Mayo 8, 2023
Lunes sa Ikalimang Semana sa Pasko sa Pagkabanhaw
Mga Pagbasa Karong Adlawa
Paminaw sa Iningles
“Gisulti Ko kini kaninyo samtang ania pa Ako uban kaninyo. Ang Manlalaban, ang Espiritu Santo nga ipadala sa Amahan sa Akong ngalan—Siya ang magtudlo kaninyo sa tanan ug magpahinumdom kaninyo sa tanan nga Akong gisulti kaninyo.” John 14:25–26
Usahay makalimot kita sa tanan nga gisulti sa Dios kanato. Pananglitan, tingali nakasinati na kita og tin-aw nga kasinatian sa presensya sa Dios sa atong kinabuhi, sama sa usa ka lawom nga espirituhanong pagsabot nga nadawat pinaagi sa pag-ampo, usa ka lig-on nga pagkasiguro nga nadungog nato ang Iyang tingog pinaagi sa usa ka wali, ang kagawasan nga nakapausab sa atong kinabuhi nga atong nasinati pinaagi sa Sakramento sa Pakig-uli, o usa ka dili malalis nga katin-aw nga gihatag pinaagi sa pagbasa sa Balaang Kasulatan. Kon mosulti ang Dios kanato, nga naghatag sa Iyang Kamatuoran, kusog, kapasayloan ug tanang ubang matang sa grasya, mahupay kita sa espirituhanong paagi samtang mabati nato ang Iyang pagkaduol. Apan kon moabot ang mga kalisdanan, kadtong mga higayon sa katin-aw dali rang mawala sa atong panumdoman.
Ang mga tinun-an lagmit nakasinati og daghang mga higayon nga nagpatin-aw sa ilang pagsabot sulod sa tulo ka tuig sa publikong ministeryo ni Jesus. Nahingangha sila sa espirituhanong awtoridad nga ilang nasinati sa Iyang mga wali, nakasaksi sa dili maihap nga mga milagro, nakakita samtang gipahigawas ang mga makasasala, nakakita kang Jesus nga nausab ang panagway diha sa himaya, ug nakasaksi sa atong Ginoo nga lawom nga nakig-ampo sa Amahan. Sa matag higayon nga ilang nasinati ang gahom sa Dios nga naglihok, lagmit misamot kalig-on ang ilang pagtuo nga si Jesus mao ang Mesiyas, ang Anak sa Dios, ang Manluluwas sa Kalibotan. Apan nasayod usab si Jesus nga sa dili madugay mauyog ang pagtuo niining mga tinun-an diha Kaniya. Nasayod Siya nga samtang nagtan-aw sila gikan sa halayo nga puno sa kahadlok sa pagdakop, pagbunal ug pagpatay kang Jesus, magsugod sila sa pagkalimot sa tanan nilang nasinati kaniadto. Ang kahadlok makapahinabog kalibog, ug nasayod si Jesus nga ang Iyang mga tinun-an sa dili madugay mahulog nianang lit-aga. Tungod niini, gisulti ni Jesus sa Iyang mga tinun-an ang mga pulong sa ibabaw. Gisaad Niya kanila nga sa dili madugay mokunsad kanila ang Espiritu Santo aron tudloan sila sa tanan ug pahinumdoman sa tanan nga Iyang gisulti kanila.
Pagkanindot unta kon ang matag leksiyon nga atong nakat-onan gikan sa Dios magpabiling anaa sa unahan ug sentro sa atong kinabuhi. Pagkanindot unta kon dili gayod nato tugotan ang kahadlok nga maglibog kanato ug magpakalimot kanato sa tanan nga gisulti sa Dios kanato sa nagkalainlaing paagi. Ingon nga nasayod si Jesus nga ang mga tinun-an magkinahanglan sa tabang sa Espiritu Santo aron makahinumdom, nasayod usab Siya nga nagkinahanglan kita sa mao gihapong tabang gikan sa Espiritu Santo. Busa, ang mga pulong nga gisulti sa mga tinun-an sa ibabaw gisulti usab kanato. “Ang Manlalaban, ang Espiritu Santo nga ipadala sa Amahan sa Akong ngalan—Siya ang magtudlo kaninyo sa tanan ug magpahinumdom kaninyo sa tanan nga Akong gisulti kaninyo.”
Unsang mga leksiyon sa pagtuo ang imong nakat-onan kaniadto nga kinahanglan nimong hinumdoman pag-usab? Tahas sa Espiritu Santo ang pagpabalik niadtong mga leksiyon sa atong hunahuna sa matag higayon nga gikinahanglan nato kini. Busa, samtang nagkaduol kita sa mahimayaong pagsaulog sa Solemnidad sa Pentecostes, maayong panahon kini sa pag-ampo ngadto sa Espiritu Santo ug pagpangayo sa gasa sa paghinumdom sa daghang paagi nga gipadayag sa Dios ang Iyang Kaugalingon kanato. Ang Amahan, ang Anak ug ang Espiritu Santo naglihok sa hingpit nga panagkauyon sa usag usa, apan ang matag Usa adunay lahi nga tahas sa atong kinabuhi. Ang tahas sa Espiritu Santo ilabina mao ang paggiya kanato adlaw-adlaw ngadto sa katumanan sa kabubut-on sa Amahan nga kita mahimong hingpit nga mahisama sa Persona ni Cristo Jesus.
Pamalandongi karong adlawa kining gamhanang saad nga gihatag sa atong Ginoo ngadto sa Iyang mga tinun-an ug kanato. Pag-ampo sa Espiritu Santo. Ablihi ang imong kaugalingon sa padayong paggiya sa Espiritu sa imong kinabuhi ug ayaw gayod tugoti nga ang kahadlok mosangpot sa kalibog. Hinuon, tugoti ang Diyos nga magwagtang sa tanang kalibog ug magpahinumdom kanimo sa tanan Niyang gisulti kanimo sa tibuok nimong kinabuhi.
Labing mahimayaong Ginoong Jesus, Imong gisaad sa mga tinun-an ug sa tanan Mong katawhan nga ipadala kanamo ang Espiritu Santo aron magpahinumdom kanamo sa tanan Nimong gipadayag. Espiritu Santo, palihog, padayon nga kunsad kanako, tudloi ako ug giyahi ako. Tabangi ako nga dili gayod makalimot sa daghang leksiyon nga gitudlo kanako aron dili ko gayod tugotan nga ang kahadlok mosangpot sa kalibog. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pag-ampo sa Panahon sa Pasko sa Pagkabanhaw
Mga Pamalandong sa Balaang Kasulatan alang sa Panahon sa Pasko sa Pagkabanhaw
Mga Santos/Kasaulogan Karong Adlawa
Mga Kapilian sa mga Basahon sa Misa
