Hulyo 23, 2023
Ikanapulog-unom nga Domingo sa Ordinaryong Panahon (Tuig A)
Mga Pagbasa Karong Adlawa
Paminaw sa Iningles
Giasoy ni Jesus ngadto sa panon sa katawhan ang laing sambingay, nga nag-ingon: “Ang gingharian sa langit mahimong ikatandi sa usa ka tawo nga nagpugas ug maayong binhi sa iyang uma. Samtang nangatulog ang tanan, miabot ang iyang kaaway ug nagpugas ug mga sagbot taliwala sa trigo, ug unya milakaw. Sa dihang mitubo ug namunga ang trigo, mitungha usab ang mga sagbot.” Matthew 13:24–26
Kini nga sambingay sayon rang masabtan sa mga tawo sa panahon ni Jesus. Kasagarang paagi sa usa ka kaaway sa pagpanimalos sa uban mao ang pagpugas ug sagbot nga gitawag ug “cockle” taliwala sa trigo. Sa pagsugod ug tubo sa cockle, susama kaayo kini sa trigo hangtod nga mamunga na. Ug kon masagol kini sa trigo ug makaon, makapahinabo kini ug grabeng kasukaon. Tungod niini, naandan usab sa mga mag-uuma nga adunay mga kaaway nga magpabantay sa ilang mga sulugoon sa ilang kaumahan human kini mapugasi. Busa, gipadayag niini nga sambingay nga ang mga sulugoon nga gitahasan sa pagbantay napakyas sa ilang katungdanan.
Sa pagpatin-aw niini nga sambingay, miingon si Jesus, “Ang nagpugas sa maayong binhi mao ang Anak sa Tawo, ang uma mao ang kalibotan, ug ang maayong binhi mao ang mga anak sa gingharian. Ang mga sagbot mao ang mga anak sa daotan, ug ang kaaway nga nagpugas niini mao ang yawa. Ang ting-ani mao ang kataposan sa kapanahonan, ug ang mga mag-aani mao ang mga anghel” (Matthew 13:37–39). Usa sa naandang taktika sa daotan mao ang malimbongong pagsagol sa iyang mga bakak sa kamatuoran. Nahibalo siya nga kon magpahayag siya ug usa ka grabe ug dayag nga bakak, daghan ang mosalikway dayon niini. Busa, naningkamot siya sa pagpahinabo ug pagkabahinbahin ug kalibog pinaagi sa hinayhinay ug dili dayag nga pagsugyot sa iyang mga kasaypanan aron mas dali kining tuohan. Busa, ang “mga anak sa daotan” mahimong sabton nga mao kadtong ania sa kalibotan nga nailalom sa impluwensiya sa yawa, ingon man ang mga panon sa mga demonyo nga naningkamot sa pagpugas ug kalibog sa atong kinabuhi ug sulod sa Simbahan.
Usa ka makatabang nga paagi sa pagpamalandong niini nga sambingay diha sa pag-ampo mao ang pagtan-aw sa imong kaugalingon isip usa sa mga sulugoon nga gitugyanan sa tahas sa pagbantay sa uma. Sanglit ang uma mao ang kalibotan, kitang tanan adunay katungdanan sa pagpugong sa mga bakak sa daotan aron dili kini molambo. Aron mahimo kana, kinahanglan gayod natong atubangon ang labing seryosong mga kasaypanan nga atong masugatan. Pananglitan, kinahanglang panalipdan ang dignidad sa bata nga wala pa matawo, ug kinahanglang mahunong ang yawaong buhat sa aborsiyon. Dugang pa, kinahanglan kitang maningkamot sa pagpanalipod sa Simbahan, sa atong mga komunidad, mga higala ug mga pamilya dili lamang batok sa grabeng mga kasaypanan sa atong panahon kondili usab niadtong labing dili dayag. Pananglitan, sulod sa Simbahan, kanunayng motungha ang mga panagbangi ug kalibog. Kini nga mga pagkabahinbahin kabahin sa dili dayag nga mga bakak nga gipugas sa daotan.
Kinahanglan usab natong tan-awon ang atong kaugalingong mga kalag isip tabunok nga yuta. Tinuod nga napugas na ang Pulong sa Diyos, apan sa makadaghan atong gitugotan ang atong kaugalingon nga motuo sa dili dayag nga mga kasaypanan. Mosangpot kini sa panagsumpaki sa sulod sa atong kaugalingon, sala ug kalibog. Busa, kinahanglan natong kanunayng bantayan ang atong mga kalag batok niini nga mga bakak pinaagi sa pagsalig sa tinuod nga mga pagtulon-an sa atong Simbahan ug sa mga pagtulon-an sa mga santos.
Pamalandongi karong adlawa ang imong balaang katungdanan nga magmabinantayon ug kanunayng magbantay sa binhi sa kasaypanan nga gipugas sa atong kalibotan, sa Simbahan ug sa imong kaugalingong kalag. Ang pagmabinantayon maoy yawi. Ang daotan kanunayng naglatagaw nga nangitag mabiktima. Kon buot natong makat-onan ang usa sa mga nag-unang mensahe niini nga sambingay, kinahanglan kitang makat-on sa pagbantay ug pagpanalipod sa tanan nga gipadayag sa Diyos ug sa paghawid pag-ayo sa Kamatuoran lamang.
Mahimayaong Pulong sa Diyos, Imong gipugas ang Imong binhi sa kamatuoran sa among kalibotan, sulod sa Imong Simbahan ug sa akong kinabuhi. Hinaot nga kanunay kong maminaw sa Imong Pulong ug motubag niini sa tibuok kong kasingkasing. Palihog ipadayag usab kanako ang daghang mga bakak sa daotan aron isalikway ko kini sa tibuok kong kasingkasing. Jesus, misalig ako Kanimo.
Sound of Freedom
Nagpasalida na sa mga sinehan!
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw –Santa Brigida sa Sweden, Relihiyosa—Opsiyonal nga Paghandum
Dili saulogon isip liturhikanhong paghandum niining tuiga kay natunong kini sa Domingo
Mga Kapilian sa mga Basahon sa Misa
Gipasiugda nga hulagway sa ibabaw: Parabola sa Magpupugas, pinaagi sa flickr
