Oktubre 3, 2022
Lunes sa Ikakawhaag-pitong Semana sa Panahon sa Tuig
Mga Pagbasa Karong Adlawa
Paminaw sa Iningles
“Sa imong hunahuna, kinsa niining tulo ang nahimong isigkatawo sa nabiktima sa mga tulisan?” Mitubag siya, “Ang nagpakita kaniya og kaluoy.” Miingon si Jesus kaniya, “Lakaw ug buhata usab kana.” Lucas 10:36-37
Ania kanato ang panapos sa pamilyar nga sugilanon sa Maayong Samarianhon. Una, gikulata sa mga tulisan ang usa ka tawo ug gibiyaan siya nga hapit nang mamatay. Unya usa ka pari ang miagi ug wala siya tagda. Ug dayon usa ka Levita ang miagi nga wala usab magtagad kaniya. Sa kataposan, miagi ang Samarianhon ug giatiman siya uban sa dakong pagkamanggihatagon.
Makapainteres nga sa dihang gipangutana ni Jesus ang mga tinun-an kon kinsa niining tulo ang milihok isip isigkatawo, wala sila motubag og “ang Samarianhon.” Hinuon, mitubag sila, “Ang nagpakita kaniya og kaluoy.” Ang kaluoy mao ang sentrong gipasiugda.
Sayon kaayo ang paghukom ug ang pagkamapintas sa usag usa. Kon mobasa ka sa mga mantalaan o maminaw sa mga komentarista sa balita, dili ka makalikay sa pagkadungog sa walay hunong nga paghukom ug pagkondenar. Ang atong tawhanong kinaiya nga nahulog sa sala daw nagmalipayon sa pagsaway sa uban. Ug kon dili man kita manaway, kanunay usab kitang matintal sa paglihok sama sa pari ug sa Levita niining sugilanona. Matintal kita sa pagpakabuta-buta sa mga nanginahanglan. Ang yawe mao ang kanunay nga pagpakita og kaluoy, ug ang pagpakita niini sa hilabihan ka madagayaong paagi.
Pamalandongi karong adlawa ang tawag sa Dios kanimo sa pagpakita og kaluoy. Aron mahimong tinuod nga kaluoy, kinahanglan nga adunay kasakit. Kinahanglan kini “mosakit” sa diwa nga nagkinahanglan kini nga imong biyaan ang imong garbo, kahakog ug kasuko ug pilion hinuon ang pagpakita og gugma. Pilion nimo ang pagpakita og gugma hangtod nga kini mosakit. Apan kana nga kasakit usa ka tinuod nga tinubdan sa kaayohan kay naghinlo kini kanimo gikan sa imong sala. Gikutlo si Santa Madre Teresa nga nag-ingon, “Akong nadiskobrehan kining daw nagkasumpaki nga kamatuoran: kon mohigugma ka hangtod nga kini mosakit, wala nay kasakit, kondili dugang pa nga gugma.” Ang kaluoy mao ang matang sa gugma nga mahimong mosakit sa sinugdan, apan sa kataposan gugma na lamang ang mahibilin.
Maluloy-ong Ginoo, himoa gayod akong instrumento sa Imong gugma ug kaluoy. Tabangi ako sa pagpakita og kaluoy ilabina kon lisod ang kinabuhi ug kon dili ko gustong buhaton kini. Hinaot nga kadtong mga higayona mapuno sa grasya, diin Imo akong usbon aron mahimong Imong gasa sa gugma. Jesus, misalig ako Kanimo.
Ang Oktubre mao ang bulan sa Santos nga Rosaryo
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos/Kasaulogan Karong Adlawa
Mga Kapilian sa mga Basahon sa Misa
