Enero 21, 2022
Biyernes sa Ikaduhang Semana sa Ordinaryong Panahon
Mga Pagbasa Karong Adlawa
Santa Agnes, Birhen ug Martir—Paghandum
Paminaw sa Iningles
Misaka si Jesus sa bukid ug gitawag Niya ang mga tawo nga Iyang gusto, ug miduol sila Kaniya. Marcos 3:13
Kini nga teksto sa Kasulatan nagpakita nga gitawag ni Jesus ang Iyang mga Apostoles sa pagsaka sa bukid aron sa pagtugyan kanila sa katungdanan sa pagsangyaw ug sa paghingilin sa mga demonyo sa Iyang ngalan. Usa ka mahinungdanong bahin niining tekstoha sa Kasulatan mao nga gitawag ni Jesus ang mga Apostoles sa “pagsaka sa bukid.”
Ang tanang gibuhat ni Jesus sa Iyang kinabuhi puno sa kahulogan. Kining partikular nga buhat adunay dakong simbolikong kahulogan. Ang pagtugyan sa mga Apostoles sa katungdanan sa pagsangyaw ug sa paghingilin sa mga demonyo nahitabo lamang human sila misaka sa bukid agig tubag sa pagdapit ni Jesus. Nganong gibuhat man lamang Niya kini human Niya tawga ang Iyang mga Apostoles sa pagsaka sa bukid?
Ang bukid usa ka simbolo sa atong panaw ngadto sa Dios. Nagpasabot kini nga kita kinahanglang mosaka paingon Kaniya. Ug nagpadayag kini nga masangkap lamang kita sa atong gikinahanglan aron molakaw ug motuman sa kabubut-on sa Dios human una kitang mosaka aron makigkita Kaniya.
Ang “bukid” nga gitawag kitang sakahon mao, labaw sa tanan, ang pag-ampo. Matag adlaw, kinahanglang mosaka kita aron makigkita sa atong Ginoo, nga mangita Kaniya pinaagi sa usa ka kinabuhi sa hingpit nga pagtugyan sa kaugalingon. Gitawag kita ni Jesus ngadto Kaniya, diin naghulat Siya kanato aron makig-uban kita Kaniya nga kita ra ug Siya, nga malipay sa Iyang mahimayaong presensya.
Kon dili kita mosaka nianang bukira uban sa atong Ginoo, dili kita masangkapan sa gikinahanglan aron matuman ang balaang buluhaton nga Iyang gitugyan kanato. Kulang ang atong pagpangandam sa pagdala sa Iyang gugma ug kalooy ngadto sa kalibotan nga nanginahanglan.
Pamalandongi karong adlawa ang pagdapit ni Jesus kanimo sa pagsunod Kaniya sa pagsaka sa bukid sa pag-ampo. Tubaga kana nga pagdapit aron unya ipadala ka Niya sa pagtuman sa Iyang balaang sugo sa gugma.
Akong Ginoo nga nagdapit kanako, gidawat ko gayod ang Imong malumong pagdapit sa pagsaka sa bukid sa pagtuo ug pag-ampo. Nangandoy ako sa pagpangita Kanimo ug sa pag-uban Kanimo. Samtang makigkita ako Kanimo diha sa pag-ampo, hatagi ako sa grasya nga akong gikinahanglan aron unya molakaw ug motuman sa Imong balaang kabubut-on. Jesus, nagsalig ako Kanimo.
Nobena nga 9 ka Adlaw alang sa Kinabuhi
Enero 19–27
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – Santa Ines, Birhen ug Martir—Handumanan
Mga Kapilian sa mga Basahon sa Misa
Gipasiugda nga Libro:
Daily Reflections for Ordinary Time:
Weeks 1-17
Ang Daily Reflections for Ordinary Time: Weeks 1–17 gikan sa Catholic Daily Reflections Series usa ka basahon alang sa adlaw-adlaw nga pag-ampo nga nagtanyag og mga pamalandong sa Ebanghelyo sa adlaw sa praktikal nga paagi, matinud-anon sa pagtuo ug duol sa adlaw-adlaw nga kinabuhi. Ang mga bersiyon nga eBook ug paperback gihan-ay aron magamit kini nga libro tuig human sa tuig. Ang mga pamalandong wala espesipikong gitakdaan og mga petsa alang sa Kasagarang Panahon sa 2022, kondili naglangkob sa tanang kapilian alang niini ug sa umaabot nga mga tuig sa liturhiya, busa kini usa ka basahon sa pag-ampo nga magamit matag tuig.
