Mayo 10, 2024
Biyernes sa Ikaunom nga Domingo sa Pasko sa Pagkabanhaw
Mga Pagbasa alang sa Karong Adlawa
San Damien de Veuster sa Moloka’i, Pari—Opsiyonal nga Handumanan sa USA
San John sa Ávila, Pari ug Doktor sa Simbahan—Opsiyonal nga Handumanan
Paminaw sa Iningles
“Kon ang usa ka babaye manganak na, siya mag-antos kay miabot na ang iyang takna; apan sa dihang matawo na niya ang bata, dili na niya mahinumdoman ang kasakit tungod sa iyang kalipay nga usa ka bata ang natawo sa kalibotan.” John 16:21
Kining kamatuorana magamit usab gayod sa bisan unsang matang sa kasakit nga atong masinati tungod sa usa ka maayong hinungdan. Timan-i nga ang kasakit nga masinati sa pagpanganak adunay maayo ug balaang hinungdan. Busa, sa usa ka diwa, malimtan ang kasakit sa dihang makita ug makugos sa inahan ang iyang bag-ong natawong anak. Malimtan kadtong pag-antos sa diwa nga kini mahimong kalipay pinaagi sa pagkatawo sa usa ka bata.
Daghang butang sa kinabuhi ang makahatag og grabeng kasakit. Sa Ebanghelyo karong adlawa, mipadayon si Jesus sa pag-ingon sa Iyang mga tinun-an: “Busa kamo usab nag-antos karon.” Gisulti Niya kini kay bag-o pa lamang Siyang nahuman sa pagsulti kanila mahitungod sa Iyang umaabot nga pag-adto ngadto sa Amahan ug sa pag-antos nga ilang masinati sa dagway sa paglutos. Apan dayon miingon Siya kanila nga human Siya mobiya ug dili na nila Siya makita, makita ra nila Siya pag-usab ug maglipay sila. Ug miingon Siya, “Nianang adlawa wala na kamoy ipangutana Kanako.” Importante nga masabtan kining mga pulonga.
Ang grabeng kasakit, o bisan unsang matang sa pag-antos, mahimong makatintal kanato sa pagduhaduha sa atong kinabuhi ug bisan sa Diyos. Klaro nga human patya si Jesus, gikuwestiyon sa mga tinun-an ang tanan. Nalibog sila ug nahadlok. Daw nawala na ang tanan. Unya, bisan dili ingon kadako, human mosaka si Jesus sa Langit ug sa wala pa Niya ipadala ang Espiritu Santo, lagmit nakasinati usab ang mga tinun-an og kalibog. Ngano man nga mibiya si Jesus kanila? Ngano man nga wala Siya magpabilin og mas dugay? Kinsa na man ang mangulo kanila karon? Kini ug daghan pang susamang mga pangutana lagmit misantop sa ilang hunahuna.
Ingon usab niini kita: kon ang mga butang dili mahitabo sumala sa atong giplano, o kon mahimong masakit ang dagan sa atong kinabuhi, mahimo dayon natong kuwestiyonon ug bisan pagduhaduhaan ang hingpit nga laraw sa Diyos. Kon mabungkag ang mga butang tungod sa atong sala, ang paghinulsol mao ang tambal. Apan kon mabungkag ang mga butang, sa diwa nga mahimong lisod ang kinabuhi, labi gayod kitang angay maminaw sa mga pulong ni Jesus karong adlawa.
Kon makasinati kita og grabeng kasakit sa kinabuhi tungod kay atong gituman ang kabubut-on sa Diyos, kinahanglan natong tan-awon kana nga kasakit ingong paagi ngadto sa usa ka labi pang dakong kaayohan. Sama nga ang mga kasakit sa pagpanganak mosangpot sa gasa nga usa ka anak, ang mga kasakit sa pagpatuman sa kabubut-on sa Diyos sa atong kinabuhi mosangpot usab sa presensya sa Diyos Mismo. Ang mapailobong paglahutay usa ka hiyas nga labi ka importante niining kahimtanga. Pananglitan, ang kasakit sa pagbuntog sa usa ka pagkaadik, o sa pag-ampo bisan kon wala kitay gana sa pag-ampo, o sa pagpasaylo sa usa ka tawo nga nakapasakit kanato—kining tanan mga pananglitan sa kasakit nga nahimong mga panalangin. Kasagaran gayod, lisod ang pagpakigbatok sa atong kaugalingong hakog nga kabubut-on. Apan ang bunga sa pag-apil sa ingon niana nga pakigbisog sulod kanato mao ang kalipay. Adunay kalipay sa pagdaog batok sa sala. Adunay kalipay sa paglahutay sa pag-ampo. Adunay kalipay sa matag kalisdanan nga atong giantos alang sa Gingharian sa Diyos. Apan dili kanunay nga kalipay ang atong unang masinati. Masinati lamang kini kon mapailobon kitang molahutay sa maong kahimtang.
Pamalandongi karon ang bisan unsang matang sa grabeng kasakit nga imong giantos alang sa himaya sa Dios, o bisan unsang butang nga imong gilikayan karon tungod kay daw lisod kini buhaton. Ayaw pag-isol niining mga kalisdanan. Tan-awa kini isip paagi padulong sa usa ka mahimayaong kataposan. Antosa ang “mga kasakit sa pagpanganak” sa pagputli ug sa misyon nga gitawag ka sa Dios nga tumanon. Tan-awa ang labaw pa sa mga kalisdanan nga imong nasinati sa sinugdan, aron makita nimo ang kataposang bunga nga nagpaabot kanimo.
Akong mahimayaong Ginoo, Imong giantos ang Imong pasyon uban sa hingpit nga hiyas. Wala Ka gayod magduhaduha sa pagtuman sa kabubut-on sa Amahan, ug ang bunga sa Imong paglahutay mao ang himaya sa Pagkabanhaw. Palihog tabangi ako nga mapailobong mopas-an sa mga krus sa akong kinabuhi ug hatagi ako og paglaom aron makita ko nga gikan niini Imong ipatungha ang maayong bunga sa walay kataposang kalipay. Jesus, misalig ako Kanimo.
Nobena sa Espiritu Santo
Ginaampo isip pagpangandam alang sa Pentekostes
Biyernes, Mayo 10 – Sabado, Mayo 18
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Santos sa Adlaw –
San Damien de Veuster sa Moloka’i, Pari—Opsiyonal nga Handumanan sa USA
San John sa Ávila, Pari ug Doktor sa Simbahan—Opsiyonal nga Handumanan
Mga Kapilian sa mga Basahon sa Misa
