Disyembre 6, 2022
Martes sa Ikaduhang Semana sa Adbiyento
Mga Pagbasa alang sa Karon
San Nicolas, Obispo—Opsiyonal nga Handumanan
Paminaw sa Iningles
“Miingon si Jesus sa iyang mga tinun-an: “Unsa may inyong hunahuna? Kon ang usa ka tawo adunay usa ka gatos ka karnero ug ang usa niini mahisalaag, dili ba niya biyaan ang kasiyaman ug siyam didto sa kabungtoran ug mangita sa nahisalaag?” Mateo 18:12
Nagpadayon kining teksto sa Ebanghelyo sa pag-ingon nga ang tawo nga makakaplag sa maong usa ka nahisalaag nga karnero “mas malipay niini kay sa kasiyaman ug siyam nga wala mahisalaag.” Sa unang pagtan-aw, morag dili kini makiangayon. Nganong dili man unahon ang pagkalipay sa kasiyaman ug siyam nga wala mahisalaag? Si San Hilario, sa iyang komentaryo niini nga teksto, naghubad nga ang tawo nga nangita sa usa ka nahisalaag nga karnero mao ang Anak sa Dios. Gibiyaan Niya ang “kasiyaman ug siyam,” nga nagpasabot sa himaya sa mga panon sa Langit, aron mokanaug sa yuta ug pangitaon ang nahisalaag nga katawhan. Ang tibuok katawhan mao kanang usa ka nawala nga karnero. Naglakip kana kanatong tanan.
Ang unang butang nga gipadayag kanato niini nga paghubad mao nga ang Anak sa Dios tin-aw nga gipadala sa usa ka misyon sa pagpangita sa matag usa kanato human kita mahisalaag ug mahilayo sa Amahan sa Langit. Ang Amahan wala magpabilin lamang nga naghulat sa atong pagbalik. Hinunoa, Iyang gipadala ang Anak sa usa ka makugihong misyon sa pagpangita kanato aron ibalik kita sa Iyang balaang toril.
Samtang mamalandong kita niini nga teksto, importante nga makita nato ang kadasig ug determinasyon sa atong Ginoo samtang Siya nangita kanato. Nakita ba nimo kini sa imong kaugalingong kinabuhi? Usahay malit-agan kita sa paghunahuna nga ato unang responsibilidad ang pagpangita sa Dios. Ug bisan tuod aduna gayod kitay maong responsibilidad, mas mogaan ang atong katungdanan kon masabtan nato kon unsa ka mainiton ang atong Ginoo sa pagpangita kanato ug kon unsa kadako ang Iyang tinguha nga makaplagan kita kon mahisalaag kita. Sa Langit lamang nato hingpit nga masabtan ang tanan nga gibuhat sa atong Ginoo aron pangitaon kita, adlaw-adlaw. Apan karon, kinahanglan kitang maningkamot sa pagsabot niining espirituhanong kamatuoran aron mas bukas kita sa makugihong pagpangita ni Jesus kanato.
Ang ikaduhang butang nga gipadayag niini nga teksto mao ang kalipay sa Kasingkasing sa Anak sa Dios matag higayon nga makaplagan kita Niya ug kargahon palayo sa atong sala. Kanunay kaayo kitang malit-agan sa pagtan-aw sa Dios isip usa ka mahukmanong Dios nga nasuko kanato ug nagkondenar kanato. Apan kon masabtan nato kon hangtod asa miabot ang Anak sa Dios aron lamang makaplagan kita kon mahisalaag kita, ug kon masabtan nato ang kalipay sa Iyang kasingkasing sa dihang makaplagan kita Niya ug kargahon palayo sa sala, nan mas andam kitang moabli sa atong kaugalingon ngadto Kaniya, sa Iyang malumong mga pagdapit, ug sa Iyang maloloy-ong Kasingkasing matag higayon nga moduol Siya kanato pinaagi sa grasya.
Pamalandongi karon ang dakong pagpaabot diha sa Kasingkasing sa atong Ginoo samtang Siya mismo nangita kanimo. Kini usa ka pagpaabot nga puno sa kalipay—ang kalipay nga mopuno Kaniya sa dihang alsahon ka Niya ug malumong kargahon balik ngadto sa Amahan. Tugoti nga matuman kining kalipay sa Kasingkasing sa atong Ginoo aron makaambit ka niining madagayaong kalipay.
Akong makugihong Ginoo, gipangita Mo ako, adlaw ug gabii, ug wala Ka gayod kapoyig pagtawag kanako nga mobalik sa mas bug-os nga paagi nganha Kanimo. Palihog tabangi ako nga pun-on ang Imong Kasingkasing sa kalipay pinaagi sa kanunayng pagtubag sa Imong malumong mga pagdapit sa gugma ug kalooy. Jesus, nagsalig ako Kanimo.
Nobena sa Imakulada Concepcion
Nobyembre 29-Disyembre 7
Tan-awa ang tanan namong mga Kapanguhaan alang sa Adbiyento
Nobena sa Pasko ni San Andres
Ang pag-ampo sa Nobena sa Pasko ni San Andres sa ubos naandang ampoan og 15 ka higayon matag adlaw gikan sa Nobyembre 30, ang Pista ni San Andres, hangtod sa Bisperas sa Pasko.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Adbiyento
Santos sa Adlaw – San Nicolas, Obispo—Opsyonal nga Handumanan
Mga Kapilian sa mga Basahon sa Misa
Pangunang Hulagway: Si Jesus Isip Maayong Magbalantay
