Ang Inspirasyong Gisaad sa Diyos

Lunes, Disyembre 26, 2022

San Esteban, ang Unang Martir—Pista
Ikaduhang Adlaw sa Oktaba sa Pasko, Disyembre 26

Paminaw sa Iningles

“Sa dihang itugyan nila kamo, ayaw kabalaka kon unsaon ninyo pagsulti o unsay inyong isulti. Ihatag kaninyo nianang higayona ang inyong isulti. Kay dili kamo ang mosulti kondili ang Espiritu sa inyong Amahan nga mosulti pinaagi kaninyo.” Mateo 10:19–20

Kining mga pulong sa atong Ginoo natuman sa kinabuhi ni San Esteban, ang unang martir sa Simbahan. Si San Esteban gimartir sulod sa mga duha ka tuig human sa pagsaka ni Jesus ngadto sa Langit. Usa siya sa pito ka diyakono nga gitudlo sa mga Apostoles aron motabang kanila sa ilang buluhaton sa pag-atiman sa mga kabos samtang nagsugod pagtubo ang Simbahan.

Si Esteban usa ka tawo nga adunay lawom nga pagtuo ug napuno sa Espiritu Santo. Human siya matudlo nga diyakono, misugod siya sa pagsangyaw uban sa kaisog. Lakip sa iyang mga tigpaminaw ang mga sakop sa sinagoga sa mga Judiong nagsultig Grego. Maisogong nakiglantugi si Esteban kanila ug gipamatud-an niya nga puno siya sa kaalam ug gahom, nga naghimo og daghang mga timailhan ug mga kahibulongan diha sa ilang taliwala. Apan tungod niini, misamot lamang ang kasuko sa iyang mga tigpaminaw hangtod nga nagtinguha na sila sa iyang kamatayon. Busa, bakak nilang giangkon nga si Esteban nagsangyaw batok sa Templo ug sa Balaod ni Moises.

Sa Mga Buhat sa mga Apostoles (Acts 7:2–53), mitubag si Esteban pinaagi sa usa ka taas ug detalyadong pakigpulong diin iyang gipasabot ang tibuok kamatuoran mahitungod kang Jesus diha sa kahayag sa Daang Tugon. Gitapos kini ni Esteban sa pag-ingon, “Kamong mga gahig ulo, nga wala matuli ang kasingkasing ug mga dalunggan, kanunay ninyong gisupak ang Espiritu Santo; sama ra gayod kamo sa inyong mga katigulangan.” Kini misamot pa sa kasuko sa iyang mga tigpaminaw didto sa sinagoga. Human niini, adunay nahitabong tinuod nga milagroso. Si Esteban nakakita og usa ka panan-awon. Mihangad siya sa Langit ug miingon, “Tan-awa, nakita ko ang kalangitan nga naabli ug ang Anak sa Tawo nga nagbarog sa tuo sa Diyos.” Nakita niya ang iyang Ginoo, nga nagbarog sa tuo sa Amahan. Ug ang iyang pagpahayag niining panan-awona mao gayoy nagtukmod sa nasukong panon sa pagguyod kaniya pagawas sa sinagoga ug sa siyudad ug sa pagbato kaniya hangtod mamatay. Apan ang sugilanon ni Esteban natapos sa usa ka matahom ug dinasig nga paagi. Samtang gibato siya sa panon, namulong siya og duha ka gamhanang pahayag. Una, miingon siya, “Ginoong Jesus, dawata ang akong espiritu.” Ug unya nag-ampo siya sa makusog nga tingog, “Ginoo, ayaw ipasangil kanila kining salaa.”

Sama sa gihisgotan sa ibabaw, ang mga pulong nga gisulti sa atong Ginoo sa Ebanghelyo karong adlawa natuman sa kinabuhi ni San Esteban. Una sa tanan, makita nato nga ang panagna ni Jesus nga ang pipila sa Iyang mga sumusunod itugyan ngadto sa kamatayon sa ilang kaugalingong mga kabanay natuman sa kinabuhi ni San Esteban. Apan misaad usab si Jesus nga kon mahitabo kini, “Ihatag kaninyo nianang taknaa ang inyong isulti.” Ug ang Espiritu sa Amahan mao ang “mosulti pinaagi kaninyo.” Ug mao gayod kini ang nahitabo kang San Esteban. Una, gihatagan siya og mahimayaong panan-awon sa Langit. Ikaduha, gidasig siya sa pagtugyan sa hingpit sa iyang espiritu ngadto kang Jesus. Ug ikatulo, gidasig siya sa pag-ampo alang sa iyang mga maglulutos ug sa pagpasaylo kanila. Kining mga pulong ug mga buhat wala maggikan kang Esteban lamang. Katumanan kini sa saad ni Jesus nga kon ang usa ka tawo lutoson tungod sa Ebanghelyo, ang Amahan maanaa sa pinasahing paagi ug mohatag og gamhanang inspirasyon sa takna sa panginahanglan.

Pamalandongi karon ang lawom nga kamatuoran nga dili gayod kita biyaan sa Dios. Sa pagkatinuod, sa mga higayon nga labing nag-antos kita o nakaagom og paglutos, pagsalikway, o bisan unsang matang sa pagdaogdaog, ang Dios labi nang anaa uban kanato. Tan-awa ang imong kaugalingong kinabuhi ug palandonga ang mga higayon nga labing malisod alang kanimo. Pag-ampo kang San Esteban ug hangyoa siya nga mag-ampo alang kanimo aron bukas ka sa dinasig nga mga pulong ug mga buhat sa atong Ginoo sa mga higayon nga labing gikinahanglan nimo kini.

Labing mahimayaong San Esteban, palihog pag-ampo alang kanako. Pag-ampo alang kanako ilabina sa mga higayon nga akong giantos ang labing bug-at nga mga krus sa akong kinabuhi. Iampo nga, sama kanimo, bukas ako sa inspirasyon ug grasya sa Dios sa mga higayon nga labing gikinahanglan nako kini. San Esteban, pag-ampo alang kanako. Jesus, ako misalig Kanimo.

Tan-awa ang among mga kapanguhaan alang sa Pasko!

Mga Pamalandong sa Balaang Kasulatan