Miyerkules, Mayo 3, 2023
Pista nila San Felipe ug San Santiago, mga Apostoles
Paminaw sa Iningles
Miingon si Felipe kang Jesus, “Agalon, ipakita kanamo ang Amahan, ug igo na kana alang kanamo.” Si Jesus miingon kaniya, “Dugay na kaayo Akong nakig-uban kaninyo, ug wala ka gihapon makaila Kanako, Felipe? Ang nakakita Kanako nakakita sa Amahan. Nganong makaingon ka man, ‘Ipakita kanamo ang Amahan’?” Juan 14:8–9
Ang liturhikanhong pista karong adlawa nagpasidungog sa duha sa mga Apostoles, si Felipe ug si Santiago Menor. Diyutay ra ang atong nahibaloan mahitungod kang Santiago gawas nga gipili siya sa atong Ginoo alang sa apostolikanhong ministeryo ug nga anaa kanato ang usa sa iyang mga sulat, nga gilakip sa Bag-ong Tugon. Sa ulahi, miadto si Santiago sa Jerusalem ug nangulo sa Simbahan sulod sa pipila ka dekada hangtod nga gibato siya hangtod namatay isip martir. Si Felipe nagsangyaw sa Gresya, Frigia ug Sirya. Gituohang siya ug si San Bartolome gilansang sa krus nga nagtuwad. Si Felipe nagsangyaw samtang nagtuwad diha sa krus hangtod sa iyang kamatayon.
Sa Ebanghelyo alang sa Misa karong adlawa, atong madungog ang usa ka panag-istoryahanay ni Felipe ug ni Jesus. Bisan tuod daw gibadlong ni Jesus si Felipe niining panag-istoryahanaya, kini usa ka pagbadlong nga kinasingkasing gayod. Miingon si Jesus, “Dugay na kaayo Akong nakig-uban kaninyo, ug wala ka gihapon makaila Kanako, Felipe?” Sa pagkatinuod, daghang panahon ang gigahin ni Jesus uban sa Iyang mga tinun-an. Nagpuyo sila nga magkauban, nagdungan sa pagkaon, nagpanaw nga magkauban ug migahin og daghang panahon sa pagpakig-istorya sa usag usa. Busa, ang mga pulong ni Jesus ngadto kang Felipe naggikan sa Iyang tinuod ug personal nga relasyon kang Felipe nga Iyang nasinati sa ilang pag-uban.
Sugdi sa unang bahin nianang pamahayag. “Dugay na kaayo Akong nakig-uban kaninyo…” Handurawa nga gisulti kini ni Jesus kanimo. Makaingon kaha Siya niini kanimo? Tinuod ba nga naggahin ka gayod og daghang panahon uban Kaniya? Naggahin ka ba og panahon sa pagbasa sa mga Ebanghelyo, sa pagsulti ngadto Kaniya gikan sa kinahiladman sa imong kasingkasing, sa pagpakig-istorya Kaniya, sa pag-ampo ngadto Kaniya ug sa pagpaminaw sa Iyang malumong tingog?
Apan mipadayon si Jesus: “…ug wala ka gihapon makaila Kanako…?” Kini usa ka kamatuoran nga angay natong dawaton uban sa pagpaubos. Tinuod nga bisan kadtong adunay lawom kaayo ug makapausab nga kinabuhi sa pag-ampo wala pa makaila sa atong Ginoo sa igo nang kalawom. Walay kinutoban ang kausaban nga mahimong mahitabo sa atong kinabuhi kon personal natong mailhan si Jesus.
Mipadayag pa si Jesus: “Ang nakakita Kanako nakakita sa Amahan.” Busa ang sunod nga pangutana mao kini: “Nakaila ka ba sa Amahan?” Nahibalo ka ba sa gugma sa Amahan, sa Iyang pag-atiman kanimo, sa Iyang hingpit nga kabubut-on? Bisan tuod ang Amahan ug ang Anak nagkahiusa isip usa ka Dios, Lahi gihapon Sila nga mga Persona, ug busa kinahanglan kitang maningkamot sa pagtukod og relasyon sa gugma uban sa matag Usa Kanila.
Sama sa gihisgotan sa sinugdanan, ang mga pulong ni Jesus usa ka malumong pagbadlong nga puno sa gugma ngadto kang Felipe, ug buot Niyang isulti kanimo kining mao gihapong malumong pagbadlong. Apan kini usa ka pagbadlong nga puno sa gugma aron pagdasig kanimo nga mas mailhan pa Siya. Kini usa ka pagdapit nga himoon nimong mas personal ang imong relasyon kang Jesus ug sa Amahan sa tinuod ug konkretong paagi. Nakaila ka ba Kaniya? Nakaila ka ba sa Anak sa Dios? Nakaila ka ba sa Amahan sa Langit?
Pamalandongi karong adlawa kining mahigugmaong mga pangutana sa atong Ginoo nga daw gisulti kini kanimo. Tugoti nga ang Iyang mga pulong modasig kanimo nga mas lawom pa Siyang mailhan. Iampo nga ang imong relasyon Kaniya mahimong mas personal ug makapausab sa imong kinabuhi. Ug samtang mas suod nimong mailhan ang atong Ginoo, hinumdomi nga ang Amahan sa Langit usab ang imong nailhan.
Akong diosnon ug personal nga Ginoo, ang pag-ila ug paghigugma kanako mao ang kinahiladman nga tinguha sa Imong Sagradong Kasingkasing. Pun-a ang akong kasingkasing niining mao gihapong tinguha aron dili lamang Ikaw ang akong mailhan, minahal nga Ginoo, kondili usab ang Amahan sa Langit. Langitnong Amahan, nagpasalamat ako Kanimo tungod sa Imong hingpit nga gugma ug nag-ampo nga matag adlaw mas bug-os pa nakong maablihan ang akong kaugalingon ngadto nianang gugmaa. San Felipe ug Santiago, iampo ninyo ako. Jesus, nagsalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Dugang nga Basahon – San Felipe ug San Santiago, mga Apostoles
Mga Kapilian sa mga Basahon sa Misa
Mga Pag-ampo sa Panahon sa Pasko sa Pagkabanhaw
Mga Pamalandong sa Balaang Kasulatan alang sa Panahon sa Pasko sa Pagkabanhaw
