Oktubre 12, 2023
Huwebes sa Ikakawhaag-pitong Semana sa Ordinaryong Panahon
Mga Pagbasa Karong Adlawa
Paminaw sa Iningles
Miingon si Jesus sa Iyang mga tinun-an: “Pananglit ang usa kaninyo adunay higala nga iyang adtoon sa tungang gabii ug ingnon, ‘Higala, pahulama ako ug tulo ka buok pan, kay usa ka higala nako ang miabot sa akong balay gikan sa usa ka panaw ug wala akoy ikatanyag kaniya…’” Lucas 11:5–6
Kon dili gayod suod kaayo ang inyong panaghigalaay, tingali magpanuko ka sa pagpukaw kaniya ug sa iyang pamilya sa tungang gabii aron manghulam ug pagkaon. Ug bisan kon suod kaayo nimo siya nga higala, tingali magpanuko gihapon ka tungod sa kahadlok nga makasamok kaniya. Apan niining sambingay, ang “higala” mao ang Dios. Bag-o pa lang gitudloan ni Jesus ang Iyang mga tinun-an sa pag-ampo sa “Amahan Namo,” ug karon Iyang gidugang kining sambingay aron ipahayag ang dakong pagsalig ug kalig-on sa tinguha nga kinahanglan natong batonan sa pag-ampo ngadto sa Amahan. Gitapos ang sambingay sa pag-ingon nga bisan kon ang tawo nga naghigda dili mobangon aron motuman sa gihangyo, mobuhat siya niini “tungod sa iyang pagpadayon sa pagpangayo.” Ug bisan tuod kanunayng mamati ang Dios sa atong pag-ampo, ang pagkamalahutayon usa ka mahinungdanong hiyas nga kinahanglan natong batonan.
Kon mag-ampo kita sa Dios nga malahutayon, nga dili gayod magduhaduha sa Iyang kaayo ug pagkamanggihatagon, ibubo sa Dios kanato ang tanang maayo. Siyempre, kon ang atong giampo usa ka butang nga hakog o dili uyon sa kabubut-on sa Dios, walay kapuslanan ang bisan unsa pa natong pagpakiluoy. Apan kon mag-ampo kita sumala sa gitudlo kanato sa “Amahan Namo,” makasiguro kita nga ang atong pagkamatinud-anon niana nga pag-ampo, nga gihalad uban sa kinadak-ang pagsalig ug pagkamalahutayon, magpatuman sa atong kinabuhi sa maayong mga gasa nga sumala sa kabubut-on sa Dios.
Usa sa pito ka pangamuyo sa pag-ampo nga “Amahan Namo” mao kini: “Umabot kanamo ang Imong gingharian, matuman ang Imong pagbuot dinhi sa yuta maingon sa langit.” Matahom gayod kini nga pangamuyo nga nagkinahanglan dili lamang sa padayon nga pagkamalahutayon kondili usab sa dili pagkagapos sa atong kaugalingong mga gusto sa kinabuhi. Ang pag-ampo nga matuman ang kabubut-on sa “Dios” ug moabot ang “Iyang” Gingharian usa usab ka paagi sa pag-ingon nga imong gitugyan ngadto sa Dios ang tanan nimong kaugalingong mga gusto. Moduol ka sa Dios nga nag-ila nga ang imong kabubut-on mahimong dili mao ang Iyang kabubut-on. Busa, kining pangamuyo kusganong nagpahayag sa dili pagkagapos sa kaugalingong mga tinguha.
Pamalandongi karon ang kahinungdanon sa pag-ampo ngadto sa Dios uban sa kinadak-ang kadasig ug pagkamalahutayon. Pamalandongi usab ang kahinungdanon sa pagbuhat niini nga dili magpabiling gapos sa kaugalingong mga tinguha. Unsay gusto sa Dios gikan kanimo? Unsa ang Iyang balaang kabubut-on alang sa imong kinabuhi? Pangitaa kana nga kabubut-on ug kana lamang sa tibuok mong kasingkasing, ug imong madiskobrehan nga ang Iyang kabubut-on tinuod gayod nga matuman sa imong kinabuhi.
Akong hingpit nga Ginoo, ang Imong kabubut-on ug ang Imong kabubut-on lamang mao ang akong gitinguha ug gipangita. Gipangita ko kini sa tibuok kusog sa akong kalag. Tabangi ako nga motubo sa pagsalig Kanimo ug sa Imong kaayo. Hinaot nga mosalig ako Kanimo ug motuo sa tibuok kong kasingkasing nga tinuod gayod Nimong tumanon ang Imong balaang kabubut-on sa akong kinabuhi kon magpadayon lamang ako sa pag-ampo ug pagsalig. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Mga Santos/Kasaulogan Karong Adlawa
Mga Kapilian sa mga Basahon sa Misa
Gipiling hulagway sa ibabaw: Qui es in Caelis, pinaagi sa flickr
