Disyembre 9, 2021
Huwebes sa Ikaduhang Semana sa Adbiyento
Mga Pagbasa Karong Adlawa
San Juan Diego, Ermitanyo—Opsiyonal nga Handumanan
Paminaw sa Iningles
“Sa pagkatinuod, sultihan ko kamo, taliwala sa mga natawo sa mga babaye, walay mitungha nga mas labaw kang Juan Bautista; apan ang labing ubos sa Gingharian sa langit mas labaw pa kaniya.” Mateo 11:11
Sama sa atong pagpamalandong kang San Juan Bautista sa miaging Domingo, ang iyang pagpamatuod gipakita usab kanato sa Ebanghelyo karong adlawa. Si Juan halangdon una sa tanan tungod sa iyang pagkamapainubsanon. Apan giklaro usab ni Jesus nga ang pagkahalangdon ni Juan isip labing halangdon sa mga Propeta sa Daang Tugon walay ikatandi sa pagkasakop sa Gingharian sa Langit!
Ang Langit kinahanglang mao ang atong tumong. Kinahanglang mao kini ang katuyoan sa atong kinabuhi. Unsay kapuslanan kon makab-ot nato ang dakong pagkahalangdon niining kalibotana apan dili kita makaabot sa Langit?
Makaiikag nga wala gipakaubos ni Jesus si San Juan niining pamahayag, kay si “San” Juan Bautista anaa sa Langit. Hinunoa, Iyang gipunting nga si Juan halangdon dili lamang tungod sa iyang pagkamapainubsanon ug sa tanan niyang gibuhat niining kinabuhia, kondili mas halangdon pa siya kay karon iyang gipahimuslan ang mga ganti sa kinabuhing dayon sa Langit.
Kasagaran kaayo, gisukod nato ang atong kinabuhi sumala sa kalibotanong panglantaw. Gipangita nato ang pagkahalangdon dinhi ug karon ug wala nato mailhi nga ang kahangtoran mao ang labing mahinungdanon.
Pamalandongi kini. Unsa may imong ikalipay sa tibuok kahangtoran? Ikalipay ba nimo nga nakab-ot nimo kini o kana niining kalibotana? Nga nakakwarta kag daghan? Nga gidayeg ka sa daghang tawo niining kalibotana? Dili, kon atua ka na sa Langit, wala nay bili kining tanan. Usa ra ka butang ang mahinungdanon: ang gugma.
Ang gugma nga atong gipuy-an dinhi ug karon mosidlak gikan sa atong kinabuhi hangtod sa kahangtoran didto sa Langit. Bisan kon ang atong gugma dili makita sa uban, makita kini sa Langit. Ang gugma mao ang bunga sa kinabuhing hingpit nga gitugyan kang Kristo.
Pamalandongi karong adlawa ang kataposang tumong nga makaabot sa Langit, ug tan-awa nga ang adlaw-adlaw nga mga buhat sa gugma mao ang dalan padulong niining tumonga. Mao ba kini ang imong gitutokan sa kinabuhi? Kon dili, susiha ang imong mga prayoridad ug itugyan pag-usab ang imong kaugalingon niining walay kataposang tawag.
Ginoo, nagtinguha ako nga makauban Ka hangtod sa kahangtoran sa Langit. Tabangi ako nga ang kahangtoran maoy akong unang tutokan sa kinabuhi. Tabangi ako sa pagtukod og mahimayaong kinabuhi sa Langit pinaagi sa gugma nga akong gipuy-an karon. Jesus, misalig ako Kanimo.
Tan-awa ang tanan namong mga Kapanguhaan alang sa Adbiyento
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Adbiyento
Santos sa Adlaw – San Juan Diego, Ermitanyo
Mga Kapilian sa mga Basahon sa Misa
