Cebuano

Gihigugma Ba Ko Nimo?

Mayo 29, 2020
Biyernes sa Ikapitong Semana sa Pasko sa Pagkabanhaw
Mga Pagbasa Karong Adlawa

San Pablo VI, Papa—Opsyonal nga Handumanan

Paminaw sa Iningles

Miingon Siya kaniya sa ikatulong higayon, “Simon, anak ni Juan, gihigugma ba Ko nimo?” Naguol si Pedro kay gipangutana siya Niya sa ikatulong higayon, “Gihigugma ba Ko nimo?” Ug miingon siya Kaniya, “Ginoo, nasayod Ka sa tanan; nasayod Ka nga gihigugma ko Ikaw.” Miingon si Jesus kaniya, “Pakan-a ang Akong mga karnero.”  John 21:17

Tulo ka higayon nga gipangutana ni Jesus si Pedro kon gihigugma ba niya Siya.  Nganong tulo man ka higayon?  Usa sa mga hinungdan mao nga aron “makabawi” si Pedro sa tulo ka higayon nga iyang gilimod si Jesus.  Dili, wala magkinahanglan si Jesus nga mangayo og pasaylo si Pedro sa tulo ka higayon, apan si Pedro ang nagkinahanglan sa pagpahayag sa iyang gugma sa tulo ka higayon, ug nasayod niini si Jesus.

Ang tulo usa usab ka gidaghanon nga nagtimaan sa kahingpitan.  Pananglitan, nagaingon kita nga ang Dios “Santos, Santos, Santos.”  Kining tulo ka pagsubli maoy paagi sa pag-ingon nga ang Dios mao ang Labing Santos sa tanan.  Sa paghatag kang Pedro og higayon sa pagsulti kang Jesus sa tulo ka higayon nga gihigugma niya Siya, gihatagan usab siya og higayon sa pagpahayag sa iyang gugma sa labing lawom nga paagi.

Busa dinhi makita nato ang tulo ka pagpahayag sa gugma ug ang tulo ka pagbawi sa paglimod ni Pedro.  Kinahanglan kining magpadayag kanato sa atong kaugalingong panginahanglan sa paghigugma sa Dios ug pagpangayo sa Iyang kalooy sa “tulo ka pilo” nga paagi.

Kon mosulti ka sa Dios nga gihigugma nimo Siya, unsa man kalawom kana?  Kutob lang ba kini sa mga pulong, o usa ba kini ka gugma nga bug-os ug naglukop sa imong tibuok pagkatawo?  Ang imong gugma ba sa Dios usa ka butang nga imong kinasingkasing nga gipasabot sa bug-os gayod?  O usa ba kini ka butang nga kinahanglan pa nimong palamboon?

Sa pagkatinuod, kitang tanan kinahanglan nga maningkamot sa pagpalambo sa atong gugma, ug mao kana ang hinungdan nga kining teksto kinahanglan adunay dakong kahulogan alang kanato.  Kinahanglan nga madungog usab nato si Jesus nga nangutana kanato niini sa tulo ka higayon.  Kinahanglan natong masabtan nga dili Siya matagbaw sa usa lamang ka yano nga, “Ginoo, gihigugma ko Ikaw.”  Buot Niya kining madungog pag-usab, ug pag-usab pa gayod.  Gipangutana kita Niya niini kay nasayod Siya nga kinahanglan natong ipahayag kining gugma sa labing lawom nga paagi.  “Ginoo, nasayod Ka sa tanan, nasayod Ka nga gihigugma ko Ikaw!”  Kini gayod ang kinahanglang mahimong atong kataposang tubag.

Kining tulo ka pagpangutana naghatag usab kanato og higayon sa pagpahayag sa atong labing lawom nga pangandoy alang sa Iyang kalooy.  Kitang tanan makasala.  Kitang tanan nagalimod kang Jesus sa usa o laing paagi.  Apan ang maayong balita mao nga si Jesus kanunay nga nagdapit kanato nga himoon ang atong sala nga usa ka kadasig sa pagpalawom sa atong gugma.  Dili Siya magpabilin lang nga nasuko kanato.  Dili Siya magmug-ot.  Dili Niya gamiton ang atong sala aron kanunay kitang sumbatan.  Apan nangayo gayod Siya sa labing lawom nga pagbasol ug sa hingpit nga pagkakabig sa kasingkasing.  Buot Niya nga hingpit gayod natong talikdan ang atong sala.

Pamalandongi karon ang kalawom sa imong gugma alang sa Dios ug kon unsa nimo kini ka maayong napahayag ngadto Kaniya.  Pilia ang pagpahayag sa imong gugma alang sa Dios sa tulo ka pilo nga paagi.  Himoa kini nga lawom, sinsero ug dili na bawion.  Dawaton sa Ginoo kining kinasingkasing nga buhat ug ibalik kini kanimo sa usa ka gatos ka pilo.

Ginoo, nasayod gayod Ikaw nga gihigugma Ko Ikaw.  Nasayod usab Ikaw kon unsa ako kahuyang.  Tugoti ako nga makadungog sa Imong pagdapit nga ipahayag ko ang akong gugma Kanimo ug ang akong pangandoy sa Imong kalooy.  Hinaot nga mahalad ko sa hingpit kining gugma ug pangandoy.  Hesus, misalig ako Kanimo.

Nobena sa Espiritu Santo
Ginaampo isip pagpangandam alang sa Pentekostes
Ikawalong Adlaw – Biyernes, Mayo 29

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw – San Pablo VI, Papa

Mga Kapilian sa mga Basahon sa Misa