Hulyo 1, 2021
Huwebes sa Ika-napulog Tulo nga Semana sa Ordinaryong Panahon
Mga Pagbasa alang Karon
San Junipero Serra, Pari—Opsiyonal nga Handumanan sa USA
Paminaw sa Iningles
Pagkasakay ni Jesus sa usa ka sakayan, mitabok Siya ug miabot sa iyang kaugalingong lungsod. Didto gidala sa mga tawo ngadto kaniya ang usa ka paralitiko nga naghigda sa higdaanang alaanan. Sa pagkakita ni Jesus sa ilang pagtuo, miingon siya sa paralitiko, “Pagmaisogon, anak, gipasaylo na ang imong mga sala.” Mateo 9:1–2
Sa wala pa kini nga teksto, si Jesus nagpagula ug mga demonyo gikan sa duha ka lalaki sa lungsod sa mga Gadareno. Human niini, gisultihan Siya sa mga lumulupyo nga mobiya sa ilang lungsod, busa milakaw si Jesus sakay sa usa ka sakayan ug miabot sa Capernaum, diin Siya nagpuyo human mibiya sa Nazaret. Kini nga panagtagbo sa usa ka paralisado nga nagbuy-od sa usang higdaanan mao ang naghulat Kaniya sa Iyang pagkanaog gikan sa sakayan.
Hinumdomi nga sa pagbalik ni Jesus sa Nazaret, diin Siya nagdako, wala Siya makahimo ug bisan unsang milagro didto tungod sa ilang kakulang sa pagtuo. Tungod kay suod ang ilang pagkaila Kaniya, natintal sila nga dili motuo nga Siya usa ka talagsaong tawo. Apan karon, sa bag-ong lungsod nga Iyang bag-o pang gipuy-an, nakahimo si Jesus ug gamhanang mga milagro tungod kay dayag ang pagtuo sa mga tawo.
Sa teksto sa ibabaw, sulayi nga ibutang ang imong kaugalingon sa maong talan-awon. Bag-o pa lamang gisalikway si Jesus sa mga Gadareno, miabot Siya sa Capernaum sakay sa usa ka sakayan, minaog Siya ug gisugat dayon sa usa ka pundok sa mga tawo nga klarong naghulat Kaniya. Sulayi paghanduraw ang ilang panag-estoryahanay samtang didto pa si Jesus sa pikas daplin sa lanaw. Nasayod sila nga mobalik Siya sa Iyang bag-ong pinuy-anan, nag-andam sila ug higdaanan nga ikakarga sa paralisado, ug dayon naghulat sila, naglaom ug nag-ampo nga moabot si Jesus ug ayohon ang maong tawo. Tin-aw usab nga nabatyagan dayon ni Jesus ang ilang pagtuo ug natandog pag-ayo ang Iyang kasingkasing niini. Usa sa labing mahinungdanong bahin niini nga teksto mao nga wala lamang miingon si Jesus ug “Oo” sa pisikal nga pag-ayo ug kutob ra niana. Hinuon, ang Iyang tubag sa paralisado mao nga unahon ang pagpasaylo sa iyang mga sala. Adunay mahinungdanong leksiyon nga atong makat-onan gikan niini nga makatabang kanato sa pagkahibalo sa labing maayong paagi sa pag-ampo.
Kasagaran sa atong pag-ampo, mangayo kita niining o nianang pabor gikan sa atong Ginoo. Iampo nato ang mga butang nga gusto natong ihatag ni Jesus kanato. Apan kini nga sugilanon nagpakita kanato nga lahi ang gusto ni Jesus alang kanato. Una, buot Niyang ihatag kanato ang kapasayloan sa atong mga sala. Mao kini ang Iyang giuna, ug mao usab kini ang angay natong unahon. Human mapasaylo ang mga sala niining paralisado, giayo usab siya ni Jesus isip pamatuod sa Iyang gahom sa pagpasaylo sa mga sala. Kini nga sugilanon angayng makatabang kanato sa paghan-ay sa atong mga prayoridad sa pag-ampo sumala sa mga prayoridad ni Jesus. Kon unahon nato ang pagbasol sa sala, makasalig kita nga tubagon kita ni Jesus. Gikan niana, nasayod si Jesus sa tanan natong panginahanglan. Mahimo natong idangop kini Kaniya, apan human lamang kita mapasig-uli ngadto Kaniya diha sa kinahiladman sa atong kasingkasing.
Pamalandongi karon ang paagi sa imong pag-ampo matag adlaw. Paningkamoti nga masabtan ang kamahinungdanon sa adlaw-adlaw nga pagsusi sa imong mga sala. Kinahanglan kini mahimong una ug labing mahinungdanong bahin sa imong adlaw-adlaw nga pag-ampo. Bisan tuod daghang tawo ang dili gustong mosusi sa ilang mga sala, mas sayon kini buhaton kon dili kaayo ang sala ang gipunting kondili ang kalooy sa kapasayloan ug ang espirituhanong pag-ayo nga imong gikinahanglan. Samtang mas maamgohan nimo ang imong mga sala matag adlaw, mas daghang kalooy ang imong madawat. Ug samtang mas daghang kalooy alang sa kapasayloan sa imong mga sala ang imong madawat, mas madagayaong makapanalangin kanimo ang atong Ginoo sa ubang mga paagi. Sugdi kanunay sa kalooy sa atong Ginoo ug sa imong kaugalingong panginahanglan niana nga kalooy matag adlaw, ug ang tanan pang uban atimanon sa atong Ginoo.
Akong maluloy-ong Ginoo, gitinguha Mo nga ang akong pagpasig-uli Kanimo, diha sa kinasulorang kahiladman sa akong kasingkasing, mao ang akong unahon matag adlaw sa pag-ampo. Gitinguha Mo nga pasayloon ug ayohon ako aron mas masuod ako Kanimo. Palihog, pasayloa gayod ako sa akong mga sala, minahal kong Ginoo, ug tabangi ako nga mas maamgohon sa mga paagi nga makasala ako batok Kanimo ug sa uban matag adlaw. Nagpasalamat na ako daan Kanimo alang niining makaluwas nga grasya ug kalooy. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Junipero Serra, Pari
Mga Kapilian sa mga Basahon sa Misa
