Cebuano

Mahinlo Ka

Enero 14, 2021
Huwebes sa Unang Semana sa Ordinaryong Panahon
Mga Basahon Karong Adlawa

Paminaw sa Iningles

Usa ka sanglahon miduol Kaniya ug, nga nagluhod, nangamuyo Kaniya ug miingon, “Kon buot Nimo, makahimo Ka sa paghinlo kanako.” Natandog sa kaluoy, Iyang gituy-od ang Iyang kamot, gihikap ang sanglahon, ug giingnan siya, “Buot Ko gayod. Mahinlo ka.” Marcos 1:40–41

Kon moduol kita sa atong balaang Ginoo uban sa pagtuo, moluhod sa Iyang atubangan ug itugyan Kaniya ang atong panginahanglan, madawat usab nato ang samang tubag nga gihatag ngadto niining sanglahon: “Buot Ko gayod. Mahinlo ka.” Kining mga pulonga angayng maghatag kanato og paglaom taliwala sa bisan unsa ug sa tanang hagit sa kinabuhi.

Unsa man ang kabubut-on sa atong Ginoo alang kanimo? Ug unsa man ang Iyang gitinguhang hinloan sa imong kinabuhi? Kining sugilanon sa sanglahon nga miduol kang Jesus wala magpasabot nga ihatag sa atong Ginoo ang bisan unsa ug ang tanang hangyo nga atong dad-on ngadto Kaniya. Hinunoa, kini nagpadayag nga buot Niya kitang hinloan gikan sa labing nakapahasol kanato. Ang sanla niining sugilanona angayng tan-awon isip simbolo sa espirituhanong mga sakit nga nagsakit sa imong kalag. Labaw sa tanan, angay kining tan-awon isip simbolo sa sala sa imong kinabuhi nga nahimong naandan ug sa hinayhinay nakadaot pag-ayo sa imong kalag.

Niadtong panahona, ang sanla dili lamang nakapahinabog grabeng kadaot sa lawas sa usa ka tawo, kondili nakapahimulag usab kaniya gikan sa katilingban. Kinahanglan silang mopuyo nga bulag sa uban nga walay maong sakit; ug kon moduol sila sa uban, kinahanglan nilang ipaila nga mga sanglahon sila pinaagi sa pipila ka dayag nga mga timailhan aron dili sila maduolan o mahikapan sa mga tawo. Busa, ang sanla adunay mga sangpotanan alang sa tawo mismo ug sa katilingban.

Mao usab kini ang tinuod sa daghang sala nga naandan na. Ang sala makadaot sa atong mga kalag, apan makaapekto usab kini sa atong mga relasyon. Pananglitan, ang usa ka tawo nga naanad sa pagkamapintas, pagkamasawayon, pagbiaybiay o susama niini makasinati sa daotang mga epekto niining mga salaa diha sa iyang mga relasyon.

Sa pagbalik sa mga pulong ni Jesus sa ibabaw, hunahunaa ang sala nga dili lamang labing nakaapekto sa imong kalag kondili sa imong mga relasyon usab. Mahitungod nianang salaa, buot ni Jesus nga moingon kanimo, “Mahinlo ka.” Buot Niyang palig-onon ang imong relasyon pinaagi sa paghinlo sa sala nga anaa sa imong kalag. Ug aron mahimo Niya kana, ang gikinahanglan lamang mao nga modangop ka Kaniya nga nagluhod ug itugyan Kaniya ang imong sala. Ilabinang tinuod kini diha sa Sakramento sa Pakig-uli.

Pamalandongi karong adlawa ang imong labing suod nga mga relasyon sa kinabuhi. Unya hunahunaa kon hain sa imong mga sala ang labing direktang nakadaot niadtong mga relasyona. Bisan unsa pa ang mosantop sa imong hunahuna, makasiguro ka nga buot ni Jesus nga tangtangon gikan kanimo kanang espirituhanong sanla nga anaa sa imong kalag.

Diyosnon kong Ginoo, tabangi ako nga makita kon unsa ang ania kanako nga labing makadaot sa akong pakigrelasyon sa uban. Tabangi ako nga makita kon unsay hinungdan sa pagkalain gikan sa uban ug sa kasakit. Hatagi ako sa pagpaubos aron makita ko kini ug sa pagsalig nga gikinahanglan ko aron modangop Kanimo, isugid kini ug mangayo sa Imong pag-ayo. Ikaw ug Ikaw lamang ang makalingkawas kanako gikan sa akong sala, busa modangop ako Kanimo uban sa pagsalig ug pagtugyan sa akong kaugalingon. Uban sa pagtuo, gipaabot ko usab ang Imong mga pulong nga makaayo: “Buot Ako. Mahinlo ka.” Jesus, misalig ako Kanimo. 

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Santos/Kasaulogan Karong Adlawa

Mga Kapilian sa mga Basahon sa Misa

Hulagway nga gipakita sa ibabaw: Gihinloan ni Kristo ang Lalaki nga May Sanla, ni Sibeaster