Oktubre 6, 2021
Miyerkules sa Ikakawhaan ug Pito nga Semana sa Ordinaryong Panahon
Mga Pagbasa Karong Adlawa
San Bruno, Pari—Opsiyonal nga Handumanan
Beata Marie Rose Durocher, Birhen—Opsiyonal nga Handumanan sa USA
Paminaw sa Iningles
Si Jesus nag-ampo sa usa ka dapit, ug sa nahuman na Siya, usa sa Iyang mga tinun-an miingon Kaniya, “Ginoo, tudloi kami sa pag-ampo sama sa pagtudlo ni Juan sa iyang mga tinun-an.” Lucas 11:1
Pagkaanindot usab niining pag-ampoa alang kanato, “Ginoo, tudloi kami sa pag-ampo…” Ang tubag ni Jesus niining tinun-ana mao ang pagtudlo kaniya sa pag-ampo nga “Amahan Namo.” Mahitungod niining pag-ampoa, si San Andre Bessette miingon, “Sa dihang imong litokon ang Amahan Namo, ang dalunggan sa Diyos anaa tupad sa imong mga ngabil.” Ang bantogang mistika ug Doktor sa Simbahan nga si Santa Teresa sa Ávila mihatag niining tambaga sa pag-ampo sa Pag-ampo sa Ginoo: “Mas daghan pa ang mahimo sa usa ka pulong sa Amahan Namo nga litokon matag karon ug unya gikan sa atong kasingkasing, kay sa tibuok pag-ampo nga balikbalikon sa daghang higayon nga dinalian ug walay pagtagad.” Ug si Santa Thérèse sa Lisieux miingon nga ang “Amahan Namo” maoy usa sa mga pag-ampo nga iyang giampo sa dihang mibati siya og hilabihang pagkauga sa espiritu nga dili siya makahugpong bisan usa ka makahuloganong hunahuna.
Sa Santos nga Misa, sa dihang ang pari modapit sa katawhan sa Diyos sa pag-ampo sa “Amahan Namo,” siya moingon, isip bahin sa iyang pagdapit, nga kini usa ka pag-ampo nga “…mangahas kita sa pag-ingon.” Makapainteres kini nga pahayag nga ilabinang nagpadayag sa maisogong pagsalig sa usa ka bata nga gitawag kitang batonan samtang sinsero kitang nag-ampo niini gikan sa kasingkasing. Dako gayod nga pagpangahas ang pagtawag sa Diyos nga atong “Amahan.”
Ang Kapitulo 11 sa My Catholic Worship, nga nagtanyag og pagtulon-an bahin niining hingpit nga pag-ampo, nagpahayag sa mosunod mahitungod niining maisogong pagsalig:
Ang matag Kristohanon kinahanglan motan-aw sa Amahan isip akong Amahan. Kinahanglan natong ilhon ang atong kaugalingon isip mga anak sa Diyos ug moduol Kaniya uban sa pagsalig sa usa ka bata. Ang bata nga adunay mahigugmaong ginikanan dili mahadlok nianang ginikanana. Hinunoa, ang mga bata adunay dakong pagsalig nga gihigugma sila sa ilang mga ginikanan bisan unsa pa man ang mahitabo. Bisan kon makasala sila, nasayod ang mga bata nga gihigugma gihapon sila. Kini kinahanglan maoy sukaranang sinugdanan sa tanan natong pag-ampo. Kinahanglan kitang magsugod sa pagsabot nga gihigugma kita sa Diyos bisan unsa pa man ang mahitabo. Uban niining pagsabot mahitungod sa Diyos, mabatonan nato ang tanang pagsalig nga atong gikinahanglan aron sa pagtawag Kaniya.
Tungod kay daghan kanato ang sinati na kaayo niining sulondang pag-ampo nga gitudlo kanato sa atong Ginoo Mismo, adunay tentasyon nga ampo-on kini sa mekanikal nga paagi. Sayon ra kitang masipyat sa paglitok niini gikan sa kinahiladman sa atong mga kasingkasing, nga ang matag pulong atong himoong kaugalingong pag-ampo, ug ihalad uban sa kinadak-ang pagsalig ngadto sa atong mahigugmaong Amahan sa Langit.
Giunsa nimo pag-ampo ang Pag-ampo sa Ginoo? Giampo ba nimo kini tungod lamang sa naandan, nga wala hingpit masabti ug kinasingkasinga ang mga pulong nga imong giampo? Lagmit mao kini ang kahimtang sa kadaghanan.
Pamalandongi karong adlawa kining labing balaang pag-ampo nga gihatag kanato sa Anak sa Dios Mismo. Siya ang nagtudlo niining hingpit nga pag-ampo, busa angay natong himoon kini nga pundasyon sa tanan natong pag-ampo. Sulayi pagsunod ang tambag ni Santa Teresa sa Ávila nga gikutlo sa ibabaw. Hinayhinaya pag-ampo ang matag pulong niini, uban sa tinuyong pagtagad ug gugma. Sugdi pinaagi sa pag-ila sa Dios isip imong Amahan. Pamalandongi ang Iyang walay kinutobang pag-atiman kanimo isip usa ka hingpit nga amahan. Ilha Siya sa tinuod, suod, ug personal nga paagi. Kining hingpit nga pag-ampo nagsugod sa pag-ila kon Kinsa ang Dios ug dayon nagpadayon sa pito ka hingpit nga mga pangamuyo. Human nimo maampo ang pasiuna niining pag-ampo, pagpili og usa sa pito ka mga pangamuyo aron pamalandongan, aron ang kadato niining pag-ampo makapausab sa imong kalag.
Amahan namo, nga anaa sa langit, pagdaygon ang imong ngalan. Umabot kanamo ang imong gingharian. Matuman ang imong pagbuot dinhi sa yuta maingon sa langit. Ang kalan-on namo sa matag adlaw ihatag kanamo karong adlawa, ug pasayloa kami sa among mga sala, maingon nga kami nagapasaylo sa mga nakasala kanamo, ug dili mo kami itugyan sa panulay, hinunoa luwasa kami gikan sa dautan. Hesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos sa Adlaw –
Beata Marie Rose Durocher, Birhen
Mga Kapilian sa mga Basahon sa Misa
Gipiling hulagway sa ibabaw: San Pedro ug San Pablo, pinaagi sa flickr
