ಯೇಸುವಿನ ಭಾಷೆ

ಮೇ 5, 2020
ಪಾಸ್ಕಕಾಲದ ನಾಲ್ಕನೇ ವಾರದ ಮಂಗಳವಾರ
ಇಂದಿನ ವಾಚನಗಳು

ಯೇಸು ದೇವಾಲಯದ ಆವರಣದಲ್ಲಿದ್ದ ಸೊಲೊಮೋನನ ಮಂಟಪದಲ್ಲಿ ನಡೆದಾಡುತ್ತಿದ್ದರು. ಆಗ ಯೆಹೂದ್ಯರು ಅವರನ್ನು ಸುತ್ತುವರಿದು, “ಇನ್ನೆಷ್ಟು ಕಾಲ ನಮ್ಮನ್ನು ಅನಿಶ್ಚಿತತೆಯಲ್ಲಿ ಇಡುತ್ತೀರಿ? ನೀವು ಕ್ರಿಸ್ತರಾಗಿದ್ದರೆ ನಮಗೆ ಸ್ಪಷ್ಟವಾಗಿ ಹೇಳಿ” ಎಂದರು. ಯೇಸು ಅವರಿಗೆ, “ನಾನು ನಿಮಗೆ ಹೇಳಿದ್ದೇನೆ; ಆದರೂ ನೀವು ವಿಶ್ವಾಸವಿಡುವುದಿಲ್ಲ” ಎಂದು ಉತ್ತರಿಸಿದರು.  ಯೋಹಾನ 10:24–25

ಯೇಸುವಿನ ಈ ಮಾತು ಅವರ ಅನುಯಾಯಿಗಳನ್ನು ಗೊಂದಲಕ್ಕೀಡುಮಾಡಿರಬಹುದು.  ಯೇಸುವೇ ಮೆಸ್ಸೀಯ ಎಂದು ವಿಶ್ವಾಸವಿಡಲು ಅವರು ಬಯಸಿದ್ದರು. ಆದ್ದರಿಂದ ತಾವೇ ಮೆಸ್ಸೀಯರೇ ಎಂಬುದನ್ನು ಸ್ಪಷ್ಟವಾಗಿ ಹೇಳುವಂತೆ ಅವರನ್ನು ಕೇಳಿದರು.  ಅವರು ಹೇಗೆ ಉತ್ತರಿಸಿದರು?  ತಾವು ಈಗಾಗಲೇ ಅವರಿಗೆ ಹೇಳಿದ್ದರೂ ಅವರು ವಿಶ್ವಾಸವಿಡಲಿಲ್ಲ ಎಂದು ಹೇಳಿದರು.  ಇದು ಒಂದು ಕುತೂಹಲಕರ ಸನ್ನಿವೇಶ.

ಇದರ ಬಗ್ಗೆ ಮೊದಲು ಹೇಳಬೇಕಾದದ್ದು ಏನೆಂದರೆ, ಯೇಸು ಅವರನ್ನು ಟೀಕಿಸುತ್ತಿರಲಿಲ್ಲ.  ತಮ್ಮ ಭಾಷೆಯನ್ನು ಅರ್ಥಮಾಡಿಕೊಳ್ಳಲು ಅವರಿಗೆ ನೆರವಾಗುತ್ತಿದ್ದರು.  ಅವರ ಪ್ರಶ್ನೆಗೆ ಉತ್ತರವೆಂದರೆ ಯೇಸು ಕೇವಲ “ನಾನೇ ಮೆಸ್ಸೀಯ!” ಎಂದು ಹೇಳುವುದಲ್ಲ ಎಂಬುದನ್ನು ಅರ್ಥಮಾಡಿಕೊಳ್ಳಲು ಅವರಿಗೆ ನೆರವಾಗುತ್ತಿದ್ದರು.  ಬದಲಾಗಿ, ಅವರು ಯೇಸುವಿನ ಮಾತುಗಳನ್ನು ಆಲಿಸುತ್ತಾ, ಅವರ ಅದ್ಭುತಕಾರ್ಯಗಳನ್ನು ನೋಡುತ್ತಿರುವಾಗ, ಅವರ ಪ್ರಶ್ನೆಗೆ ಉತ್ತರವು ಸ್ವರ್ಗದಲ್ಲಿರುವ ತಂದೆಯಿಂದ ಅವರ ಹೃದಯಗಳಿಗೆ ನುಡಿಯಲ್ಪಡಬೇಕಾಗಿತ್ತು.  ಅಂತರಂಗದಲ್ಲಿ ಸ್ವೀಕರಿಸಬೇಕಾದ ವಿಶ್ವಾಸದ ವರದ ಮೂಲಕ ಅವರಿಗೆ ಉತ್ತರ ದೊರೆಯಬೇಕಾಗಿತ್ತು.  ಈ ವಿಶ್ವಾಸದ ವರವು ಅವರು ಅಷ್ಟಾಗಿ ಬಯಸಿದ ಖಚಿತತೆಯನ್ನು ಅವರಿಗೆ ನೀಡುತ್ತಿತ್ತು.

ನಮ್ಮ ವಿಷಯದಲ್ಲಿಯೂ ಇದು ಸತ್ಯ.  ಕೆಲವೊಮ್ಮೆ ದೇವರು ಸ್ವರ್ಗದಿಂದ ಇಳಿದುಬಂದು, ನಿಮ್ಮ ಯಾವುದಾದರೊಂದು ಪ್ರಶ್ನೆಗೆ “ಸ್ಪಷ್ಟವಾಗಿ” ಉತ್ತರಿಸಬೇಕೆಂದು ನೀವು ಬಯಸಿರಬಹುದು.  ಆದರೆ ಅವರು ಹಾಗೆ ಮಾಡುವುದಿಲ್ಲ.  ಅವರು ತಮ್ಮ ಪರಿಪೂರ್ಣ ರೀತಿಯಲ್ಲಿ, ತಮ್ಮ ಪರಿಪೂರ್ಣ ಭಾಷೆಯಲ್ಲಿ ಉತ್ತರಿಸುತ್ತಾರೆ.  ಅದು ವಿಶ್ವಾಸದ ಭಾಷೆ; ಅದನ್ನು ಕೇಳಿ ಅರ್ಥಮಾಡಿಕೊಳ್ಳಲು ನಾವು ನಮ್ಮ ಮನಸ್ಸನ್ನೂ ಇಚ್ಛೆಯನ್ನೂ ದೇವರಿಗೆ ಸಂಪೂರ್ಣವಾಗಿ ಸಮರ್ಪಿಸಬೇಕಾಗುತ್ತದೆ.  ದೇವರು ಬಯಸುವ ರೀತಿಯಲ್ಲಿ ನಾವು ಮನಃಪರಿವರ್ತನೆ ಹೊಂದಲು ಇದೊಂದೇ ಮಾರ್ಗ. 

ದೇವರು ಮಾತನಾಡುವುದನ್ನು ನೀವು ಎಷ್ಟು ಚೆನ್ನಾಗಿ ಆಲಿಸುತ್ತೀರಿ ಎಂಬುದನ್ನು ಇಂದು ಚಿಂತಿಸಿ.  ಅವರ ಸತ್ಯದ ಸ್ವರವನ್ನು ವಿವೇಚಿಸಿ ಗುರುತಿಸುತ್ತಾ, ಅವರ ಮಾತನ್ನು ಇನ್ನಷ್ಟು ಸ್ಪಷ್ಟವಾಗಿ ಆಲಿಸಲು ನೀವು ಖಂಡಿತವಾಗಿಯೂ ಕಲಿಯಬಹುದು.  ಅವರ ಮಾತನ್ನು ಕೇಳುವಾಗ, ಅವರು ಹೇಳುವ ಪ್ರತಿಯೊಂದರ ಕುರಿತು ನಿಮ್ಮಲ್ಲಿ ಪೂರ್ಣ ದೃಢನಿಶ್ಚಯ ಬೆಳೆಯಲು ಅವಕಾಶ ಮಾಡಿಕೊಡಿ.  ಆ ಆಳವಾದ ದೃಢನಿಶ್ಚಯವು ನಿಮ್ಮ ಜೀವನವನ್ನು ನಡೆಸಲಿ.

ಪ್ರಭುವೇ, ವಿಶ್ವಾಸದ ವರದ ಮೂಲಕ ನಿನ್ನ ಮಾತನ್ನು ಸ್ಪಷ್ಟವಾಗಿ ಕೇಳಲು ನಾನು ಅನೇಕ ಬಾರಿ ಮನಸ್ಸು ಕೊಡುವುದಿಲ್ಲ.  ಕಠಿಣ ಪ್ರಶ್ನೆಗಳಿಗೆ ಸುಲಭವಾದ ಉತ್ತರವೇ ಬೇಕೆಂದು ನಾನು ಅನೇಕ ಬಾರಿ ಬಯಸುತ್ತೇನೆ.  ನಾನು ನಿನ್ನನ್ನು ಅರಿತುಕೊಳ್ಳುವಂತೆಯೂ, ನೀನು ನನ್ನ ನಿಜವಾದ ಕುರಿಪಾಲಕನಾಗಲು ಅವಕಾಶ ನೀಡುವಂತೆಯೂ ತಾಳ್ಮೆಯಲ್ಲಿ ಬೆಳೆಯಲು ನನಗೆ ನೆರವಾಗು.  ಯೇಸುವೇ, ನಿನ್ನಲ್ಲಿ ಭರವಸೆಯಿಡುತ್ತೇನೆ.

ಇನ್ನಷ್ಟು ಸುವಾರ್ತಾ ಚಿಂತನೆಗಳು

ದೈವಿಕ ಕರುಣೆಯ ಧ್ಯಾನಗಳು

ಇಂದಿನ ಸಂತರು/ಹಬ್ಬಗಳು

ದಿವ್ಯಬಲಿಯ ವಾಚನಗಳ ಆಯ್ಕೆಗಳು

ಚಿತ್ರ: ಜೇಮ್ಸ್ ಟಿಸ್ಸೊ ರಚಿಸಿದ ‘ಸೊಲೊಮೋನನ ಮಂಟಪದಲ್ಲಿ ನಡೆದಾಡುತ್ತಿರುವ ಯೇಸು’