Enero 17, 2023
Martes sa Ikaduhang Semana sa Kasagarang Panahon
Mga Pagbasa Karong Adlawa
San Antonio sa Ehipto, Abad—Handumanan
Paminaw sa Iningles
Samtang si Jesus miagi sa usa ka umahan sa trigo sa Adlaw nga Igpapahulay, ang Iyang mga tinun-an nagsugod sa pag-agi niini samtang nangutlo sa mga uhay. Tungod niini, ang mga Pariseo miingon Kaniya, “Tan-awa, nganong nagbuhat man sila sa dili itugot sa balaod sa Adlaw nga Igpapahulay?” Marcos 2:23–24
Gihatagan sa mga Pariseo ug dakong pagtagad ang daghang butang nga mga pagtuis sa balaod sa Diyos. Ang Ikatulong Sugo nagtawag kanato sa “Pagbalaan sa Adlaw nga Igpapahulay.” Dugang pa, mabasa nato sa Exodo 20:8–10 nga dili kita magbuhat ug bisan unsang trabaho sa Adlaw nga Igpapahulay, kondili gamiton nato kana nga adlaw sa pagpahulay. Gikan niini nga Sugo, ang mga Pariseo naghimo ug halapad nga mga pagpasabot bahin sa gitugot ug gidili nga buhaton sa Adlaw nga Igpapahulay. Ilang gitakda nga ang pagpangutlo sa mga uhay maoy usa sa mga gidili nga buhat.
Sa daghang nasod karon, ang pagpahulay sa Adlaw nga Igpapahulay halos nawala na. Makapasubo nga panagsa na lang igahin ang Domingo ingong adlaw sa pagsimba ug pagpahulay uban sa pamilya ug mga higala. Tungod niini, lisod alang kanato nga masabtan ang hilabihang pagpanghimantay ug pagkondenar sa mga Pariseo sa mga tinun-an. Ang mas lawom nga espirituhanong suliran daw mao ang hilabihang pagpangita sa mga Pariseo ug sayop bisan sa gagmayng butang. Mas gihatagan nila ug pagtagad ang paghukom ug pagkondenar kay sa pagpasidungog sa Diyos sa Adlaw nga Igpapahulay. Ug bisan tuod panagsa na karon makakita ug mga tawong sobra kabalaka sa pagpakasala ug sobra ka mapanghimantayon bahin sa pagpahulay sa Adlaw nga Igpapahulay, kasagaran sayon ra kitang mahulog sa pagpanghimantay sa daghan pang butang sa kinabuhi.
Hunahunaa ang imong pamilya ug kadtong labing suod kanimo. Aduna bay mga butang nga ilang ginabuhat ug mga batasan nga ilang naandan nga maoy hinungdan nga kanunay nimo silang sawayon? Usahay, mosaway kita sa uban tungod sa mga buhat nga klarong supak sa mga balaod sa Diyos. Sa ubang higayon, mosaway kita sa uban tungod kay kita mismo nagpasobra sa tinuod nga nahitabo. Bisan tuod importante nga mosulti kita uban sa gugma batok sa mga paglapas sa panggawas nga balaod sa Diyos, kinahanglan mag-amping gayod kita nga dili himoon ang atong kaugalingon nga maghuhukom ug hurado sa uban, ilabina kon ang atong pagsaway gibase sa pagtuis sa kamatuoran o sa pagpasobra sa usa ka gamayng butang. Sa laing pagkasulti, kinahanglan mag-amping kita nga dili usab mahimong mapanghimantayon.
Pamalandongi karon ang bisan unsang hilig nimo sa pagsaway nga sobra ug tinuis diha sa imong mga relasyon sa mga labing suod kanimo. Kanunay ka bang magbalikbalik ug hunahuna sa daw gagmayng mga sayop sa uban? Sulayi karon nga mopahilayo sa pagsaway ug, hinuon, bag-oha ang imong pagbuhat ug kalooy ngadto sa tanan. Kon buhaton nimo kini, tingali madiskobrehan nimo nga ang imong mga paghukom sa uban dili hingpit nga nagpakita sa kamatuoran sa balaod sa Diyos.
Akong maluloy-ong Maghuhukom, hatagi ako ug kasingkasing nga mapuangoron ug maluluy-on ngadto sa tanan. Kuhaa gikan sa akong kasingkasing ang tanang hilig sa paghukom ug pagsaway sa uban. Gitugyan ko Kanimo ang tanang paghukom, minahal nga Ginoo, ug ang ako lamang gipangita mao ang pagkahimong instrumento sa Imong gugma ug kalooy. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Antonio sa Ehipto, Abad
Mga Kapilian sa mga Basahon sa Misa
