Disyembre 14, 2020
Lunes sa Ikatulong Semana sa Adbiyento
Mga Basahon Karong Adlawa
San Juan de la Cruz, Pari ug Doktor sa Simbahan—Handumanan

Paminaw sa Iningles
“Diin man gikan ang bunyag ni Juan? Gikan ba kini sa langit o sa mga tawo?” Naglalis sila sa ilang kaugalingon ug miingon, “Kon moingon kita, ‘Gikan sa langit,’ moingon Siya kanato, ‘Nan nganong wala man kamo motuo kaniya?’ Apan kon moingon kita, ‘Gikan sa mga tawo,’ mahadlok kita sa katawhan, kay silang tanan nag-isip kang Juan nga usa ka propeta.” Busa mitubag sila kang Jesus, “Wala kami mahibalo.” Mateo 21:25–27
Kini usa ka hingpit nga pananglitan kon unsaon nga dili angay magkinabuhi. Apan, makapasubo nga kanunay kaayo kining naghulagway sa paagi sa pagkinabuhi sa daghang anaa sa katungdanan. Niining kutay sa Ebanghelyo, makita nato ang mga Pariseo nga naglihok isip matawag natong “mga relihiyosong politiko.” Ang usa ka relihiyosong politiko mao kadtong nagtakda sa iyang relihiyosong mga baruganan pinaagi sa baligtad nga pamaagi. Ang angay unta natong buhaton mao ang pagpunting sa atong mga mata kang Kristo ug sa tanan nga Iyang gipadayag kanato. Kini magbunga sa mahimayaong gasa sa tinuod nga pagtuo, ug gikan nianang lig-on nga patukoranan sa pagtuo, kita molihok. Apan gitugotan sa mga Pariseo nga ang ilang “mga baruganan” ibase sa ilang gihunahuna nga mohatag sa labing maayong resulta niadtong higayona. Gipili nilang moingon nga “Wala kami mahibalo” kon diin gikan ang bunyag ni Juan kay nagtuo sila nga mao kadto ang tubag nga labing makapanalipod kanila gikan sa bisan unsang pagsaway.
Isip mga sumusunod ni Kristo, kinahanglan nga andam ug kinabubut-on natong antuson ang tanang pagbiaybiay nga moabot tungod sa dayag natong pagkinabuhi sa atong mga baruganan sa pagtuo. Ang pagtuo motultol sa gugma, ug ang gugma kanunayng nakagamot sa mga kamatuoran sa pagtuo. Apan kon atong kinabuhian ug gimantala ang kamatuoran, sawayon kita sa uban ug mag-antos kita tungod niini.
Kini nga Ebanghelyo nagdapit kanatong tanan sa pagpamalandong sa lisod dawaton nga mga kamatuoran sa atong panahon ug sa pagdesisyon kon andam ba kitang ipahayag sa dayag ang kamatuoran. Hunahunaa ilabina ang daghang moral nga mga kamatuoran sa atong pagtuo nga daw padayon nga giatake. Andam ka bang ipahayag ang imong pagtuo sa tin-aw nga paagi, uban sa gugma ug lig-on nga baruganan, bisan kon mosangpot kini sa pagsaway gikan sa kalibotan?
Pamalandonga karong adlawa ang baliskad nga paagi sa mga Pariseo sa pag-atubang sa usa ka lisod nga pangutana. Ayaw sunda ang ilang panig-ingnan. Hinuon, barogi ang dili matarog nga mga pagtuo nga giawhag ka sa imong pagtuo nga dawaton. Unsang mga pangutana ang gipangutana kanimo karong adlawa? Sa unsang mga paagi ka gisulayan sa uban? Giunsa nimo pag-atubang kadtong mga pagsulay? Mosulti ka ba sama sa usa ka “relihiyosong politiko”? O tin-aw ba ang imong pagsulti kay nakagamot kini sa lig-on nga pundasyon sa imong pagtuo?
Ginoo ko, tinubdan sa tanang kamatuoran, hatagi ako sa grasya nga akong gikinahanglan aron makabarog nga lig-on sa tanan Mong gipadayag kanako. Hatagi ako og kaisog nga magpabiling lig-on sa mga kamatuoran sa pagtuo nga Imong gihatag kanako. Hinaot nga ikapahayag ko kining pagtuo ngadto sa tanan nakong masugatan, aron mahimo akong instrumento sa Imong gugma ug kaluoy alang sa kalibotan. Jesus, misalig ako Kanimo.
Tan-awa ang among mga kapanguhaan alang sa Adbiyento!
Mga Pamalandong sa Balaang Kasulatan
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Juan sa Krus, Pari ug Doktor sa Simbahan
Mga Kapilian sa mga Basahon sa Misa
Hulagway nga gipakita sa ibabaw: Alaot Kamo, mga Magtutudlo sa Balaod ug mga Pariseo ni James Tissot
Ihatag ang gasa sa pagtuo karong Pasko





