Abril 17, 2024
Miyerkules sa Ikatulong Semana sa Pasko sa Pagkabanhaw
Mga Pagbasa Karong Adlawa
Paminaw sa Iningles
“Kay kini mao ang kabubut-on sa akong Amahan, nga ang matag usa nga makakita sa Anak ug motuo Kaniya makabaton sa kinabuhing walay kataposan, ug banhawon ko siya sa kataposang adlaw.” Juan 6:40
Nagtuo ka ba kang Jesus? Sa walay pagduhaduha, ang tubag mao ang “Oo.” Apan ang pagtuo sa atong Ginoo kinahanglang molalom sa matag adlaw nga molabay. Busa, kon ikaw adunay pagtuo kang Jesus, makaangkon ka usab nga dili pa igo ang imong pagtuo. Niining bahin sa Ebanghelyo diin gipadayon ang “Pakigpulong bahin sa Tinapay sa Kinabuhi,” gitawag kita ni Jesus sa pagbuhat og duha ka butang. Una, kinahanglan nga makita nato Siya. Ikaduha, kinahanglan nga motuo kita. Atong sugdan ang una.
Sa unang pagsulti ni Jesus niining mga pulonga ngadto sa panon sa katawhan, nakita gayod nila Siya sa pisikal. Apan daghan kanila ang wala makakita lapas sa makita sa mata. Nakita nila ang Iyang mga milagro ug nadungog ang Iyang pagtulon-an, apan diyutay ra kaayo ang nakakita sa mas lawom nga kamatuoran nga si Jesus mao ang Anak sa Amahang Walay Kataposan ug ang Manluluwas sa Kalibotan.
Aron motuo ka sa atong Ginoo ug sa tanan Niyang pagkamao, kinahanglan nga una nimo Siyang makita. Usa sa labing maayong paagi sa pagpalambo niining “balaang panan-aw” sa atong Ginoo mao ang pagtutok Kaniya diha sa Labing Balaang Eukaristiya. Kon motambong ka sa Misa o mogahin og panahon sa adorasyon ug motan-aw sa Labing Balaang Eukaristiya, unsa man ang imong makita? Nakita ba nimo ang Anak nga Walay Kataposan? Nakita ba nimo ang Iyang balaang pagka-Dios? Nakita ba nimo ang imong Dios ug ang Ginoo sa tanan?
Samtang nagbarog o nagluhod kita atubangan sa atong Ginoo, nga anaa sa Labing Balaang Eukaristiya, sayon rang mabalda ang atong pagtagad. Sayon rang pasagdan nga masaag ang atong hunahuna ngadto sa daghang ubang bahin sa atong adlaw-adlaw nga kinabuhi ug dili nato makita ang Anak sa Dios nga Walay Kataposan nga ania uban kanato.
Pamalandongi karong adlawa ang paagi sa imong pagtan-aw sa atong Ginoo. Kon gusto nimong palawmon ang imong pagtuo, ang imong pagsalig Kaniya, sugdi kini sa imong panan-aw. Sugdi pinaagi sa pagpamalandong kon giunsa nimo pagtan-aw si Jesus, nga anaa sa Labing Balaang Eukaristiya. Kon gipanalanginan ka nga makauban Siya karong adlawa sa Balaang Misa o sa adorasyon, susiha ang imong paagi sa pagtan-aw Kaniya. Tutoki Siya. Tuyoang ipahayag ang imong pagtuo sa Iyang diosnong presensya. Ilha ang Iyang pagka-Dios, ang Iyang himaya, ang Iyang pagkabalaan ug ang Iyang sagradong presensya. Kon makatan-aw ka lapas sa makita sa mata ug mahawi nimo ang tabil nga nagtabon sa Iyang himaya, nan kining balaang gasa sa panan-aw modala usab ngadto sa gasa sa lawom nga pagtuo.
Akong Ginoo nga kanunay ania, kinasingkasing akong nagpasalamat Kanimo sa paagi sa Imong pag-anhi kanako diha sa Labing Balaang Eukaristiya. Nagpasalamat ako Kanimo tungod sa Imong diosnong presensya ug himaya. Tabangi ako nga makakita lapas sa tabil sa dagway sa tinapay ug bino aron mas tin-aw kong makita ang Imong pagka-Dios. Samtang makita nako ang Imong diosnong presensya, minahal nga Ginoo, tabangi ako sa pagpahayag sa akong pagtuo Kanimo uban sa mas dakong kasigurohan ug pagtuo. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pag-ampo sa Panahon sa Pasko sa Pagkabanhaw
Mga Pamalandong sa Balaang Kasulatan alang sa Panahon sa Pasko sa Pagkabanhaw
Mga Santos/Kasaulogan Karong Adlawa
Mga Kapilian sa mga Basahon sa Misa
