Mayo 20, 2023
Sabado sa Ikaunom nga Semana sa Pasko sa Pagkabanhaw
Mga Pagbasa Karong Adlawa
San Bernardino sa Siena, Pari—Opsiyonal nga Handumanan
Paminaw sa Iningles
“Gisulti Ko kini kaninyo pinaagi sa mga sambingay. Moabot ang takna nga dili na Ako mosulti kaninyo pinaagi sa mga sambingay, kondili dayag na Akong isulti kaninyo ang mahitungod sa Amahan.” Juan 16:25
Kanus-a man mosulti si Jesus sa dayag mahitungod sa Amahan? Kanus-a man kanang “takna” nga Iyang gihisgotan? Una, kining “takna” mahimong sabton nga mao ang panahon human sa Iyang kamatayon, Pagkabanhaw ug Pagsaka sa Langit. Nianang panahona mokunsad kanila ang Espiritu Santo sa Pentekostes aron ablihan ang ilang mga hunahuna ug masabtan nila ang tanan Niyang gitudlo sa mas lawom ug mas tin-aw nga paagi. Apan sa Ebanghelyo ni Juan, ang “takna” nagtumong usab sa Iyang kamatayon sa Krus. Kini ang takna sa Iyang himaya, ang takna diin ang Anak sa Tawo nagluwas kanato pinaagi sa Iyang balaang pag-antos. Busa, kining pahayag ni Jesus angay basahon sa pagsabot nga Iyang gipasabot ang Iyang umaabot nga pag-antos. Hinumdomi nga kining wali ni Jesus kabahin sa Iyang “Pakigpulong sa Kataposang Panihapon.” Gihatag kini sa wala pa gayod mogawas si Jesus paingon sa Tanaman sa Getsemani aron dakpon.
Kon atong sabton kining “takna” nga mao ang pag-antos ug kamatayon ni Jesus sa Krus, angay natong hinumdoman nga ang Iyang paghalad sa Iyang kinabuhi dili lamang usa ka makaluwas nga buhat sa pagtubos, kondili usa usab sa labing tin-aw nga mga paagi sa Iyang pagpahayag mahitungod sa Iyang Amahan sa Langit. Sa pagkatinuod, ang pag-antos ug kamatayon ni Jesus nagpadayag sa Amahan ngadto sa mga tinun-an sa mga paagi nga dili ikapadayag sa Iyang “mga sambingay.” Ang mga pulong ni Jesus nga adunay tinagong kahulogan nagsulti sa kamatuoran, apan kini usa ka kamatuoran nga dili pa hingpit nga ikapahayag. Hinuon, ang pag-antos ug kamatayon nga kinabubut-on Niyang gidawat tin-aw nga nagpadayag sa Amahan sa labing lawom nga paagi nga mahimo. Ang Krus lunsay nga gugma, ug ang Amahan lunsay nga gugma. Ang kamatayon ni Jesus sa Krus agig pagsunod sa kabubut-on sa Amahan nagpadayag ngadto sa tanan nga dako kaayo ang gugma sa Amahan kanato nga andam Siyang mohalad sa Iyang bugtong Anak aron, kon motuo lamang kita Kaniya, makapanunod kita sa kinabuhing dayon.
Ang mensahe sa Krus usa ka tinuod nga pagtulon-an mahitungod sa gugma sa Amahan. Kini usa ka pagtulon-an nga nahitabo pinaagi sa buhat sa labing lunsay ug labing mahinalaron nga gugma nga mahunahunaan. Ang Krus mao ang paagi ni Jesus sa pagsulti “sa dayag mahitungod sa Amahan,” kay gipadayag niini ang kalawom sa gugma sa Amahan alang sa tanang katawhan. Kon malisdan ka sa pagsabot niini, dili ka nag-inusara. Bisan ang mga tinun-an mismo nalisdan usab niini. Mao nga sa kataposan gikinahanglan nilang mokunsad kanila ang Espiritu Santo aron ablihan ang ilang mga hunahuna. Kita usab nagkinahanglan sa Espiritu Santo aron matangtang ang tabil ug masabtan nato kining labing gamhanang mensahe sa walay kinutobang gugma sa Dios.
Pamalandongi karon ang nagdilaab nga tinguha ni Jesus nga tangtangon ang tabil sa Iyang pagtulon-an ug ipadayag kanimo, sa tin-aw gayod, ang kalawom sa gugma sa Amahan alang kanimo. Tugoti ang Espiritu Santo nga ablihan ang imong hunahuna niining pagpadayag nga gihatag pinaagi sa Paglansang sa Krus. Pag-ampo alang nianang gasa. Paminawa si Jesus nga nagsulti kanimo nga buot Niyang ihatag kanimo kini nga pagsabot, ug unya hulata ang grasya nga imong gikinahanglan aron makita ug masabtan ang kasingkasing gayod sa Amahan ug ang Iyang diosnong gugma alang kanimo.
Akong labing minahal nga Jesus, ang Imong takna sa himaya didto sa Krus mao ang labing tin-aw ug labing hingpit nga pagpadayag sa gugma sa Amahan. Didto sa Krus, Imong gipakita kanamong tanan kon unsa kalawom ang Imong gugma ug ang gugma sa Imong Amahan sa Langit alang kanamo. Palihog ablihi gayod ang akong hunahuna, minahal nga Ginoo, sa tanan nga buot Nimong ipadayag kanako, aron samtang nagkadugang ang akong pag-ila Kanimo, magkadugang usab ang akong pag-ila sa Imong Amahan sa Langit. Jesus, misalig ako Kanimo.
Nobena sa Espiritu Santo
Giampo isip pagpangandam alang sa Pentecostes
Ikaduhang Adlaw – Sabado, Mayo 20
Mga Pag-ampo sa Pasko sa Pagkabanhaw
Dugang nga mga Pamalandong sa Ebanghelyo
Mga Pamalandong sa Diosnong Kalooy
Santos sa Adlaw – San Bernardino sa Siena, Pari
Mga Kapilian sa mga Basahon sa Misa
