalig ako Kanimo.

Nobena sa Espiritu Santo
Giampo isip pagpangandam sa Pentekostes
Unang Adlaw – Biyernes, Mayo 22

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw – Santa Rita sa Cascia

Mga Kapilian sa mga Basahon sa Misa

Hulagway:  Ang Birhen ug ang Bata ni Elisabetta Sirani