Pagpaminaw ug Pag-ayo

Septiyembre 7, 2021
Martes sa Ikakawhaag-tulong Semana sa Ordinaryong Panahon
Mga Pagbasa Karong Adlawa

Paminaw sa Iningles

Ug mikunsad Siya uban kanila ug mitindog sa usa ka patag nga dapit. Usa ka dakong panon sa Iyang mga tinun-an ug daghang mga tawo gikan sa tibuok Judea ug Jerusalem ug sa kabaybayonan sa Tiro ug Sidon ang miabot aron maminaw Kaniya ug aron mamaayo sa ilang mga sakit; ug bisan kadtong gisakit sa mahugaw nga mga espiritu nangaayo usab. Ang tanan sa panon naninguha sa paghikap Kaniya kay adunay gahom nga migula gikan Kaniya ug nag-ayo kanilang tanan. Lucas 6:17–19

Ang Ebanghelyo ni Lucas nagpresentar kanato sa tradisyonal nga nailhang “Wali sa Kapatagan.” Hapit tanang gilakip ni Lucas niini nga wali makita usab sa “Wali sa Bukid” ni Mateo. Apan, nagdugang si Mateo og pipila ka mga pagtulon-an nga wala diha kang Lucas. Ang wali ni Mateo adunay tulo ka kapitulo samtang ang kang Lucas adunay usa lamang.

Niining pasiuna sa “Wali sa Kapatagan,” nga atong pagabasahon sa tibuok semana, gipunting ni Lucas nga daghang mga tawo ang nangabot gikan sa nagkalainlaing dapit, bisan sa halayo, aron maminaw kang Jesus. Kini nga panon naglakip sa daghang mga Judio, apan daghan usab ang gikan sa paganong teritoryo sa Tiro ug Sidon. Ug unsa man ang nakadani sa daghan kaayo kanila? Miabot sila aron “maminaw” kang Jesus nga nagwali ug aron “mamaayo.” Gusto nilang madungog ang mga pulong ni Jesus kay misulti Siya uban sa dakong awtoridad ug sa paagi nga nakapausab sa mga kinabuhi. Ug ilabi silang nahibulong sa gahom sa pag-ayo nga gipadayag ni Jesus. Ang kataposang linya sa teksto sa ibabaw naghatag og dakong gibug-aton niining tinguha nga mamaayo. “Ang tanan sa panon naninguha sa paghikap Kaniya kay adunay gahom nga migula gikan Kaniya ug nag-ayo kanilang tanan.”

Makapainteres nga daghan kaayong gamhanang mga milagro ang gihimo ni Jesus samtang nagpadayon Siya sa Iyang publikong ministeryo. Ilabi kining nahitabo sa pagsugod sa Iyang ministeryo. Alang sa daghang mga tawo, kalit Siyang nahimong inila kaayo ug gihisgotan sa daghang kasikbit nga mga lungsod. Apan makapainteres usab nga matikdan nga, sa paglabay sa panahon, mas gihatagan ni Jesus og gibug-aton ang Iyang pagtudlo kay sa mga milagro.

Unsa man ang nakadani kanimo ngadto sa atong Ginoo? Tingali kon daghang dayag nga mga milagro ang buhaton sa Diyos karon, daghang mga tawo ang mahingangha. Apan ang mga milagro sa lawas dili mao ang labing dakong buhat sa atong Ginoo ug, busa, dili kini angay mahimong pangunang tumong sa atong relasyon uban Kaniya. Ang pangunang hinungdan nga angay kitang madani ngadto sa atong Ginoo mao nga ang Iyang balaang Pulong motuhop sa kahiladman sa atong kasingkasing, mousab kanato ug modani kanato ngadto sa pakighiusa uban Kaniya. Tin-aw kining makita sa kamatuoran nga karon nga ang mensahe sa Ebanghelyo nakagamot na pag-ayo ug natukod na ang Simbahan, talagsa na ang mga milagro sa lawas. Mahitabo gihapon kini, apan dili sa samang paagi sa dihang gisugdan ni Jesus ang Iyang publikong ministeryo.

Pamalandongi karon ang pangunang hinungdan nganong nadani ka ngadto sa atong Ginoo. Pangitaa ang Iyang buhing Pulong, nga ginasulti diha sa kahiladman sa imong kasingkasing. Ang labing mahinungdanong milagro nga nahitabo karon mao ang pagbag-o sa sulod sa tawo. Sa dihang madungog sa usa ka tawo ang Diyos nga nagsulti, motubag siya nianang Pulonga, ug motugot Kaniya nga usbon ang iyang kinabuhi, usa kini sa labing mahinungdanong mga milagro sa grasya nga atong masinati. Ug mao kini ang pangunang hinungdan nga angay kitang madani ngadto Kaniya, mangita Kaniya ug mosunod Kaniya bisan asa Siya motultol.

Akong mahimalaong Ginoo, palihog kabiga ako nganha Kanimo samtang nagtudlo Ka sa kamingawan sa akong sulodnong kinabuhi sa kahilom ug pag-inusara. Tabangi ako sa pagpangita Kanimo aron madungog ko ang Imong Pulong, nga Imong gisulti kanako aron hatagan ako og bag-ong kinabuhi. Hinaot nga kanunay akong maminaw Kanimo aron ang Imong balaang Pulong labi pang makausab kanako, nga maghimo kanako nga bag-ong binuhat sumala sa Imong tinguha alang kanako. Jesus, misalig ako Kanimo.

Dugang nga mga Pamalandong sa Ebanghelyo

Mga Pamalandong sa Diosnong Kalooy

Mga Pamalandong sa Balaang Kasulatan alang sa Panahon sulod sa Tuig

Mga Santos/Kasaulogan Karong Adlawa

Mga Kapilian sa mga Basahon sa Misa

Pangunang hulagway sa ibabaw: Wali sa Bukid ni Cosimo Rosselli, pinaagi sa Wikimedia Commons

BAG-O!
Ang mga pamalandong alang sa Septiyembre–Nobiyembre anaa na sa eBook & paperback nga pormat.