Hulyo 18, 2024
Huwebes sa Ikanapulog-limang Semana sa Ordinaryong Panahon
Mga Pagbasa Karong Adlawa
San Camillus de Lellis, Pari—Opsiyonal nga Handumanan sa USA
(Gisaulog sa Hulyo 14 sa gawas sa Estados Unidos)
Paminaw sa Iningles
“Pas-ana ang akong yugo ug pagkat-on kamo gikan kanako, kay ako maaghop ug mapaubsanon sa kasingkasing; ug makakaplag kamo og kapahulayan alang sa inyong kaugalingon. Kay ang akong yugo sayon pas-anon, ug ang akong palas-anon gaan.” Mateo 11:29–30
Alang sa unang mga sumusunod ni Jesus, pamilyar ang pulong nga “yugo.” Daghan kanila ang kanunayng naggamit og mga baka ug ubang mananap sa pagdaro sa ilang mga uma. Aron mahimo kini, butangan nila og kahoy nga yugo ang liog sa mga baka. Usa kini ka matang sa sangon nga ikabit usab sa daro, aron mas sayon alang sa mga baka ang pag-ugmad sa yuta. Ang pagkasangon og yugo usa ka timaan sa pagkaulipon, kay mao kana ang tahas sa mga baka.
Sa iyang pagpatin-aw niining teksto, gitandi ni San Agustin (sa Wali 126) ang yugo ni Kristo sa mga pako sa usa ka langgam. Dagko ang mga pako sa langgam kon itandi sa lawas niini. Busa, kon adunay mohunahuna nga mas sayon ang kinabuhi sa langgam kon kuhaon ang mga pako niini aron mawagtang ang sobrang gibug-aton, ang maong buhat mosangpot hinuon sa pagpabilin niini sa yuta nga dili na makalupad. Apan ibalik ang mga pako niini ug kana nga “yugo” makahimo niini sa paglupad nga hataas sa kalangitan.
Ingon usab niana ang yugo sa atong Ginoo. Kon dawaton nato ang pagdapit nga mahimong alagad sa Diyos ug pas-anon nato ang yugo ni Kristo aron matuman ang atong misyon sa pag-alagad, atong madiskobrehan nga ang pag-alagad makapagaan kanato, makapahupay, makapalagsik ug makahatag kanato og kusog. Gibuhat kita alang sa pag-alagad sa Diyos, sama nga ang langgam gibuhat nga adunay mga pako. Ug sama sa langgam, kon kuhaon nato sa atong kinabuhi ang yugo sa pag-alagad sa Diyos, mabug-atan hinuon kita ug dili nato matuman ang kaayohan nga gituyo nga atong buhaton.
Gisultihan usab kita niining teksto nga dili angay natong pas-anon ang atong kaugalingong yugo; hinuon, ang yugo ni Kristo ang atong pas-anon. “Pas-ana ang akong yugo…,” miingon si Jesus. Ang pagpas-an sa yugo ni Jesus nagpasabot nga gitawag kita sa pagkinabuhi uban Kaniya ug diha Kaniya. Mianhi Siya aron sa pag-alagad ug sa paghatag sa Iyang kinabuhi alang sa uban. Katungdanan nato nga buhaton usab kini pinaagi sa pagtugot Kaniya nga buhaton kini diha kanato. Si Kristo ug ang Iyang pagkaalagad mao gayod ang angay nga magdasig ug mahimong pundasyon sa atong kinabuhi.
Pamalandongi karon ang imong pagkatinawag nga mahimong alagad diha kang Kristo. Sa unsang paagi ka gitawag sa Diyos sa pag-alagad? Kinsa ang gitawag sa Diyos nga imong alagaran? Ug sa imong pagtubag niana nga pangutana, giunsa nimo pagtan-aw ang imong pag-alagad? Morag bug-at ba alang kanimo ang pag-alagad? O nasabtan ba nimo nga alang niini ka gibuhat? Kon giisip nimo nga palas-anon ang mapaubsanong pag-alagad, tingali tungod kay wala pa gayod nimo masulayi ang pag-alagad uban ug diha kang Kristo mismo. Sulayi ang pagpamalandong nga gibutang ni Jesus ang Iyang yugo sa imong mga abaga. Isulti ang “Oo” sa maong buhat ug sa misyon sa mapaubsanong pag-alagad nga gitawag ka sa pagtuman. Ang pagbuhat niini sa tibuok kasingkasing dili lamang makapahupay kanimo, kondili maghatag usab og kahulogan ug katuyoan sa imong kinabuhi.
Akong malumong Ginoo, mianhi Ka kanamo aron mag-alagad ug mohalad sa Imong kinabuhi tungod sa gugma. Hatagi ako sa grasya nga akong gikinahanglan aron dawaton ang Imong pag-alagad kanako, ug aron sundogon kini ug makig-ambit usab sa pag-alagad diin ako gitawag. Hinaot nga akong pas-anon ang Imong yugo, minahal nga Ginoo, aron akong matuman ang misyon nga Imong gitugyan kanako. Jesus, misalig ako Kanimo.
Dugang nga mga Pamalandong sa Ebanghelyo
Mga Pamalandong sa Diosnong Kalooy
Mga Pamalandong sa Balaang Kasulatan alang sa Panahon sulod sa Tuig
Santos sa Adlaw – San Camillus de Lellis, Pari—Dili Obligadong Handumanan sa USA
(Gisaulog sa Hulyo 14 sa gawas sa Estados Unidos)
Mga Kapilian sa mga Basahon sa Misa
Gipasiugda nga hulagway sa ibabaw: flickr
