Pebrero 15, 2023
Miyerkules sa Ikaunom nga Semana sa Kasagarang Panahon
Mga Pagbasa Karong Adlawa
Paminaw sa Iningles
Sa pag-abot ni Jesus ug sa Iyang mga tinun-an sa Betsaida, gidala sa mga tawo ngadto Kaniya ang usa ka buta ug mihangyo kang Jesus nga hikapon siya. Gikuptan Niya ang kamot sa buta ug gigiyahan siya pagawas sa balangay. Marcos 8:22–23
Ang Betsaida maoy usa sa mga lungsod sa amihanan lang sa Dagat sa Galilea diin nagwali si Jesus. Sa ulahing bahin sa Iyang publikong ministeryo, gihukman ni Jesus ang lungsod sa Betsaida tungod kay wala kini magbag-o sa kinabuhi. “Alaut ka, Betsaida! Kay kon ang mga gamhanang buhat nga gihimo diha kaninyo gihimo pa unta sa Tiro ug Sidon, dugay na unta silang naghinulsol nga nagsul-ob og sako ug nagbutang og abo” (Mateo 11:21).
Tingali tungod sa ilang kakulang sa pagtuo ug imoral nga pagkinabuhi, gidala ni Jesus ang buta sa gawas sa lungsod sa wala pa Niya kini ayoha. Ug daw ang mga tawo nga nagdala sa buta ngadto kang Jesus nagbuhat niini dili tungod sa ilang lawom nga pagtuo, kondili tungod sa pagkamausisaon. Tingali mao usab kini ang hinungdan nga, human ayoha ni Jesus ang tawo, gipapauli Niya kini sa iyang balay nga nag-ingon, “Ayaw na gani pagsulod sa balangay.” Busa, nahibalo si Jesus nga kini nga milagro dili makapukaw og pagtuo diha sa mga kasingkasing sa mga nagpuyo sa Betsaida. Mao nga gisugo ni Jesus ang tawo nga dili na mobalik didto.
Ang Dios adunay labing gamhanang gahum ug klarong makahimo sa bisan unsa nga Iyang buot, sa bisan kanus-a nga Iyang buot. Ug ang kanunay Niyang pilion nga buhaton mao ang paggamit sa Iyang labing gamhanang gahum diha lamang sa atubangan niadtong nagtuo na, o bisan sa atubangan niadtong wala pa mosalikway Kaniya. Kon makahimamat si Jesus ug mga tawo nga nakadungog na sa Iyang pagwali apan wala gihapon motuo, dili Siya mosugot sa paghimo ug bisan unsang milagro sa ilang atubangan.
Kini nagtudlo kanato nga ang pagtuo kinahanglan maoy mouna; unya, ang labing gamhanang gahom sa Dios modagayday nga walay babag. Siyempre, ang grasya sa Pulong sa Dios kanunayng gihatag ngadto sa tanan. Ang binhi sa balaang Pulong sa Dios kanunayng anaa alang sa tanan. Apan importante nga mailhan ang kalainan tali sa pagpadala sa Iyang balaang Pulong sa Ebanghelyo ug sa pagpadala sa Iyang labing gamhanang gahom nga nagbag-o kanato. Ang bugtong paagi aron madawat ang ikaduha mao ang pagdawat una sa nahauna. Kon dili kita maminaw, modawat ug motuo sa Iyang Pulong, dili nato madawat ang grasya sa Iyang gahom nga nagbag-o kanato.
Bisan pa niana, kinahanglan usab sabton nga ang “labing gamhanang gahom” sa Dios dili mahimong ipasabot nga mga milagro lamang. Kitang tanan nahibalo nga ang mga milagro sa lawas dili na ingon ka sagad karon kon itandi sa panahon nga si Jesus naglakaw pa dinhi sa yuta. Apan ang Iyang labing gamhanang gahom padayong naglihok karon; ug sa paagi nga labaw pa gani kay sa panahon nga si Jesus naglakaw dinhi sa yuta. Karon, ang Iyang gahom nagbag-o sa atong kinasuloran pinaagi sa kahingpitan sa grasya ug sa paghatag sa Espiritu Santo. Mao kini ang tinuod nga milagro nga kinahanglan natong pangitaon ug mapaabot kanunay kon nakapaminaw na kita sa Pulong sa Dios ug mitubag uban sa tinuod nga pagtuo.
Pamalandongi karon ang imong pagtuo ug ang imong panginahanglan sa gahom sa Dios nga nagbag-o sa imong kinabuhi. Nakita ba nimo nga buhi ang pagtuo diha kanimo? Kon mao, seguradong masinati nimo ang gahom sa Dios sa imong kinabuhi ug ang pagbag-o nga gihatag sa Espiritu Santo. Kon wala nimo makita nga naglihok kining gahom sa grasya ug pagbag-o sa kinasuloran, pamalandongi ang hulagway ni Jesus nga nagdala sa buta sa gawas sa lungsod aron gamiton ang Iyang gahom. Tinguhaa una nga makabaton og pagtuo, kay kon buhaton nimo kini, ang atong Ginoo makapabiling duol kanimo ug magbuhat og mga milagro sulod sa imong kalag.
Ginoong makagagahom sa tanan, gipili Mo nga ipadangat ang Imong walay kinutobang gahom ngadto sa mga mituo Kanimo pinaagi sa pagdawat sa Ebanghelyo nga Imong gipadala. Palihog ablihi ang akong mga dalunggan aron makadungog ako ug mopili sa paghinulsol ug pagtuo, ug sa ingon, maandam nga mabag-o pinaagi sa Imong madagayaong grasya. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Kwaresma
Mga Santos/Kasaulogan Karong Adlawa
Mga Kapilian sa mga Basahon sa Misa
