Hulyo 15, 2023
Sabado sa Ikanapulog-upat nga Semana sa Kasagarang Panahon
Mga Pagbasa Karong Adlawa
San Buenaventura, Obispo ug Doktor sa Simbahan—Paghandum
Paminaw sa Iningles
“Ang Akong isulti kaninyo diha sa kangitngit, isulti ninyo diha sa kahayag; ang inyong madungog nga gihunghong, imantala ninyo gikan sa ibabaw sa mga atop.” Mateo 10:27
Unsa man ang gisulti kanimo sa atong Ginoo diha sa “kangitngit,” ug unsa man ang imong “nadungog nga gihunghong” Niya? Importante kini nga pangutana nga angay pamalandongan, kay bisan unsa ang gisulti sa ingon niana nga paagi kinahanglan isulti “diha sa kahayag” ug imantala “gikan sa ibabaw sa mga atop.”
Hinumdomi nga sa dihang unang miduol ang mga tawo kang Jesus tungod sa ilang pagkamausisaon mahitungod Kaniya, kasagaran dili Niya dayag nga ipahayag ang tanan, kondili mogamit Siya og mga pasumbingay ug mga sambingay. Kini nga paagi sa pagtudlo mao ang unang lakang sa padayong nagkalalom nga pagpadayag ni Jesus kanato. Ang Iyang mga sambingay ug nagkalainlaing mga pasumbingay gituyo aron madani ang tigpaminaw ug aron mamati kini pag-ayo sa mas lawom nga mensahe.
Hinumdomi usab nga si Jesus miingon sa Iyang mga tinun-an, “Gisulti Ko kini kaninyo pinaagi sa mga pasumbingay. Moabot ang takna nga dili na Ako mosulti kaninyo pinaagi sa mga pasumbingay, kondili dayag Ko nang isulti kaninyo ang mahitungod sa Amahan” (Juan 16:25). Sa unsang paagi nakigsulti kanimo ang atong Ginoo?
Samtang motubo kita sa pagtuo ug mas mailhan nato ang atong Ginoo, sugdan Niya ang “pag-alsa sa tabil,” ingnon ta, ug sugdan Niya ang paghunghong sa Iyang kinalawomang mga kamatuoran kanato diha sa kinahiladman sa atong mga kalag. Ipaabot Niya kini kanato sa mga paagi nga labaw pa kaayo sa tinagong mensahe sa Iyang mga sambingay ug mga pasumbingay, ug ipaambit Niya kanato ang Iyang kaugalingon mismo, sa mga paagi nga dili na ikapahayag sa mga pulong.
Ang tudling sa Ebanghelyo sa ibabaw, kon tan-awon sa kaugalingon niini, daw tin-aw nga nagpakita nga daghan ang buot isulti sa Dios kanato sa dayag nga paagi. Apan buot Niya kining isulti kanato diha sa “kangitngit” sa atong sulodnong kinabuhi ug pinaagi sa malumong mga hunghong nga madungog lamang kon ihatag nato Kaniya ang atong tibuok pagtagad. Pananglitan, daghan ang gisulti ni San Juan sa Krus mahitungod sa “kangitngit sa pagtuo,” diin madawat ang kinalawomang mga pagpakigsulti sa atong Ginoo. Kining mga pagpakigsulti labaw pa sa mga pulong, mga konsepto ug mga hulagway, ug mapaabot lamang sa direkta ug espirituhanong paagi pinaagi sa pag-ampo nga gibubo sa Dios sa kalag. Kini nga pag-ampo dili usa ka butang nga mahimo nimo sa imong kaugalingong paningkamot; usa kini ka gasa diin padayon kang ginadala sa Dios ngadto sa mas lawom nga pakig-uban Kaniya, motubag ka ug tawgon ngadto sa mas lawom pa, ug padayon kang motubag.
Ang tudling sa Ebanghelyo sa ibabaw tin-aw usab nga nagpakita nga gusto sa Dios nga ipaambit nato sa uban kining labing putli nga pagtuo. Ipaambit kini diha sa kahayag ug imantala gikan sa ibabaw sa mga atop. Una kining mahimo pinaagi sa pagpamatuod sa atong kinabuhi, pinaagi sa pagtugot nga ang makapausab nga grasya sa Dios modan-ag pinaagi kanato sa mga paagi nga Siya lamang ang makahimo. Mahimo usab kini pinaagi sa pagmatngon sa mga higayon nga buot sa Dios nga gamiton ka aron ipaambit sa uban ang Iyang mas lawom ug sagad natagong mga kamatuoran. Kinahanglan una kining isulti sa Dios kanimo, ug unya, pinaagi sa mga pag-aghat sa Iyang grasya, usahay gamiton ka Niya aron ipaambit Siya sa uban.
Pamalandongi karon kining duha ka bahin sa buhat nga gisugo sa atong Ginoo. Una, paminawa Siya. Paminawa Siya diha sa “kangitngit sa pagtuo.” Tugoti Siya nga modala kanimo ngadto sa labing lawom ug labing lig-on nga mga pagtuo mahitungod sa Iyang gugma ug kalooy ug sa Iyang kaugalingon mismo. Unya, samtang imong tagamtamon kining tinago ug balaang mga pagpakigsulti sa atong Ginoo, pangitaa ang mga paagi nga gusto Niyang makigsulti sa uban pinaagi kanimo. Dili kinahanglan nga ikaw ang mag-una niining pagpahibalo; kinahanglan lamang nga motubag ka sa dihang Siya mogiya kanimo. Pinaagi sa pagpalawom sa imong kinabuhi sa pag-ampo niining paagiha, dili lamang nimo mailhan ang atong Ginoo sa mga paagi nga dili ikapahayag sa mga pulong, kondili mahibaloan usab nimo kon giunsa ug kanus-a Siya gustong makigsulti sa uban pinaagi kanimo.
Akong maayong Jesus, buot Kang makigsulti kanako ug sa tanan Mong mga anak sa mga paagi nga lawom, puno sa kahulogan ug dili ikapahayag sa mga pulong. Palihog, dad-a ako nga mas lawom pa niining mga pagpakigsulti sa Imong gugma aron makakita ako lapas sa tabil ug mailhan Ka kon kinsa Ka gayod. Palihog, gamita usab ako, hinigugmang Ginoo, aron makigsulti sa uban sumala sa Imong pagbuot. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Buenaventura, Obispo ug Doktor sa Simbahan
Mga Kapilian sa mga Basahon sa Misa
