Cebuano

Usa ka “Balaang Pagduso”

Abril 13, 2021
Martes sa Ikaduhang Semana sa Pasko sa Pagkabanhaw
Mga Pagbasa Karong Adlawa

San Martin I, Papa ug Martir—Dili Obligadong Handumanan 

Bidyo

Paminaw sa Iningles

Si Nicodemo mitubag ug miingon kaniya, “Unsaon man pagkahitabo niini?” Si Jesus mitubag ug miingon kaniya, “Ikaw ang magtutudlo sa Israel ug wala ka makasabot niini? Sa pagkatinuod, sa pagkatinuod, sultihan ko ikaw, nagsulti kami sa among nahibaloan ug nagpamatuod kami sa among nakita, apan kamo wala modawat sa among pagpamatuod.”  John 3:9–11

Sumala sa atong gipamalandongan kagahapon, si Nicodemo usa sa pipila lamang ka mga Pariseo nga sa kataposan nakabig, nahimong sumusunod ni Jesus, ug giila karon nga santos. Ang uban lamang nga mga Pariseo nga natala ang mga ngalan isip mga nakabig sa Kristiyanismo mao sila si San Pablo ug si Gamaliel. Gipakita usab sa Acts 15:5 nga may uban pang mga Pariseo nga sa kataposan nakabig.

Kon tan-awon sa kinatibuk-an ang daghang panagtagbo ni Jesus ug sa mga Pariseo, klaro nga dako kaayo ang ilang pagsupak kang Jesus ug sa Iyang pagtulon-an. Kanunay silang nangitag paagi sa paglit-ag Kaniya ug, siyempre, sa kataposan sila ang may tulubagon sa Iyang kamatayon, uban sa ubang mga pangulong relihiyoso sa Sanhedrin. Tungod niini, sayon sabton nga lagmit dakong pagpit-os ang gibati sa tanang Pariseo aron isalikway si Jesus. Ang matag usa kanila lagmit nakasinati sa kusog nga pagpit-os sa ilang mga kauban aron molihok uyon sa kinatibuk-ang baroganan nga hukman si Jesus nga sad-an. Mao kini ang konteksto sa teksto sa ibabaw diin nangutana si Nicodemo kang Jesus. Kini nga teksto nagpadayon sa panag-istoryahanay sa Ebanghelyo kagahapon diin klarong giingon ni Jesus kang Nicodemo nga ang dalan paingon sa Langit mao ang “pagpakatawo gikan sa itaas.” Nangutana si Nicodemo kon unsaon sa usa ka tawo nga “matawo pag-usab,” ug dayon gipahayag ni Jesus ang daw pagsaway kaniya nga gikutlo sa ibabaw.

Makatabang ang pagsabot nga ang pagsaway ni Jesus dili paghukom kang Nicodemo nga sad-an. Dili kini sama sa naandang tono sa Iyang mga pulong nga “Alaut kamo…”; hinuon, kini usa ka malumo apan direkta kaayong hagit kang Nicodemo aron mogiya kaniya gikan sa iyang mga pangutana ngadto sa pagtuo. Ug mao kana ang yawe. Wala moduol si Nicodemo kang Jesus aron lit-agon ug hukman Siya nga sad-an sama sa gibuhat sa ubang mga Pariseo. Miduol si Nicodemo tungod kay naglibog siya. Ug lagmit, naglibog siya tungod kay gibati niya ang dakong pagpit-os gikan sa iyang isigka mga Pariseo aron hukman si Jesus nga sad-an.

Ang pagsabot niini nga konteksto makatabang kanato sa pagsabot dili lamang sa pagkamaayo ug kaisog ni Nicodemo kondili usab sa mahigugmaong kaisog ni Jesus. Nasayod si Jesus nga bukas ang kasingkasing ni Nicodemo. Nasayod Siya nga madani si Nicodemo sa pagtuo. Apan nasayod usab si Jesus nga kinahanglan hagiton si Nicodemo sa direkta ug lig-ong paagi. Nagkinahanglan siya og gamayng “balaang pagduso” aron makasulod sa gasa sa pagtuo. Siyempre, ang hagit ni Jesus sa kataposan nakadani kang Nicodemo sa pagtuo.

Pamalandongi karon ang bisan unsang bahin sa imong kinabuhi diin ikaw usab nagkinahanglan og “balaang pagduso” gikan sa atong Ginoo. Unsang matang sa kalibotanong pagpit-os ang imong nasinati sa kinabuhi? Ang imong mga higala, silingan, sakop sa pamilya o kauban sa trabaho nagpit-os ba kanimo sa bisan unsang paagi nga supak sa kinabuhi sa tinuod nga pagkabalaan? Kon mao, pamalandongi ang kaisog nga sa kataposan gipakita nila ni Nicodemo, San Pablo ug Gamaliel. Tugoti nga ang ilang pagpamatuod makadasig kanimo ug tugoti ang atong Ginoo sa paghagit kanimo sa bahin diin labing gikinahanglan nimo kini aron ikaw usab makadawat sa “balaang pagduso” nga imong gikinahanglan aron mahimong mas matinumanong sumusunod ni Jesus.

Ginoo ko, tinubdan sa tanang kusog, dili matarog ang Imong tinguha nga hagiton ako sa bahin sa akong kinabuhi diin labing gikinahanglan ko kini. Tabangi ako nga dawaton ang Imong malumo ug mahigugmaong pagtul-id kon maluya ako, aron maangkon ko ang kaisog ug kusog nga akong gikinahanglan aron mahimong matinumanon Mong sumusunod. Hatagi ako ug katin-aw ug pagsabot, minahal kong Ginoo, ug tabangi ako sa pagbuntog sa makapahisalang pagpamugos sa kalibotan. Hesus, nagsalig ako Kanimo.

Mga Pag-ampo sa Panahon sa Pasko sa Pagkabanhaw

Dugang nga mga Pamalandong sa Ebanghelyo

Mga Pamalandong sa Diosnong Kalooy

Tanang Santos/Mga Kapistahan

Santos sa Adlaw – San Martin I, Santo Papa ug Martir

Mga Kapilian sa mga Basahon sa Misa

Hulagway nga gipakita sa ibabaw: Ang Pagduaw ni Nicodemo kang Kristo, dibuho ni John La Farge