Cebuano

Kahibulong ug Pagtahod

Martes, Disyembre 29, 2020
Ikalimang Adlaw sa Oktaba sa Pasko
Mga Basahon Karong Adlawa

San Tomas Becket, Obispo ug Martir—Opsiyonal nga Handumanan

Paminaw sa Iningles

Ang amahan ug inahan sa bata nahibulong sa mga gisulti mahitungod kaniya; ug gipanalanginan sila ni Simeon ug miingon siya kang Maria nga iyang inahan, “Tan-awa, kining bataa gitakda alang sa pagkapukan ug pagbangon sa daghan sa Israel, ug aron mahimong usa ka timaan nga supakon (ug ikaw mismo duslakon sa usa ka espada) aron mapadayag ang mga hunahuna sa daghang mga kasingkasing.”  Luke 2:33–35

Kon adunay mahitabo nga tinuod gayong labaw sa kinaiyahan, ang tawhanong hunahuna nga makasabot niana nga panghitabo mapuno sa kahibulong ug balaang pagtahod. Alang kang Inahang Maria ug San Jose, ang ilang mga hunahuna kanunayng napuno sa balaang kahibulong sa ilang nasaksihan.

Una, nahitabo ang Pagpahibalo sa Anghel ngadto sa atong Mahal nga Inahan. Unya nagpakita ang anghel kang Jose pinaagi sa usa ka damgo. Dayon nahitabo ang milagrosong pagkatawo. Miabot ang mga magbalantay sa karnero aron sa pagsimba sa ilang anak ug misugilon nga nagpakita kanila ang panon sa mga anghel. Wala madugay human niini, miabot ang mga Mago gikan sa Sidlakan aron sa paghatag og pagtahod sa ilang anak. Ug karon gihatag kanato ang sugilanon ni Simeon didto sa Templo. Gisulti niya ang labaw-sa-kinaiyahang pagpadayag nga iyang nadawat mahitungod niining Bata. Sa makadaghang higayon, gipakita kang Inahang Maria ug San Jose ang milagro sa mga nagakahitabo, ug sa matag higayon sila mitubag uban sa kahibulong ug balaang pagtahod.

Bisan tuod wala kita mapanalangini nga makasinati niining labaw-sa-kinaiyahang panghitabo sa Pagpakatawo sa Diyos sa samang paagi nga nasinati nila ni Maria ug Jose, mahimo gihapon kitang makaambit sa ilang “pagkatingala” ug sa ilang “kahibulong ug balaang pagtahod” pinaagi sa pagpamalandong uban sa pag-ampo niining labaw-sa-kinaiyahang panghitabo. Ang misteryo sa Pasko, nga usa ka pagpadayag sa Diyos nga nahimong tawo, usa ka panghitabo nga molabaw sa tanang panahon ug dapit. Kini usa ka espirituhanong kamatuoran nga adunay labaw-sa-kinaiyahang gigikanan, ug busa usa kini ka panghitabo nga hingpit nga maabot sa atong mga hunahuna nga giduyogan sa pagtuo. Sama kang Inahang Maria ug San Jose, kinahanglan natong paminawon ang anghel sa Pagpahibalo, ang anghel sa damgo ni Jose; kinahanglan natong masaksihan ang mga magbalantay sa karnero ug ang mga Mago ug, karon, kinahanglan kitang magmaya uban ni Simeon samtang siya mitutok sa bag-ong natawong Mesiyas, ang Manluluwas sa Kalibotan.

Pamalandongi karon kon unsa ka hingpit nimong gitugotan ang imong hunahuna sa pagsulod sa talagsaong misteryo nga atong gisaulog niining balaang panahon. Migahin ka ba og panahon sa pagbasa pag-usab sa sugilanon uban sa pag-ampo? Mabati ba nimo ang kalipay ug katagbawan nga nasinati nila ni Simeon ug Ana? Migahin ka ba og panahon sa pagpamalandong sa mga hunahuna ug kasingkasing ni Inahang Maria ug San Jose samtang ilang nasinati kadtong unang Pasko? Tugoti kining lawom ug labaw-sa-kinaiyahang misteryo sa atong pagtuo nga motandog kanimo niining panahon sa Pasko sa paagi nga ikaw usab “mahibulong” sa atong gisaulog.

Ginoo, nagpasalamat ako Kanimo sa gasa sa Imong Pagpakatawo. Uban ni Simeon, nagmaya ako ug naghalad Kanimo og pagdayeg ug pagpasalamat. Palihog bag-oha diha kanako ang tinuod nga pagbati sa kahibulong ug balaang pagtahod samtang namalandong ako nga may dakong katingala sa Imong gibuhat alang kanako ug sa tibuok kalibotan. Hinaot nga dili gayod ako kapuyon sa pagpamalandong niining labaw sa kinaiyanhong gasa sa Imong kinabuhi. Hesus, misalig ako Kanimo.

Tan-awa ang among mga kapanguhaan alang sa Pasko!

Mga Pamalandong sa Balaang Kasulatan

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw – San Tomas Becket, Obispo ug Martir

Mga Kapilian sa mga Basahon sa Misa

Tan-awa usab: Ang Espada sa Kasubo

Kristo, Kandila sa Paglaom

Pag-ampo sa Pasko

Hulagway nga gipakita sa ibabaw: Giila ni Simeon ug ni Ana ang Ginoo diha kang Hesus, obra ni Rembrandt