Giandam Pinaagi sa Gugmang Putli

Agosto 27, 2021
Biyernes sa Ika-21 nga Semana sa Ordinaryong Panahon
Mga Pagbasa Karong Adlawa

Paminaw sa Iningles

Gisugilon ni Jesus sa Iyang mga tinun-an kining sambingaya: “Ang Gingharian sa langit mahisama sa napulo ka mga ulay nga nagdala sa ilang mga lampara ug migula aron pagsugat sa pamanhonon. Ang lima kanila mga buang-buang ug ang lima maalamon.” Matthew 25:1–2

Ang “napulo ka mga ulay” niini nga sambingay nagtumong sa mga abay nga babaye nga nagsunod sa kostumbre sa mga Judio pinaagi sa pag-adto sa balay sa pangasaw-onon aron hulaton ang pag-abot sa pamanhonon alang sa kasal. Kini nga sambingay usa sa pipila ka mga sambingay nga gisugilon ni Jesus nga nagpasiugda sa kamahinungdanon sa pagkamabinantayon sa atong Kristohanong pagkinabuhi. Samtang nagpadayon ang sambingay, gisultihan kita nga nalangan ang pamanhonon ug nahikatulog ang mga abay. Sa ilang pagmata, ang mga buang-buang wala nay lana alang sa ilang mga lampara ug kinahanglang mobiya aron magkuha pa. Sa ilang pagbalik, ilang nadiskobrehan nga miabot na ang pamanhonon ug gitrangkahan na ang pultahan. Unya nanuktok sila ug miingon, “Ginoo, Ginoo, ablihi kami sa pultahan!” Apan mao kini ang tubag kanila, “Sa pagkatinuod, sultihan ko kamo, wala ako makaila kaninyo.” Ug wala sila makaapil sa kasaulogan sa kasal.

Sa tradisyonal nga pagsabot, ang “lana” nagtumong sa gugmang putli. Yano ra ang mensahe. Samtang nangandam kita sa pagpakigkita sa atong Ginoo didto sa Langit, dili igo ang pag-angkon nga mga Kristohanon kita. Kinahanglan usab kitang mamunga sa maayong bunga sa gugmang putli pinaagi sa atong mga buhat. Ang pagtuo kinahanglan mosangpot sa gugmang putli; kon dili, dili gayod kini tinuod nga pagtuo.

Kinahanglan natong seryosohon kini nga sambingay. Angay nato kining gamiton kanunay isip basihan sa pagsusi sa atong kinabuhi mahitungod sa gugmang putli nga anaa kanato…o wala kanato. Kon imong tan-awon ang imong kinabuhi, aduna ka bay matudlo nga naandan nimong mga buhat sa gugmang putli nga nagagikan sa imong gugma sa Diyos ug gipahat ngadto sa uban? Ang gugmang putli wala ibase sa imong personal nga mga gusto sa kinabuhi. Wala kini ibase sa unsay imong ganahang buhaton. Ang gugmang putli kanunayng dili hakog ug andam mosakripisyo. Kanunay kining nagtinguha sa kaayohan sa uban. Unsa kadako ang gugmang putli nga buhi sa imong kinabuhi? Tin-aw nga gisugilon ni Jesus kini nga sambingay tungod kay nasayod Siya nga daghan ang nagpahayag og pagtuo sa Diyos apan wala magkinabuhi sa gugma sa Diyos. Sayon kaayo ang pagpadayon sa atong adlaw-adlaw nga kinabuhi, nga nagbuhat sa atong gibuhat tungod sa atong personal nga mga gusto o dili gusto. Apan lisod kaayo ang pagpalambo sa tinuod nga gugmang putli sulod sa atong mga kalag ug ang makanunayong pagpili sa paghigugma sa uban tungod kay kini alang sa ilang kaayohan.

Kinahanglan kitang maningkamot sa pagpalambo sa gugmang putli, una sa tanan, diha sa atong mga hunahuna. Kinahanglang wagtangon ang mga hunahuna nga mapanaway ug mahukmanon, ug kinahanglan kitang maningkamot sa pagtan-aw sa uban sama sa pagtan-aw sa Diyos kanila. Ang gugmang putli kinahanglan usab mogiya sa atong mga pulong. Ang atong mga pulong kinahanglan makapadasig sa uban, maluloton, matinabangon ug maluluy-on. Ang atong mga buhat mahimong puno sa gugmang putli kon manggihatagon kita sa atong panahon, maningkamot bisan pa og makahasol kini kanato aron makaalagad, ug makugihon sa mga paagi sa atong pagpahayag sa gugma alang sa uban.

Pamalandongi karon ang halangdong pagtawag nga gihatag kanimo sa pagkinabuhi sa gugmang putli nga makita ug mapadayag sa mga buhat. Paggahin og panahon sa pagpamalandong kon unsa gayod ang gugmang putli. Gitugotan ba nimo ang imong kaugalingon nga magiyahan sa usa ka mas kalibotanon ug hakog nga matang sa “gugma?” Mas naglihok ka ba tungod sa hakog nga mga gusto kay sa paghatag sa kaugalingon ug pagsakripisyo? Tinuod ba nimong gipalig-on ang uban ug gipakita kanila ang gugma sa Diyos? Paningkamoti nga tubagon kining mga pangutanaha sa seryosong paagi. Kini nga sambingay nga gisugilon sa atong Ginoo labaw pa gayod sa usa lamang ka sugilanon. Kamatuoran kini. Ug ang kamatuoran mao nga ang uban moabot sa adlaw sa paghukom nga walay gikinahanglang “lana” alang sa ilang mga lampara. Seryosoha ang atong Ginoo ug susiha ang imong pagkinabuhi sa gugmang putli. Kon asa ka nakulang, magmadasigon ka sa imong tahas sa pagbag-o. Sa kataposan, mapasalamaton ka hangtod sa kahangtoran nga gibuhat nimo kini.

Akong mahigugmaong Ginoo, Imong gipakita kanamong tanan nga ang tinuod nga gugma dili hakog ug andam mosakripisyo. Mianhi Ka niining kalibotana aron moalagad ug mohalad sa Imong balaang kinabuhi alang kanamong tanan. Hinaot nga mas hingpit kong ablihan ang akong kinabuhi sa Imong gugma aron kini usab makahulma ug makagiya sa tanan nakong relasyon. Pun-a ako sa gasa sa gugma, minahal nga Ginoo, aron hingpit akong maandam alang sa adlaw sa akong partikular nga paghukom. Jesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Pamalandong sa Balaang Kasulatan alang sa Panahon sulod sa Tuig

Tanang Santos/Mga Kapistahan

Santos sa Adlaw – Santa Monica

Mga Kapilian sa mga Basahon sa Misa

Gipiling hulagway sa ibabaw: Ang Sambingay sa Maalamon ug Buangbuang nga mga Birhen ni Peter von Cornelius, pinaagi sa Wikimedia Commons

BAG-O!
Ang mga pamalandong alang sa Septiyembre–Nobiyembre anaa na sa eBook & paperback nga pormat.